II Nau Rêh Jêng 10 - Nau Brah Ndu Ngơi 2023

Nau rêh jêng phung hađăch Yuđa ( 10:1 – 36:23 ) Jât ndŭl mpôl mpeh pa lơ joi nau tâm rdâng đah ngih Đavit

¹ Y-Rôbôam hăn tât Sichem, yorlah lĕ rngôch phung Israel văch tât jêh ta Sichem gay njêng păng ƀư hađăch.

² Lah Y-Jêrôbôam, kon Y-Nêbat, tăng nau nây păng plơ̆ sĭt tă bơh bri Êjipt; nôk nây, păng dôl gŭ ta Êjipt yorlah păng nchuăt du bơh hađăch Salômôn.

³ Bu đah bunuyh hăn kuăl păng plơ̆ sĭt. Jêh nây Y-Jêrôbôam nđâp ma lĕ rngôch phung Israel văch tât lah ma Y-Rôbôam pô aơ:

⁴ “Mbơ̆ may hŏ n'gân ta klơ hên du mlâm mâng mbăk jâk jêr. Aƀaơ, dăn ma hađăch n'hŭch hom ăn n'gơch nau rêh ni jêh ri mâng mbăk jâk ngăn mbơ̆ may hŏ n'gân jêh ta klơ hên, jêh ri hên mra pah kan ma may.”

⁵ Păng plơ̆ lah ma khân păng: “Pe nar pakơi, khân may plơ̆ sĭt mâp đah gâp.” Phung ƀon lan hăn sĭt ro.

⁶ Hađăch Rôbôam dăn kơl nau mĭn bơh phung kôranh bu ranh, jêng phung hŏ tă pah kan ma mbơ̆ păng jêng Y-Salômôn dôl păng hôm e rêh. Y-Rôbôam ôp: “Mâm nau khân may kơl mĭn ma gâp gay plơ̆ lah ma phung ƀon lan aơ?”

⁷ Phung kôranh bu ranh mbơh ma hađăch: “Tơlah hađăch ƀư ueh ma phung ƀon lan aơ, ƀư maak nuih n'hâm khân păng, jêh ri ngơi nau ueh ma khân păng, pôri khân păng mra jêng oh mon ma may mro mrăng.”

⁸ Ƀiălah Y-Rôbôam dun nau mĭn phung kôranh bu ranh hŏ lah, jêh ri păng ôp tay nau mĭn đah phung mom ndăm jêng phung văch ma toyh du rơh ndrel ma hađăch jêh ri dôl pah kan tanăp hađăch.

⁹ Hađăch ôp khân păng: “Mâm nau khân may kơl mĭn ma gâp gay ma gâp plơ̆ sĭt lah ma phung ƀon lan aơ? Yorlah khân păng hŏ lah jêh ma gâp: ‘Dăn n'hŭch ăn n'gơch hom mâng mbăk mbơ̆ may hŏ n'gân ta klơ hên.’?”

¹⁰ Phung mom ndăm hao toyh du rơh ndrel ma hađăch, lah ma păng: “Phung ƀon lan dăn jêh ma may pô aơ: ‘Mbơ̆ may hŏ n'gân ta klơ hên mâng mbăk jâk jêr, dăn ma hađăch n'hŭch ăn n'gơch ma hên.’ Pôri, dăn ma hađăch plơ̆ lah ma khân păng kơt aơ: ‘Nglau ti kon gâp toyh lơn ndŭl mbơ̆ gâp.

¹¹ Tơlah mbơ̆ gâp hŏ n'gân jêh du mâng mbăk jâk jêr ta klơ khân may, gâp mra ƀư ma mâng mbăk jâk lơn đŏng; mbơ̆ gâp tâm rmal jêh khân may ma rse ntâu, bi gâp, gâp mra tâm rmal khân may ma mâng rvĕ ndŭr vơng.’”

¹² Ta nar rơh pe, Y-Jêrôbôam nđâp lĕ rngôch phung ƀon lan văch tât tâm mâp đah Y-Rôbôam, di tĭng nâm păng hŏ lah jêh: “Văch plơ̆ hom đah gâp tâm nar rơh pe.”

¹³ Hađăch plơ̆ sĭt lah ma phung ƀon lan ma nau ngơi dăng. Pôri, hađăch Rôbôam dun lơi nau mĭn phung kôranh bu ranh hŏ kơl.

¹⁴ Hađăch tĭng nchră phung mom ndăm, jêh ri plơ̆ lah ma phung ƀon lan pô aơ: “Mbơ̆ gâp hŏ n'gân ta klơ khân may du mâng mbăk jâk jêr, gâp mra ƀư ma mâng mbăk nây jâk lơn. Mbơ̆ gâp hŏ rmal khân may ma rvĕ ntâu, bi gâp, gâp mra tâm rmal khân may ma mâng rvĕ ndŭr vơng.”

¹⁵ Pôri, hađăch mâu ŭch iăt ôh tǐng nau phung ƀon lan dăn, jêh ri nau nây jêng yor tă bơh Brah Ndu nơm ăn, gay ƀư tât di ngăn nau Brah Yêhôva hŏ đă Y-Ahija, bunuyh ƀon Silô, ngơi đah Y-Jêrôbôam, kon Y-Nêbat.

¹⁶ Lah saơ hađăch mâu iăt ôh nau khân păng dăn, lĕ rngôch phung ƀon lan plơ̆ lah ma păng pô aơ: “Moh kô̆ hên geh đah Y-Đavit? Hên mâu geh drăp ndơn ôh tâm kon Y-Yêsê. Ơ phung Israel! Ăp nơm plơ̆ sĭt hom ma ngih bok khân may. Ơ Y-Đavit! Ntơm bơh aƀaơ uănh njrăng hom ma ngih may nơm” Pôri, lĕ rngôch phung Israel plơ̆ sĭt ma ngih bok khân păng.

¹⁷ Bi ma phung Israel gŭ ta lĕ ƀon Yuđa, hôm gŭ tâm dâng nau Y-Rôbôam chiă uănh.

¹⁸ Nôk hađăch Rôbôam prơh Y-Hadôram hăn, păng jêng nơm chiă uănh nau kan nchâp, tât ma phung Israel; ƀiălah khân păng klŭp lŭ nkhĭt păng. Hađăch Rôbôam ncho ndal ndeh seh nchuăt du sĭt rlet ma Yêrusalem.

¹⁹ Ntơm bơh nây, phung Israel tâm rdâng đah ngih Y-Đavit n'ho tât nar aơ.