Habakuk 1 - Nau Brah Ndu Ngơi 2023

¹ Aơ jêng Nau Mhe Mhan Ueh ăn ma nơm mbơh lor Y-Habakuk dơi dơn bơh nau tâm saơ.

Y-Habakuk mâu hŏ vât ma nau mâu tâm di

² Ơ Brah Yêhôva! Gâp vơl dăn nau kơl Ƀiălah May mâu iăt, Gâp vơl dăn ma May yor nau bu ƀư mhĭk Kŏ tât ndah jŏ nau May mâu ŭch ôh tâm rklaih?

³ Mâm ƀư may ăn gâp saơ nau mâu tâm di? Mâm May gŭ uănh mro ma nau bu ƀư mhĭk? Panăp gâp jêng nau ƀư rai jêh ri nau djơh mhĭk; Nau tâm djrel jêh ri nau tâm rlăch geh tât lam ntŭk.

⁴ Yor nây, nau vay mâu hôm chrê ôh, Nau di mâu ŭch ƀư ôh. Phung janh ƀai nchueng bunuyh sŏng srăng, Yor ri nau di geh nau kue.

Brah Yêhôva plơ̆ lah ma Y-Habakuk

⁵ “Uănh hom ma lĕ bri dak jêh ri nklân kâp uănh, Hih rhâl hom jêh ri ndrŏt ndal! Yorlah Gâp mra ƀư du ntil kan tâm rnôk khân may, Nđâp tơlah bu nkoch bri, khân may mâu chroh đŏng ôh.

⁶ Aơ, Gâp nsônh phung Kaldê văch hao lơh; Khân păng jêng du phung ƀon lan djơh ngăn mâu djân bu ôh, Phung hăn lăp tâm ăp n'gor bri neh ntu dŭt huy, Gay pit âk ntŭk gŭ mâu di ôh ntŭk khân păng nơm.

⁷ Khân păng dŭt klach ngăn jêh ri krit klach hâu ngăn, Khân păng ƀư nau vay ma khân păng nơm, jêh ri n'hi êng n'hao êng khân păng nơm.

⁸ Seh hăn tâm lơh khân păng prăl rlau lơn phung yau brăch, Jêh ri janh ngăn rlau so bri dôl bri măng. Phung tahan ncho seh khân păng nchuăt ngăch ngăn văch tă bơh bri ngai; Khân păng mpăr ngăch nâm bu klang jŭr kăp mpa sa.

⁹ Lĕ rngôch khân păng văch tât ma nau djơh janh; Khân păng rduh panăp ngăch nâm bu phŭt sial, Jêh ri rgum bu nă nâm bu choih.

¹⁰ Khân păng mưch ma phung hađăch Jêh ri ntêh rmot ma phung kôranh chiă uănh. Khân păng gơm mưch ma lĕ rngôch pôih nâp, Jêh ri n'hao bun neh nchueng jŭm jêh nây sŏk pit in ƀon toyh.

¹¹ Rnôk nây, rduh ran tât jêh ri hăn ntrŭt nâm bu sial phŭt, Khân păng ƀư tih jru ngăn Yorlah uănh nau dăng khân păng nơm jêng brah.”

Habakuk mâu hŏ vât

¹² Ơ Yêhôva Brah Ndu, Jêng Nơm Kloh Ueh gâp! Mâm mâu di May ơm geh ntơm bơh saơm n'ho ro mâu blau lôch? Pôri, hên mâu ôh mra khĭt! Ơ Brah Yêhôva, May hŏ săch jêh phung ƀon lan nây gay prăp ma nau phat dôih. Ơ Kôranh Brah jêng Lŭ Toyh, May hŏ ndâk jêh khân păng gay ma tâm rmal!

¹³ Măt Kôranh Brah kloh ir mâu dơi uănh ôh nau mhĭk, Mâu dơi uănh ntreng ôh nau tih mhĭk. Mâm ƀư May uănh ma phung ƀư nau mƀruh nchơt? Mâm ƀư May gŭ klăk klêm, Lah bunuyh mhĭk sa rvăn bunuyh sŏng srăng lơn ma păng?

¹⁴ May njêng kon bunuyh nâm bu ka dak mƀŭt Jêh ri nâm bu ndrŭng vơr mâu geh bunuyh chiă uănh.

¹⁵ Phung rlăng tê̆ ndar sŏk lĕ rngôch, Khân păng seng ma jal têk n'hao khân păng Jêh ri rgum lĕ rngôch tâm nhuăl păng. Pônây khân păng răm jêh ri rhơn ngăn.

¹⁶ Yor nây, khân păng nhhơr mpa ƀư brah ma yŭ jal, Jêh ri su ndơ ƀâu kah ăn ma nhuăl; Yorlah ma yŭ jal khân păng geh ndơ sa lay rmŏng Jêh ri geh ndơ sông sa rmeh ler.

¹⁷ Di lĕ khân păng ƀư kloh mro yŭ jal khân păng, Gay mâu rlu ôh nkhĭt lơi phung ƀon lan mâu geh djê̆ ro nau yô̆ nđach?