Êsai 25 - Nau Brah Ndu Ngơi 2023

Nau mprơ tâm rnê lah ueh ma Brah Ndu

¹ Ơ Brah Yêhôva, May jêng Brah Ndu gâp! Gâp mât ton May, gâp tâm rnê ma amoh May; Yorlah May ƀư jêh lĕ nau kan khlay ngăn Jêng lĕ nau kan May hŏ dăp jêh bơh kăl e tâm nau răp jăp jêh ri nau nanê̆ ngăn.

² Yorlah May hŏ ƀư jêh ƀon toyh plơ̆ jêng du mbŭch ƀrĭk hăch, Ƀon dŭt nâp ngăn plơ̆ jêng mbŭch rlâm rai nchah. Ngih hađăch phung bu năch mâu hôm jêng ƀon ôh, Bu mra mâu hôm rdâk tay păng ôh.

³ Yor nây, du phung ƀon lan ktang mra tâm rnê May; Ƀon ma lĕ bri dak janh ƀai mra klach yơk ma May.

⁴ Yorlah May jêng ntŭk phung o ach nsing, Jêng ntŭk nde nâp ma phung nau ndĭt trơi tâm nôk jêr jŏt ngăn, Jêng ntŭk krap bơh sial phŭt, Jêng gui n'hâm der nôk nar duh, Nôk phung ƀai khôm n'hâm luh Tâm ban ma sial phŭt njach mpêr ƀon,

⁵ May ƀư ma nau rsĭk tâm phung bu năch gŭ rklăk, Tâm ban ma nau duh hŭnh tâm neh sơh. Jêh ri ƀư rklăk bâr mprơ phung janh ktang. Tâm ban ma nau duh du roh lah geh n'hâm tŭk.

⁶ Ta yôk aơ, Brah Yêhôva ma phung tahan ma lĕ rngôch phung ƀon lan Du nhêt sa maak ma ndơ kah, ndrănh kah, Ndơ sa lay geh glo nting, ndrănh kah bu trih jêh.

⁷ Ta yôk aơ, Păng mra hêk chalơi Bok nkŭm lĕ rngôch phung ƀon lan, Jêh ri bok nkŭm lĕ rngôch bri dak.

⁸ Păng mra ƀư rai lôch n'ho ro nau khĭt. Kôranh Brah jêng Brah Yêhôva mra jut dak măt Bơh muh măt lĕ rngôch bunuyh; Jêh ri Păng mra jut lơi nau bêk prêng phung ƀon lan Păng Bơh lam neh ntu, Yorlah Brah Yêhôva lah jêh.

⁹ Tâm nar nây, bu mra lah: “Ri, aơ jêng Brah Ndu he; He kâp gân Păng, jêh ri Păng hŏ tâm rklaih he jêh. Aơ yơh jêng Brah Yêhôva he kâp gân, Ăn he hâk răm jêh ri maak yor nau Păng tâm rklaih!”

¹⁰ Yorlah ti Brah Yêhôva mra n'gân ta yôk aơ; Ƀiălah bu mra jot sôt bri Môap ta ntŭk păng, Tâm ban ma bu jot sôt mbŭch rhe tâm ntŭk ntu ndŏk.

¹¹ Ta ntŭk nây păng mra yơr ti, Tâm ban ma du huê yơr ti dôl re dak. Ƀiălah Brah Yêhôva mra ntrŭnh nau sưr păng, Jêh ƀư rai nau ndơm bơh ti păng.

¹² Mpêr ƀon may đah pôih prêh dŭt nâp ngăn, Brah Yêhôva mra ƀư rai lơi, lơh rlâm jêh ri klŭp tâm neh, Tât ta neh muy.