Êphêsô 5 - Nau Brah Ndu Ngơi 2023

Gŭ rêh tâm nau ang

¹ Pôri, ăn khân may plơ̆ jêng phung bunuyh tĭng kơt Brah Ndu nâm bu phung kon Păng rŏng ngăn ngên.

² Hăn hom tâm nau rŏng nâm bu Brah Krist rŏng jêh ma he, Păng jao săk jăn Păng yor he, nâm bu du ndơ nhhơr jêh ri mpa ƀư brah n'hôl ƀâu kah nhhơr ma Brah Ndu.

³ Bi nau văng tĭr jêh ri lĕ nau mâu kloh ueh, mâu lah nau kơnh rlau keh, lơi dĭng ngơi ta nklang khân may; pôri mơ tâm di jêng phung kloh ueh.

⁴ Lơi ngơi lĕ nau ngơi bir ôh, ngơi lă lêng, ngơi nau nkhơng, jêng lĕ nau nây mâu tâm di; ueh lơn ăn khân may nhhơr nau lah ueh ma Brah Ndu.

⁵ Ăn khân may gĭt rah vah ma phung bunuyh văng tĭr, mâu kloh ueh, mâu lah kơnh rlau keh — kơnh rlau keh jêng mbah rup brah — mâu geh du huê dơi dơn drăp ndơn tâm ƀon bri hađăch Brah Krist jêh ri Brah Ndu ôh.

⁶ Lơi ăn bu ndơm khân may ma nau mâu khlay ôh; yor bơh nau nây yơh nau Brah Ndu ji nuih nkhŭt tŭp ta noi deh mâu tông bâr.

⁷ Yor ri, lơi tâm rnglăp đah khân păng.

⁸ Kăl e ri khân may jêng nau ngo, ƀiălah aƀaơ tâm Kôranh Brah, khân may jêng nau ang. Chuat hăn hom tâm ban ma phung kon nau ang;

⁹ yorlah play nau ang jêng lĕ nau ueh, nau sŏng srăng jêh ri nau nanê̆ ngăn.

¹⁰ Sek uănh hom moh nau ƀư maak nuih n'hâm Kôranh Brah.

¹¹ Lơi pah ndrel ôh lĕ nau kan mâu khlay bơh nau ngo; ueh lơn, ăn khân may nduyh khân păng;

¹² yorlah nđâp tơlah knŏng ngơi ma lĕ nau khân păng ƀư tâm nau ndâp jêng đit prêng jêh.

¹³ Ƀiălah lĕ rngôch nau nduyh nây tâm mpơl jêh tâm dâng nau ang dơi ang rah vah; yorlah lĕ rngôch nau tâm mpơl jêh jêng ang da dê.

¹⁴ Yor nây, geh nau lah pô aơ: “Hơi nơm dôl bê̆ch, kah rngăl hom, Dâk hom may tă bơh nklang phung bunuyh khĭt, Ri mơ Brah Krist mra nchrat ang may.”

¹⁵ Pôri, sek uănh njrăng hom ma nau khân may gŭ rêh, lơi gŭ rêh nâm bu phung rluk mâl, ƀiălah gŭ rêh nâm bu phung blau mĭn.

¹⁶ Blau dŏng hom mông nar, yorlah lĕ nar jêng mhĭk.

¹⁷ Yor nây, lơi plơ̆ jêng nâm bu phung rluk mâl ôh, ƀiălah ăn khân may gĭt vât ra vah moh nau mĭn Kôranh Brah ŭch.

¹⁸ Lơi nhŭl ndrănh ôh, yorlah ndrănh njŭn leo nau blă blơ, ƀiălah ăn khân may bêng ma Brah Huêng Ueh.

¹⁹ Ăn khân may dŏng nau mprơ ơm, samƀŭt nau mprơ, jêh ri lĕ nau mprơ tâm pă uănh; mprơ, tâm rnê hom ma Kôranh Brah ma lĕ nuih n'hâm.

²⁰ Tâm lĕ nau kan, tâm amoh hom Kôranh Brah he Yêsu Krist ƀaƀơ gay nhhơr nau lah ueh ma Brah Ndu, jêng Mbơ̆.

Nau kan ur sai

²¹ Yor klach yơk ma Brah Krist, tâm tông hom ndrăng nơm.

²² Hơi phung jêng ur, tông hom ma sai nâm bu tông ma Kôranh Brah yơh.

²³ Yorlah sai jêng bôk ma ur păng, tâm ban ma Brah Krist jêng bôk ma Phung Ngih Brah Ndu, Phung ngih Brah Ndu jêng săk jăn Păng jêh ri Păng yơh jêng Nơm Tâm Rklaih ma Phung Ngih Brah Ndu.

²⁴ Pônây, tâm ban ma nau Phung Ngih Brah Ndu tông ma Brah Krist, ăn ur tông ma sai tâm lĕ ndơ tâm ban lĕ.

²⁵ Hơi phung sai, rŏng hom ma ur khân may nơm nâm bu Brah Krist rŏng jêh ma Phung Ngih Brah Ndu, jao săk jăn yor Phung Ngih Brah Ndu,

²⁶ gay ƀư kloh ueh Phung Ngih Brah Ndu jêh dŏng dak jêh ri nau ngơi Păng ƀư kloh Phung Ngih Brah Ndu,

²⁷ gay tâm mpơl măt ta năp Păng du Phung Ngih Brah Ndu chrêk rmah, mâu têl, mâu nsŭn, mâu geh ndơ tâm ban pônây ôh, ƀiălah kloh ueh jêh ri dŭt ueh ngăn.

²⁸ Pônây lĕ, ăn phung sai rŏng ma ur nâm bu rŏng ma săk jăn păng nơm lĕ. Mbu nơm rŏng ma ur jêng rŏng ma păng nơm lĕ.

²⁹ Yorlah mâu mâp geh ôh du huê bunuyh tâm rmot êng ma săk păng nơm, ƀiălah mât siăm, mât mray păng tâm ban ma Brah Krist đah Phung Ngih Brah Ndu,

³⁰ yorlah he jêng lĕ kô̆ săk jăn tâm nglay săk Păng.

³¹ Yor nau nây, “bu klâu mra chalơi mê̆ mbơ̆ păng jêh ri gŭ ndrel đah ur păng, jêh ri lĕ bar hê khân păng jêng du nglay săk.”

³² Nau khlay ndâp aơ jru ngăn, gâp ŭch lah ma Brah Krist jêh ri Phung Ngih Brah Ndu.

³³ Pônây ăn ăp nơm tâm khân may rŏng ma ur păng nơm nâm bu rŏng ma păng nơm, jêh ri ăn ur yơk ma sai păng.