ហេឞ្រើ 12 - Nau Brah Ndu Ngơi 2023

Nau srôih tĭng kơt Brah Yêsu

¹ Pôri, yorlah he geh âk phung mbơh gŭ jŭm nâm bu ndâr tŭk toyh ngăn, ăn he mƀăr lơi lĕ ndơ ƀư jâk jêh ri nau tih kât nơih pơih, ƀiălah srôih nchuăt tâm nau tâm rlong bu pơk jêh ma he.

² Uănh hom ma Brah Yêsu, Nơm ntơm bơh saơm jêh ri lôch nau chroh, jêng Nơm yor nau răm maak dơm jêh tanăp măt Păng nơm, maak dơn si tâm rkăng, tâm rmot ma nau bêk prêng, jêh ri gŭ jêh mpeh pa ma sưng hađăch Brah Ndu.

³ Pôri, khân may mĭn hom ma Nơm dơn jêh nau tâm rdâng bơh phung tih ƀư ma Păng, gay ma khân may mâu dĭl mâu lah rdja nuih n'hâm ôh.

Nau ŭch tâm nau nduyh nkra

⁴ Khân may tâm rdâng tâm lơh đah nau tih ê hŏ kŏ tât nkhŭt mham khân may ôh.

⁵ Khân may chuêl jêh nau nkah prăp khân may nâm bu nau nkah ma phung kon, pô aơ: “Hơi kon gâp, lơi tâm rmot ôh nau Kôranh Brah nduyh nkra, Jêh ri nôk Kôranh Brah nduyh, lơi rdja nuih n'hâm.

⁶ Yorlah Kôranh Brah Ndu nduyh nkra mbu nơm Păng rŏng, Mbu nơm Păng dơn jêng kon, Păng dong ma mâng rpăt.”

⁷ Ăn khân may dơn nau nduyh nkra, yorlah Brah Ndu ƀư ma khân may nâm bu kon; yorlah mbu kon mbơ̆ păng mâu nduyh nkra ôh?

⁸ Ƀiălah tơlah khân may mâu ŭch nau nduyh nkra nâm bu lĕ rngôch phung kon hŏ dơn jêh, khân may jêng kon văng tĭr, mâu di kon tơm ngăn ôh.

⁹ Rlau lơn ma nĕ, mbơ̆ tâm nglay săk nduyh nkra, he hôm klach yơk, rlau lơn ma Mbơ̆ tâm huêng, mâu di hĕ he mra tông âk tơ̆ lơn gay geh nau rêh?

¹⁰ Yorlah mbơ̆ he tâm nglay săk păng nduyh nkra tĭng nau mĭn păng nơm ŭch knŏng ƀât lât, ƀiălah Brah Ndu nduyh nkra yor ma nau khlay ma he, gay ma he dơi geh du kô̆ tâm nau kloh ueh Păng.

¹¹ Lĕ rngôch nau nduyh nkra rnôk aơ nâm bu knŏng ƀư ma nau nđêh nji, mâu di jêng nau maak ôh, ƀiălah nar kăndơ̆ geh kao play nau sŏng srăng jêh ri nau đăp mpăn ma phung dơn jêh nau nsrôih nti tâm ban pônây.

Nau ntĭm nti jêh ri nau mbơh lor

¹² Pôri, yơr hom ti rdja khân may jêh ri ƀư nâp ktang hom kômâk rbăn khân may.

¹³ Ƀư hom ăn sŏng trong ma jâng khân may, gay ma bunuyh rvĕn mâu geh nau glet jâng, ƀiălah geh nau ƀư bah.

¹⁴ Joi hom nau đăp mpăn ma lĕ rngôch bunuyh jêh ri tĭng joi nau kloh ueh; yorlah tơlah mâu gŭ kloh ueh, mâu geh du huê dơi saơ Kôranh Brah ôh.

¹⁵ Njrăng hom klach lah khân may roh nau Brah Ndu yô̆, klach lah geh reh tăng hon, ƀư nau uh ah jêh ri ƀư ƀơ̆ ƀơch ma âk bunuyh tâm khân may.

¹⁶ Uănh njrăng hom, lơi geh du huê jêng văng tĭr, mâu lah roh nau khư nâm bu Y-Êsau, yor ma du ntil ndơ sông sa, nơm tăch nau dơi kon bôk rah.

¹⁷ N'hêl nanê̆ ngăn, khân may gĭt kăndơ̆, păng ŭch tay geh nau ueh uĭn, ƀiălah bu dun păng; nđâp tơlah păng nhĭm nhhiăng gay mbơh sơm dăn kđôi lĕ, mâu hôm geh mông găl gay tâm rgâl nau păng nơm hŏ ƀư jêh.

Nau yô̆ khlay jêh ri nau kan phung chroh

¹⁸ Khân may mâu hăn dăch ôh ta yôk dơi tât, mâu đŏng hăn dăch chiông ŭnh hit, mâu lah ntŭk ngo klĕng, chuê chuăng mâu lah nau sial vănh blông,

¹⁹ mâu lah bâr nŭng huy mâu lah bâr ngơi kŏ phung tăng dăn, lơi hôm ngơi du ntil ma khân păng đŏng ôh;

²⁰ yorlah khân păng mâu dơi dơn ôh nau lah aơ: “Nđâp tơlah mpô mpa văch dăch yôk aơ bu mra klŭp ma lŭ ro.”

²¹ Nau saơ nây klach krit ngăn, kŏ tât Y-Môis lah pô aơ: “Gâp klach ngăn jêh ri râm sâr.”

²² Ƀiălah khân may hăn dăch jêh ta yôk Siôn, dăch ƀon Brah Ndu rêh, nâm bu ntĭt ƀon Yêrusalem ta klơ trôk, âk rmưn rsen tông mpăr dôl gŭ rƀŭn ma nau maak,

²³ dăch Phung Ngih Brah Ndu phung kon bôk rah, amoh săk khân păng nchih jêh tâm lĕ ndâr trôk. Khân may văch dăch Brah Ndu jêng Nơm Phat Dôih ma lĕ rngôch bunuyh, gŭ dăch huêng phung sŏng srăng geh nau ueh,

²⁴ dăch ma Brah Yêsu, Nơm Tâm Nklang ma nau tâm rnglăp mhe, nâm bu ntĭt dăch ma mham nkhŭt jêh, jêng mham ueh lơn ma mham Y-Abel.

²⁵ Njrăng hom, lơi dun ma Nơm ngơi đah khân may. Yorlah tơlah khân păng dun iăt nơm mbơh nau mbơh lor ma khân păng ta neh ntu, rlau lơn ma he tâm rdâng đah Nơm ntrŭnh nau mbơh lor bơh trôk, lơ hô mâu dơi klaih ôh.

²⁶ Dôl nây bâr Nơm nây ngơi mpât n'gơ neh ntu, ƀiălah aƀaơ aơ Păng ton pô aơ: “Hôm du tơ̆ đŏng, Gâp mâu mra knŏng ƀư n'găr neh ntu dơm ôh, ƀiălah mra ƀư n'găr trôk đŏng.”

²⁷ Lĕ rplay samƀŭt: “Hôm du tơ̆ đŏng” tâm mpơl lĕ ndơ vay geh nau mpât n'gơ, nây jêng ndơ Brah Ndu njêng jêh, bu mra mƀăr lơi, gay ma lĕ ndơ mâu dơi mpât n'gơ hôm geh ƀaƀơ.

²⁸ Yor nây, yor he sŏk dơn du ƀon bri hađăch mâu dơi mpât n'gơ ôh, ăn he gĭt nau lah ueh jêh ri sŏk nuih n'hâm klach yơk tâm nau pah kan ma Brah Ndu gay ƀư maak nuih n'hâm ma Păng;

²⁹ yorlah Brah Ndu he jêng mpiăt ŭnh su lĕ.