Êsai 42 - Nau Brah Ndu Ngơi 2023

Oh mon Brah Yêhôva

¹ Aơ jêng oh mon Gâp, Nơm Gâp kâp kơl, Jêng Nơm Gâp hŏ săch jêh, jêh ri tâm Păng huêng Gâp geh nau maak. Gâp hŏ dơm jêh Brah Huêng Gâp ta klơ Păng, Jêh ri Păng mra mpơl nau sŏng ma lĕ bri dak.

² Păng mâu mra nter huy ôh, mâu lĕ hao ngơi, Mâu lĕ ăn bu tăng bâr păng tâm trong sâng.

³ Păng mâu mra nkê̆ch lơi ôh tơm rpho hŏ nchah jêh, Jêh ri mâu khôm ôh brai ŭnh kađen dăch nhhât jêh. Păng mra sŏk nau răp jăp mpơl nau di.

⁴ Păng mâu mra hŏt rgănh, mâu rdja nuih ôh Kŏ tât nôk Păng ndâk jêh nau di ta klơ neh ntu; Lĕ rngôch gôl dak mƀŭt mra kâp gân nau vay Păng.

⁵ Yêhôva Brah Ndu, Nơm hŏ rhăk njêng jêh ri pơk lĕ ndâr trôk, Nơm hŏ lăk huy neh ntu, ndrel lĕ rngôch mpa luh bơh păng, Nơm ăn n'hâm rêh ma phung ƀon lan tâm klơ neh, Jêh ri ăn nau brah ma phung bunuyh hăn ta nây; Păng lah:

⁶ “Gâp jêng Brah Yêhôva, Gâp hŏ kuăl jêh may tâm nau sŏng srăng, Gâp mra kuăn ta ti may jêh ri mât mray may. Gâp mra ndâk ăn may jêng du nau tâm rnglăp ma phung ƀon lan, Ƀư nau ang ma lĕ bri dak,

⁷ Gay pơk măt phung chieh măt, Ngluh phung bu nă bơh ndrung bu krŭng, Phung gŭ tâm nau ngo ngluh bơh ndrung bu krŭng.

⁸ Gâp jêng Brah Yêhôva, pônây yơh jêng amoh Gâp. Gâp mâu mra ăn ôh nau chrêk rmah Gâp ma nơm êng, Mâu lĕ ăn nau tâm mprơ rnê Gâp ma lĕ rup brah trah!

⁹ Aơ, lĕ nau ta lor tât ngăn jêh, Aƀaơ aơ Gâp lŏ mbơh tay lĕ nau mhe ma khân may; Gâp ăn khân may gĭt Êlor nau nây tât.”

Nau mprơ tâm rnê ma Brah Ndu

¹⁰ Mprơ hom ma Brah Yêhôva du nau mprơ mhe, Nau mprơ tâm rnê ma Păng bơh ntŭk dŭt rplay neh! Ơ phung hăn ta dak mƀŭt, nđâp ma lĕ rngôch mpa tâm păng, Lĕ gôl dak mƀŭt ndrel phung gŭ tâm păng, Rđuh ngrông hom.

¹¹ Ăn bri rdah jêh ri lĕ ƀon toyh tâm păng nter troh hom; Lĕ rngôch ƀon phung Kêdar gŭ rêh đŏng kơt nây; Phung ta Sêla mprơ hom ma nau răm, Nter troh hom bơh lĕ n'gơn yôk.

¹² Nhhơr hom nau chrêk rmah ma Brah Yêhôva, Jêh ri mbơh nau tâm rnê ma Kôranh Brah tâm lĕ rngôch gôl dak mƀŭt.

¹³ Brah Yêhôva mra hăn panăp tâm ban ma du huê nơm tahan janh ktang, Tâm ban ma du huê bunuyh tahan bêng ma nau duh nđơr; Păng nter, ngơi huy rduh tâm lơh, Jêh ri Păng mra lơh rai lĕ phung rlăng đah Păng nơm.

¹⁴ Jŏ jêh Gâp gŭ rklăk, Gâp hŏ gŭ rklăk, Gâp hŏ kuăn rdâng Gâp nơm. Ƀiălah aƀaơ aơ, Gâp nter, ngơi nthôk nthơk, nsôr n'hâm mâu luh n'hâm, Tâm ban ma du huê bu ur deh kon,

¹⁵ Gâp mra ƀư rai yôk jêh ri gôl, Gâp mra ƀư nhop kro lĕ rngôch gơ̆ ndrêh; Gâp mra tâm rgâl dak krong jêng gôl dak mƀŭt, Ƀư ma lĕ dak nglao suăt kro da dê.

¹⁶ Gâp mra njŭn phung chieh măt hăn ta trong khân păng mâu mâp gĭt năl ôh, Têk khân păng tâm lĕ trong jê̆ ê hŏ gĭt ôh. Gâp mra rgâl nau ngo tanăp khân păng jêng nau ang, Lĕ ntŭk neh nduh ndăp jêng neh lâng. Ngăn yơh, Gâp mra ƀư lĕ nau nây, Jêh ri mâu mra chalơi khân păng ôh.

¹⁷ Bi phung rnơm nsing ma lĕ rup brah, Ngơi ma lĕ rup tŏ chiăr: “Khân may jêng phung brah hên,” Mra rle ndŭr kơi da dê jêh ri bêk brêng âk ngăn!

¹⁸ “Ơ phung tê̆k, gŭ iăt hom; Ơ phung chieh măt, uănh hom jêh ri saơ!

¹⁹ Mbu nơm chieh măt, tơlah mâu di jêng oh mon Gâp? Mbu nơm tê̆k tâm ban ma nơm mbơh Gâp hŏ njuăl hăn? Mbu nơm chieh măt tâm ban ma nơm prăp ăn jêh Gâp, Mâu lah chieh măt tâm ban ma oh mon Brah Yêhôva?

²⁰ May saơ jêh âk nau, ƀiălah mâu mâp klâng rvê ôh; Tôr may pơk jêh, ƀiălah may mâu tăng ôh.”

Nau Israel mâu tông bâr

²¹ Brah Yêhôva maak yor nau sŏng srăng Păng, Ƀư ăn bu yơk jêh ri ƀư chrêk rmah nau vay Păng.

²² Ƀiălah aơ jêng du phung ƀon lan bu ntŭng jêh ri bu pit sŏk jêh ndô ndơ; Lĕ rngôch khân păng dăk sân tâm trôm da dê, Jêh ri bu krŭng tâm ndrung; Khân păng jêng ndơ bu pit sŏk jêh ri mâu geh nơm tâm rklaih ôh, Jêng jêh ndơ bu pit sŏk Mâu geh nơm sâm lah pô aơ: “Mplơ̆ tay hom!”

²³ Mbu nơm tâm phung khân may rkêng tôr iăt ma nau aơ, Mbu nơm rkêng tôr iăt gay ma gĭt lĕ nau mra tât tâm nar kăndơ̆?

²⁴ Mbu nơm jao jêh phung Yakôb tâm nau ntŭng ndô ndơ, Jêh ri jao phung Israel ma phung pit sŏk? Mâu di hĕ jêng Brah Yêhôva, jêng Nơm phung he hŏ ƀư nau tâm rdâng đah Păng? Yorlah mâu geh nơm ŭch hăn tĭng trong Păng, Mâu lĕ khân păng tông ma nau vay Păng.

²⁵ Yor nây, Kôranh Brah hŏ nkhŭt jêh nau ji nuih hâu ngăn Jêh ri nau tâm lơh ktang ngăn ta klơ păng; Ŭnh sa văr jŭm jêh păng, ƀiălah khân păng mâu gĭt rbăng ôh, Ŭnh sa jêh păng ƀiălah păng mâu mĭn rvê ôh.