II Nau Rêh Jêng 28 - Nau Brah Ndu Ngơi 2023

Nau Y-Ahas mbah rup

¹ Y-Ahas geh bar jât năm, tơlah păng ntơm chiă uănh, jêh ri păng chiă uănh jât ma prao năm tâm ƀon Yêrusalem. Jêh ri păng mâu ƀư nau di tanăp măt Yêhôva nâm bu chô yau păng jêng Y-Đavit,

² ƀiălah chuat tĭng trong phung hađăch Israel. Păng ƀư rup brah ma brah Baal.

³ Păng su ndơ ƀâu kah tâm rlŭng Ben-Hinôm, jêh ri su kon păng nơm tâm ŭnh jêng ndơ ƀư brah, tĭng nâm nau vay ƀơ̆ ƀơch tâm phung mpôl băl bunuyh Brah Yêhôva hŏ mprơh du jêh tă bơh phung ƀon lan Israel.

⁴ Păng nhhơr mpa ƀư brah jêh ri su n'hôl ƀâu kah ta ntŭk prêh klơ, ta klơ gôl yôk, jêh ri ăp tơm si ndrêh.

Phung Aram jêh ri phung Israel dơi lơh Ahas

⁵ Yor nây, Yêhôva Brah Ndu jao păng ma ti hađăch Aram. Phung tahan Aram dơi lơh hađăch Ahas jêh ri nhŭp leo âk bunuyh ƀon lan păng jêng bu nă jêh ri njŭn leo khân păng ma ƀon Damas. Brah Yêhôva jao păng ma ti hađăch Israel đŏng jêh ri roh rai âk ngăn.

⁶ Tâm du nar, Y-Pêka kon bu klâu Y-Rêmalia ƀư nkhĭt du rsen bar rmưn bunuyh phung Yuđa, lĕ rngôch khân păng jêng phung tahan janh ktang, yorlah khân păng chalơi Yêhôva Brah Ndu phung chô yau khân păng.

⁷ Y-Sikri, du huê dăng ktang bơh bri Êphraim, nkhĭt Y-Maseya, kon bu klâu hađăch, jêh ri kôranh tahan chiă ngih hađăch Asrikam, jêh ri Y-Êlkana kôranh toyh mrô nguay.

⁸ Phung tahan Israel nhŭp ndrăng mpôl băl nơm bar rsen nuyh ƀư bu nă, nđâp ma bu ur, phung kon bu klâu, phung kon bu ur. Khân păng sŏk pit âk drăp ndơ djôt leo ndơ nây ma ƀon Samari.

Nơm mbơh lor Y-Ôdet tât buay phung Israel

⁹ Geh ta nây, du huê nơm mbơh lor Brah Yêhôva amoh Y-Ôdet. Păng hăn mâp phung tahan dôl plơ̆ sĭt bơh Samari, jêh ri lah ma khân păng: “Aơ, Yêhôva Brah Ndu phung che khân may hao ji nuih ma phung Yuđa yor ri Păng jao khân păng tâm ti khân may, jêh ri khân may nkhĭt khân păng ma nau ji nuih, nau nây lư n'hôl tât trôk.

¹⁰ Aƀaơ ri, khân may ŭch nhŭp tay phung ƀon lan Yuđa jêh ri phung Yêrusalem, bu ur nđâp ma bu klâu njêng dĭk ma khân may ƀơh? Bi ma khân may, mâu di hĕ khân may yơh hŏ ƀư tih đah Yêhôva Brah Ndu ma phung khân may?

¹¹ Pôri aƀaơ, iăt hom nau gâp, jêh ri mplơ̆ sĭt lĕ bu nă jêng mpôl băl ma khân may nơm, phung khân may hŏ geh nhŭp jêh tâm phung oh nâu khân may nơm, yorlah nau Brah Yêhôva ji nuih mra tât ma khân may.”

¹² Nôk nây, geh đŏng ƀaƀă tâm phung kôranh chiă uănh bơh Êphraim nâm bu Y-Asaria kon bu klâu Y-Jêhôhanan; Y-Bêrêkia kon bu klâu Y-Mêsilêmôt; Y-Jêhiskia kon bu klâu Y-Salum; jêh ri Y-Amasa kon bu klâu Y-Hadlai, dâk tâm rdâng đah phung plơ̆ sĭt tă tâm lơh.

¹³ Khân păng lah: “Khân may lơi dĭng leo bu nă lăp ta aơ ôh, yorlah ƀư kơt nây, khân may ƀư ma he khan nau tih đah Brah Yêhôva, jêh ri ntop đŏng nau tih mhĭk ma phung he lơ hô. Yorlah nau tih he jêng toyh ngăn, jêh ri nau ji nuih dôl gŭ klơ phung Israel.”

¹⁴ Pôri phung tahan mƀơk lơi phung bu nă jêh ri chalơi lĕ ndô ndơ pit in ăn tanăp măt kôranh chiă uănh jêh ri lĕ rngôch phung tâm rƀŭn.

¹⁵ Lĕ rngôch phung bu kuăl jêh săk khân păng dâk ro, leo bu nă luh du, sŏk kho ao tâm ndơ pit in sâm nsoh an ma lĕ rngôch bunuyh gŭ săk hưl, nsoh ntâu jot, ăn sông sa, nhêt, mhĭng dak ngi ma khân păng, jêh ri ăn phung bu ranh mâu hôm dăng ncho seh, jêh ri njŭn khân păng sĭt tât ma ndŭl mpôl khân păng nơm ta ƀon Yêrikô, ƀon geh tơm đung. Jêh ri khân păng plơ̆ sĭt ma ƀon Samari.

Y-Ahas đă hađăch Asiri kơl

¹⁶ Dôl nôk nây, hađăch Ahas đă bu hăn dăn hađăch Asiri kơl,

¹⁷ yorlah phung Êđôm plơ̆ tay lơh phung Yuđa jêh ri nhŭp âk bu nă.

¹⁸ Phung Philistin văch rvan đŏng ăp ƀon tâm bri Sêphêla jêh ri Nêgep tâm n'gor Yuđa. Khân păng sŏk pit ƀon Bet-Sêmes, Aijalon, Gêdêrôt, Sôkô nđâp ma ƀon dăch păng, Timna nđâp ma ƀon dăch păng, jêh ri Gimsô nđâp ma ƀon dăch păng; jêh ri khân păng n'ho gŭ tâm ăp ntŭk nây.

¹⁹ Yorlah hađăch Yuđa geh nau tih, Brah Yêhôva hŏ n'glưh lơi Yuđa, yorlah Y-Ahas hŏ nsŭk ăn phung Yuđa ƀư blă blơ jêh ri ƀư tih jru đah Brah Yêhôva.

²⁰ Pôri, Y-Tigla-Pilêser, hađăch Asiri, di lah văch sâm rklaih păng, ƀiălah rduh lơh tay jêh ri ƀư rêh ni ma hađăch Ahas.

²¹ Y-Ahas sŏk lĕ ndơ dŏng bơh ngih Brah Yêhôva, tâm ngih hađăch, jêh ri tâm ngih phung kôranh jao ndơ nây ma hađăch Asiri ƀiălah păng ăt mâu kơl đŏng.

Y-Ahas khĭt

²² Tâm nau rêh ni, hađăch Ahas lơ ƀư tih lơn đah Brah Yêhôva;

²³ yorlah păng nhhơr ndơ ƀư brah ma phung brah ƀon Damas, jêng phung ƀon lan hŏ lơh păng nơm, yorlah păng mĭn: “Phung brah hađăch Aram hŏ kơl jêh khân păng, pôri gâp mra nhhơr ndơ ƀư brah ma phung brah nây gay khân păng kơl gâp.” Ƀiălah phung brah nây jêng nau ƀư roh rai ma păng, jêh ri lĕ rngôch phung Israel.

²⁴ Y-Ahas rgum lĕ ndơ dŏng tâm ngih Brah Ndu jêh ri dong chah lơi, jêh ri nchăng mpông ngih Brah Yêhôva. Jêh nau nây, păng ndâk ma păng nơm nơng ƀư brah tâm ăp njônh tâm ƀon Yêrusalem.

²⁵ Tâm ăp ƀon n'gor Yuđa, păng ƀư ntŭk prêh gay su ndơ ƀâu kah ma phung brah êng, gay nsônh ăn Yêhôva Brah Ndu phung chô yau păng ji nuih.

²⁶ Lĕ kan ƀaƀă jêh ri lĕ rngôch nau hađăch gŭ ngao, bơh ntơm saơm tât lôch, bu nchih da dê tâm ndrom samƀŭt Phung Hađăch Yuđa jêh ri Israel.

²⁷ Hađăch Y-Ahas khĭt hăn gŭ ndrel phung che păng, jêh ri bu tâp păng tâm ƀon Yêrusalem, ƀiălah bu mâu njŭn ôh păng ma môch phung hađăch Israel. Jêh ri Y-Hêsêkia kon bu klâu păng chiă uănh thoi ntrok păng.