II Nau Rêh Jêng 33 - Nau Brah Ndu Ngơi 2023

Y-Manasê mbah brah êng

¹ Y-Manasê geh jât ma bar năm tơlah păng ntơm chiă uănh, jêh ri păng chiă uănh prăm jât ma prăm năm ta ƀon Yêrusalem.

² Păng ƀư nau mhĭk tanăp măt Brah Yêhôva, tĭng lĕ nau vay dŭt ƀơ̆ ƀơch tâm phung ndŭl mpôl Brah Yêhôva hŏ mprơh du jêh tă bơh phung ƀon lan Israel.

³ Y-Manasê ndâk tay lĕ ntŭk prêh klơ mbơ̆ păng jêng Y-Hêsêkia ƀư rai jêh, ndâk tay đŏng nơng ƀư brah ma brah Baal, ƀư lĕ rup ma bu ur brah Asêrah, yơk mbah ma lĕ rngôch mănh mbing klơ trôk jêh ri pah kan ma phung nây.

⁴ Păng ndâk lĕ nơng ƀư brah tâm ngih Brah Yêhôva jêng ntŭk Brah Yêhôva hŏ lah: “Amoh Gâp mra gŭ tâm ƀon Yêrusalem n'ho ro.”

⁵ Tâm bar ntŭk ndring nhuang ngih brah Brah Yêhôva, păng ndâk đŏng lĕ nơng ƀư brah ăn ma lĕ rngôch mănh klơ trôk.

⁶ Păng nhhơr kon păng nơm jêng ndơ ƀư brah gŭch tâm ŭnh, ta rlŭng Bên-hinôm, păng uănh n'hŭm pol, gŭn rƀên jêh ri nau ƀŭk rƀên, tĭng phung gru rƀên jêh ri phung n'hŭm. Hađăch ƀư âk nau djơh tanăp măt Brah Yêhôva gay nsônh Păng ji nuih.

⁷ Păng ƀư rup brah jêh ri n'gân tâm ngih Brah Ndu, jêng ntŭk Brah Ndu lah jêh ma Y-Đavit jêh ri ma Y-Salômôn, kon bu klâu păng, pô aơ: “Tâm ngih brah aơ jêh ri ta ƀon Yêrusalem, jêng ƀon Gâp hŏ săch jêh tâm lĕ rngôch ndŭl mpôl phung Israel, Gâp mra dơm amoh Gâp gŭ n'ho ro.

⁸ Tơlah phung Israel mât mray ƀư tĭng lĕ rngôch nau vay dăp jêh ri nau vay ƀư, Gâp hŏ dŏng jêh Y-Môis ntĭm nti khân păng, pôri Gâp mâu mra ăn ma mpang jâng phung Israel luh du tă bơh n'gor Gâp hŏ ăn jêh ma phung chô yau khân păng.”

⁹ Ƀiălah, Y-Manasê nsŭk nsôr phung Yuđa jêh ri phung gŭ tâm ƀon Yêrusalem, kŏ tât khân păng ƀư lĕ nau djơh mhĭk âk lơn ma phung ndŭl mpôl Brah Yêhôva hŏ ƀư rai jêh tanăp phung ƀon lan Israel.

Y-Manasê rmal nau tih jêh ri dơi jêng tay

¹⁰ Brah Yêhôva hŏ lah ma Y-Manasê jêh ri phung ƀon lan păng, ƀiălah khân păng mâu meng ôh.

¹¹ Yor nây, Brah Yêhôva ntrŭt phung kôranh tahan hađăch Asiri tât lơh khân păng, nhŭp chăp Y-Manasê ma rse rvăk kông jêh ri sŏk nklĕ loih nkuăk ta trôm muh têk leo păng ma ƀon Babilôn.

¹² Nôk păng gŭ tâm nau rêh ni, păng vah vơl dăn ma Yêhôva Brah Ndu, jêh ri ntrŭnh săk păng nơm tanăp Brah Ndu phung chô yau păng.

¹³ Y-Manasê mbơh sơm ma Brah Ndu. Brah Ndu yô̆ jêh ri sŏk dơn lĕ nau păng vơl dăn, ăn păng sĭt ma ƀon Yêrusalem gay ma chiă uănh ƀon bri hađăch. Nôk nây mơ Y-Manasê gĭt năl ma Brah Yêhôva jêng Brah Ndu.

Y-Manasê mbang lơi lĕ rup brah

¹⁴ Jêh nau nây, păng ƀư mpêr padih ƀon Đavit, mpeh ma nhâp nar ƀon Gihôn, tâm rlŭng, tât ma ntŭk lăp mpông pêr ka, jêh ri văr jŭm ƀon Ôphel; hađăch ndâk mpêr nây prêh ngăn. Jêh nây păng đă phung kôranh chiă uănh tahan tâm lĕ rngôch ƀon geh pôih nâp tâm n'gor Yuđa.

¹⁵ Y-Manasê mƀăr lơi phung brah bu năch jêh ri rup brah luh bơh ngih Brah Yêhôva; hađăch mƀăr lơi đŏng lĕ rngôch nơng ƀư brah păng hŏ ƀư jêh ta klơ yôk geh ngih Brah Yêhôva jêh ri ta ƀon Yêrusalem, jêh ri klŭp mƀăr ndơ nây padih ƀon.

¹⁶ Jêh nây, păng nkra tay nơng ƀư brah ma Brah Yêhôva, păng nhhơr ndơ ƀư brah ma nau đăp mpăn jêh ri ndơ ƀư brah tâm rnê lah ueh ta nây; jêh ri păng ntĭnh ma phung Yuđa pah kan ma Yêhôva Brah Ndu Israel.

¹⁷ Nđâp lah pônây, phung ƀon lan ăt hôm e nhhơr ndơ ƀư brah ta lĕ ntŭk prêh ta klơ, nđâp lah knŏng nhhơr ăn Yêhôva Brah Ndu khân păng dơm.

Y-Manasê khĭt

¹⁸ Lĕ kan êng Y-Manasê, lĕ nau păng mbơh sơm ma Brah Ndu păng, jêh ri phung geh nau tâm saơ sŏk amoh Yêhôva Brah Ndu Israel gay ngơi ma hađăch, bu hŏ nchih da dê tâm ndrom samƀŭt Phung Hađăch Israel.

¹⁹ Nau păng mbơh sơm jêh ri nau Brah Ndu dơn nau păng vơl, lĕ nau păng ƀư tih jêh ri lĕ nau păng mâu gŭ răp jăp ôh, lĕ ntŭk prêh păng hŏ ndâk, rup brah Asêrim jêh ri rup brah trah, êlor ma păng ntrŭnh săk păng nơm; lĕ rngôch bu nchih da dê tâm ndrom samƀŭt Y-Hôxai.

²⁰ Y-Manasê khĭt hăn gŭ ndrel ma phung che păng jêh ri bu tâp păng tâm ngih hađăch. Y-Amôn, kon bu klâu păng chiă uănh thoi păng.

Amôn mbah rup brah

²¹ Y-Amôn geh bar jât ma bar năm, tơlah păng ntơm chiă uănh, jêh ri păng chiă uănh bar năm tâm ƀon Yêrusalem.

²² Păng ƀư nau mhĭk tanăp măt Brah Yêhôva, nâm bu Y-Manasê, mbơ̆ păng hŏ ƀư jêh. Y-Amôn nhhơr mpa ƀư brah ma lĕ rngôch rup trah Y-Manasê, mbơ̆ păng ƀư jêh, jêh ri pah kan ma phung rup brah nây.

²³ Hađăch Amôn mâu ŭch ntrŭnh săk păng nơm tanăp măt Brah Yêhôva nâm bu Y-Manasê, mbơ̆ păng hŏ ƀư jêh, ƀiălah păng ƀư tih lơ hâu lơn.

²⁴ Phung oh mon păng tâm rdâng jêh ri nkhĭt păng tâm ngih hađăch.

²⁵ Bi phung ƀon lan tâm n'gor nkhĭt lĕ phung hŏ tâm rdâng gay nkhĭt jêh hađăch Amôn, jêh ri njêng Y-Jôsia kon bu klâu păng jêng hađăch thoi ntrok păng.