Êsai 2 - Nau Brah Ndu Ngơi 2023

Nau mbơh lor ma Yuđa jêh ri Yêrusalem ( 2:1 – 12:6 ) Yôk Brah Yêhôva

¹ Aơ jêng nau Y-Êsai, kon bu klâu Y-Amôt, hŏ saơ ma bri Yuđa jêh ri ƀon Yêrusalem:

² Tâm lĕ nar nglĕ dŭt, Yôk ngih Brah Yêhôva Mra dơi ndâk nâp ta klơ lĕ gôl yôk, Prêh lơn ma lĕ rngôch yôk. Lĕ rngôch bri dak mra hăn plơ̆ sĭt ta nây,

³ Âk phung ƀon lan mra văch jêh ri lah: “Văch hom, ăn he hăn hao ta yôk Brah Yêhôva, Văch ta ngih Brah Ndu Yakôb. Păng mra sâm nti trong Păng ma he, He mra hăn tâm ăp trong Păng.” Yorlah nau vay mra luh bơh Siôn, Jêh ri nau Brah Yêhôva ngơi luh bơh Yêrusalem.

⁴ Păng mra ƀư nau phat dôih ta nklang lĕ bri dak, Jêh ri nkra dôih ma âk phung ƀon lan. Aƀaơ, khân păng mra sŏk đao chiăr njêng kau kai, Sŏk tak chiăr njêng nhuĕ. Bri dak aơ mâu mra tŏk đao lơh bri dak êng, Khân păng mâu lĕ hôm nti tay nau tâm lơh đŏng ôh.

Nau phat dôih rah vah ma phung sưr

⁵ Hơi ngih Yakôb, văch hom! Ăn he chuat hăn hom tâm nau ang Brah Yêhôva.

⁶ Nanê̆, May hŏ dun jêh phung ƀon lan May jêng ngih Yakôb. Yorlah khân păng bêng ma nau rƀên bơh mpeh Luh Nar, Jêh ri ƀư n'hŭm nâm bu phung Philistin, Khân păng lŏ tâm rnglăp đah phung bu năch mâu chroh.

⁷ Bri dak khân păng bêng ma prăk mah Jêh ri drăp ndơ khlay dŭt âk; Bri dak khân păng bêng ma seh tâm lơh Jêh ri âk râk ndeh seh.

⁸ Bri dak khân păng bêng ma rup brah; Khân păng yơk mbah ma ndơ yor ti khân păng nơm ƀư, Jêng ndơ nglau ti khân păng nơm njêng.

⁹ Yor ri, kon bunuyh dơn chŭn tâm dâng, Kon bunuyh dơn nau bu n'glưh lơi; Pôri dăn Kôranh Brah lơi ta yô̆ ma khân păng ôh!

¹⁰ Lăp hom tâm trôm lŭ, Du krap tâm ndruyh neh Gay der nau klach krit bơh Brah Yêhôva, Jêh ri der luh bơh nau ral ang bơh nau chrêk rmah Păng.

¹¹ Muh măt kon bunuyh sưr rlau bu mra n'glưh lơi, Nau sưr rlau kon bunuyh mra chŭn; Tâm nar nây, Knŏng du huê Brah Yêhôva dơm geh nau yơk prêh.

¹² Yorlah Brah Yêhôva ma phung tahan hŏ tâm nal jêh du nar Tâm rdâng đah phung sưr, ma phung rnam, jêh ri ma phung n'hao êng khân păng nơm; Bu mra n'glưh lơi khân păng.

¹³ Păng tâm rdâng đŏng ma lĕ rngôch tơm si sêdar bri Liban Nau sưr, hao jêng, Jêh ri ma lĕ rngôch tơm si guyh ta bri Basan,

¹⁴ Nđâp ma lĕ rngôch yôk prêh, Jêh ri ma lĕ rngôch yôk prêh;

¹⁵ Tâm rdâng đŏng ma lĕ rngôch ngih tŭm prêh, Ma lĕ rngôch mpêr ƀon dŭt nâp ngăn,

¹⁶ Ma lĕ rngôch kumpăn Tarsis, Jêh ri ma lĕ rngôch kumpăn toyh lư.

¹⁷ Nuih n'hâm sưr kon bunuyh bu mra chŭn, Jêh ri nau hưn kon bunuyh bu mra n'glưh; Tâm nar nây, knŏng êng Brah Yêhôva geh nau bu yơk.

¹⁸ Rnôk nây, phung rup brah mra roh rai lôch.

¹⁹ Bu mra lăp tâm trôm yôk lŭ Jêh ri tâm trôm ntu tâm dâng neh Gay der nau krit kir bơh Brah Yêhôva Jêh ri nau ral ang bơh nau rnam chrêk rmah Păng, Lah Păng dâk ƀư mpât n'gơ neh ntu.

²⁰ Tâm nar nây, bu mra klŭp lơi Ma đe, ma rêt Lĕ rup brah ƀư ma prăk, ma mah, Jêng ndơ khân păng hŏ ƀư gay ma yơk mbah.

²¹ Khân păng mra lăp tâm trôm lŭ Jêh ri tâm ntŭk ntu lŭng tâm lŭ, Gay der nau krit kir bơh Brah Yêhôva Jêh ri nau ral bơh rnam Păng, Lah păng dâk ƀư n'gơ neh ntu.

²² Lơi hôm rnơm ma kon bunuyh ôh Jêng phung geh n'hâm nsôr tâm trôm muh, Yorlah khân păng mâu geh rnoh khlay ôh?