II Kôrintô 1 - Nau Brah Ndu Ngơi 2023

Nau mbah jô̆ khâl

¹ Y-Pôl, yor tă bơh nau mĭn Brah Ndu ŭch dĭng dơi jêng kôranh oh mon Brah Yêsu Krist, jêh ri Y-Timôthê, oh nâu he, nchih samƀŭt njuăl ma Phung Ngih Brah Ndu ta ƀon Kôrintô, ndrel ma lĕ rngôch phung kloh ueh gŭ tâm n'gor Akai.

² Mbơh sơm dăn Brah Ndu, Mbơ̆ he, jêh ri Kôranh Brah jêng Brah Yêsu Krist ăn nau yô̆ jêh ri nau đăp mpăn ma khân may.

I. Nkoch tay nau kan kôranh oh mon ( 1:3 – 7:16 ) Nau lah ueh

³ Mât ton ma Brah Ndu, Mbơ̆ Kôranh Brah he jêng Brah Yêsu Krist, jêng Mbơ̆ geh nau yô̆ nđach jêh ri Brah Ndu ma lĕ nau bonh leng.

⁴ Păng bonh leng hên tâm lĕ nau rêh ni, pôri hên dơi sŏk nau bonh leng Brah Ndu hŏ bonh leng hên gay ma bonh leng phung êng tâm ăp nau rêh ni khân păng geh!

⁵ Yorlah nâm bu nau rêh ni Brah Krist bêng ler tâm he, tâm ban lĕ ma Brah Krist nau tâm bonh leng nuih he jêng âk rmeh.

⁶ Tơlah hên geh nau rêh ni, nau nây gay ma khân may geh nau bonh leng jêh ri geh nau tâm rklaih; mâu lah tơlah hên geh nau bonh leng, nau nây gay ma khân may geh nau bonh leng, jêng nau bonh leng khân may hŏ găn jêh dôl nsrôih dơn lĕ nau rêh ni nâm bu hên geh.

⁷ Nau hên kâp gân ma khân may jêng nâp ktang jêh, yorlah hên gĭt tơlah khân may geh kô̆ tâm nau rêh ni ndrel ma hên, khân may mra geh đŏng kô̆ tâm bonh leng tă bơh hên.

⁸ Hơi phung oh nâu, gâp mâu ŭch ôh ma khân may mâu gĭt lĕ nau rêh ni tât jêh ma hên hŏ rgăn ta n'gor Asi. Hên geh nau jâk hâu ngăn rlau ir nau nsrôih, kŏ tât mâu hôm geh nau kâp gân ma rêh ôh.

⁹ Hên mĭn nâm bu hên nơm sŏk dơn jêh nau rmal nkhĭt; ƀiălah nau aơ ƀư ăn hên mâu hôm rnơm ma hên nơm ôh, ƀiălah rnơm nsing ma Brah Ndu, Nơm ƀư ăn bunuyh khĭt dâk rêh tay.

¹⁰ Păng yơh tâm rklaih jêh he bơh nau khĭt dŭt krit kir kơt nĕ; Păng dôl tâm rklaih hên, jêh ri hên kâp gân ma Păng mra tâm rklaih tay hên.

¹¹ Khân may kơl hom hên tâm nau mbơh sơm, gay ma nau mbơh sơm âk bunuyh mbơh sơm ma hên geh nau yô̆; jêh ri tă bơh nây, âk bunuyh mra nhhơr nau tâm rnê lah ueh.

Nau Y-Pôl răp jăp

¹² Nau ƀư ma hên geh nau hâk răm, nây jêng nuih n'hâm sŏng hên mbơh nkoch ma hên hŏ sŏk nau răp jăp jêh ri nau nanê̆ ngăn tă bơh Brah Ndu gay ma gŭ ngao tâm neh ntu nây, khlay ngăn ngên đah khân may. Hên mâu nsing nau blau mĭn tâm nglay săk ôh, ƀiălah nsing rnơm nau yô̆ bơh Brah Ndu.

¹³ Yorlah hên mâu nchih ma khân may nau êng rlau lơn lĕ nau khân may dơi rŏ jêh ri gĭt rbăng. Gâp kâp gân ma khân may mra gĭt rbăng rah vah.

¹⁴ Nâm bu khân may gĭt rbăng jêh hên du kô̆: Hên jêng nau khân may tâm rnê, jêh ri hên geh nau tâm rnê yor khân may ta nar Kôranh Brah he jêng Brah Yêsu.

Nau Y-Pôl ê hŏ hăn tât ta ƀon Kôrintô

¹⁵ Yor nau gâp rnơm nây, gâp tâm nal hăn chop khâl khân may lor, gay khân may dơn nau ueh maak bar tơ̆.

¹⁶ Gâp tâm nal hăn chop khâl khân may dôl hăn trong tât ta n'gor Masêđôn; jêh nây tă bơh n'gor Masêđôn plơ̆ sĭt đŏng ta khân may, jêh ri khân may mra kơl gâp hăn tât ta n'gor Yuđa.

¹⁷ Di lĕ gâp vât vâng lah gâp mĭn nau aơ? Mâu lah nau gâp hŏ tâm nal tĭng nâm nglay săk kŏ tât geh tơ̆ lah “Ơ” geh tơ̆ lah “Mâu” ôh?

¹⁸ Nanê̆ nâm bu Brah Ndu jêng răp jăp, nau hên ngơi jêh ma khân may mâu di geh tơ̆ lah “Ơ” geh tơ̆ lah “Mâu” ôh.

¹⁹ Yorlah Brah Yêsu Krist, Kon Brah Ndu, hên jêng Y-Silvan, jêh ri Y-Timôthê hŏ mbơh nkoch ta Păng nklang khân may, mâu ôh geh tơ̆ lah “Ơ” geh tơ̆ lah “Mâu” ôh, ƀiălah tâm Păng “Ơ” mro.

²⁰ Yorlah tâm Păng, lĕ rngôch nau Brah Ndu ton jêng “Geh” da dê. Yor nây, tă bơh Păng đŏng, he lah: “Amen” da dê gay tâm rnê Brah Ndu.

²¹ Brah Ndu yơh, Nơm hŏ ƀư ma hên jêh ri khân may dơi nâp tâm Brah Krist, mhĭng dak ƀâu kah ma hên.

²² Păng yơh tâp pŏng Păng ta klơ he, jêh ri ăn Brah Huêng Ueh Păng gŭ tâm nuih n'hâm he gay ƀư ndơ ma nau mbơh.

²³ Gâp mbơh sơm dăn Brah Ndu mbơh ma huêng gâp, yorlah chrê khân may rĭ dĭng gâp ê hŏ hăn tât ma ƀon Kôrintô.

²⁴ Mâu di hên ŭch nkân ma nau chroh khân may ôh, ƀiălah hên ŭch ndrel ndâk njêng nau maak ma khân may, yorlah khân may hŏ dâk nâp tâm nau chroh.