Daniel 4 - Nau Brah Ndu Ngơi 2023

¹ Hađăch Nêbukatnetsar njuăl ma lĕ rngôch phung ƀon lan, phung bri dak, lĕ nau ngơi tâm lam neh ntu: “Nau ueh khân may geh nau đăp mpăn âk râk!

² Gâp maak ngăn dơi tâm mpơl ăn ma khân may lĕ nau mbên khlay ngăn Brah Ndu Dŭt Klơ Lơn ƀư jêh ma gâp.

³ Ơ! Lĕ nau mbên klay Păng toyh ngăn ngên, Lĕ nau khlay Păng mâu blau ntĭt ôh! Ƀon bri hađăch Păng jêng ƀon bri hađăch n'ho ro, Nau Păng chiă uănh gŭ tâm lĕ rngôch rnôk.”

Nau mbơi tal bar Y-Nêbukatnetsar

⁴ Gâp, Y-Nêbukatnetsar, dôl gŭ mleh rmên tâm ngih hađăch gâp, kan tâm ngih hađăch gâp hao jêng,

⁵ pôri gâp saơ du ntil nau mbơi ƀư nkrit gâp. Lĕ nau mĭn mhĭk ngăn ta klơ sưng bê̆ch jêh ri lĕ rup tâm bôk ƀư ma gâp mâu đăp gŭ.

⁶ Yor nây, gâp ntăm ăn kuăl rgum lĕ rngôch phung blau mĭn tâm n'gor Babilôn văch tanăp gâp gay ma khân păng rblang nau mbơi nây ma gâp.

⁷ Phung rƀên, phung n'hŭm, phung Kaldê, jêh ri phung nchrâng mănh tât. Gâp nkoch nau mbơi ăn ma khân păng iăt, ƀiălah khân păng mâu dơi rblang nau mbơi nây ma gâp ôh.

⁸ Kêng nglĕ dŭt geh Y-Daniel, rnha jêng Y-Beltisasar tĭng nâm amoh brah gâp, hăn lăp tanăp gâp. Păng geh huêng brah Brah Ndu kloh ueh gŭ ndrel păng. Gâp nkoch nau mbơi gâp ăn ma păng:

⁹ “Ơ, Y-Beltisasar, kôranh toyh ma phung rƀên, gâp gĭt huêng brah Brah Ndu kloh ueh gŭ tâm may jêh ri mâu geh du nau ndâp jêng jêr ir ôh ma may, pôri mbơh hom ma gâp lĕ nau tâm saơ gâp saơ jêh tâm nau mbơi jêh ri nau khlay păng.

¹⁰ Aơ jêng nau gâp tâm saơ mpơl tâm bôk gâp dôl gâp lâng săk ta klơ sưng bê̆ch: Aơ, gâp saơ geh du mlâm tơm si hon ta nklang neh ntu; Du mlâm tơm si toyh prêh êng ngăn.

¹¹ Tơm si nây văch ma toyh jêh ri nâp; Chiông tơm si nây tât trôk Jêh ri lam neh ntu dơi saơ da dê.

¹² N'ha ueh, play âk, Ăn ndơ sa tŏng ma lĕ rngôch ntil. Mpô mpa bri nde tâm dâng gui păng; Sĭm tâm trôk drâm klơ n'gĭng păng, Jêh ri lĕ rngôch mpa rêh yor bơh păng siăm da dê.

¹³ Tâm lĕ rup mpơl tâm bôk gâp dôl lâng săk ta klơ sưng bê̆ch, gâp saơ geh du huê nơm gak njrăng, nơm kloh ueh jŭr tă bơh trôk.

¹⁴ Nơm nây nter huy pô aơ: ‘Kăl lơi tơm si jêh ri koh lơi n'gĭng păng; Rgu lĕ rngôch n'ha jêh ri srih play păng ăp ntŭk; Ƀư ăn mpô mpa bri du ngai tă bơh tâm dâng păng Jêh ri sĭm och du tă bơh n'gĭng păng;

¹⁵ Ƀiălah ăn om tơm jêh ri reh păng ta neh ntu, Sŏk rse rvăk loih jêh ri kông kât lơi păng Ta nklang gơ̆ nđĭr tâm mir. Ăn păng bĕ ma dak ngom bơh klơ trôk Jêh ri tâm pă ndrêch gơ̆ tâm dâng neh ma mpô mpa bri!

¹⁶ Ăn tâm rgâl lơi nau mĭn păng Tă bơh nau mĭn bunuyh jêng nau mĭn mpô mpa bri, Jêh ri ăn păng nâm pônây dôl tâm pơh năng.

¹⁷ Dôih nây luh tă bơh phung gak, Jêh ri nau ntăm aơ luh tă bơh nau nơm kloh ueh, Gay lĕ rngôch bunuyh dơi gĭt Nơm Dŭt Prêh Klơ chiă uănh ƀon bri hađăch kon bunuyh; Păng ăn ma mbu nơm păng ŭch Jêh ri mra n'hao bunuyh jê̆ lĕ lơn ăn chiă uănh.’

¹⁸ Nây jêng mbơi gâp, hađăch Nêbukatnetsar, saơ jêh. Bi may, Y-Beltisasar, mbơh hom ma gâp gĭt nau rblang, yorlah lĕ rngôch phung blau mĭn tâm ƀon bri hađăch gâp mâu dơi rblang ôh ma gâp, ƀiălah may dơi, yorlah huêng brah Brah Ndu kloh ueh gŭ tâm may.”

¹⁹ Rnôk nây, Y-Daniel, ăt rnha Y-Beltisasar, mâu dơi ngơi tâm ƀât lât. Lĕ nau mĭn ƀư ma păng rŭng răng. Hađăch lah: “Hơi Y-Beltisasar, lơi ăn nau mbơi jêh ri nau rblang ƀư rŭng may ôh.” Y-Beltisasar plơ̆ lah: “Ơ kôranh gâp, ăn nau mbơi aơ tât ma phung tâm rmot ma may, jêh ri nau rblang prăp ma phung rlăng đah may!

²⁰ Tơm si may saơ nây plơ̆ jêng ma toyh jêh ri nâp ktang, chiông păng pah tât trôk jêh ri lam neh ntu saơ da dê,

²¹ n'ha ueh jêh ri play âk, ăn ndơ sa tŏng ma lĕ rngôch ntil; mpô mpa bri văch gŭ nde tâm dâng gui păng, lĕ ntil sĭm tâm trôk ƀư rsuăn klơ n'gĭng păng.

²² Ơ hađăch, tơm si nây jêng may yơh. Hađăch hŏ jêng toyh ktang jêh ri ndrŏng kuăng; nau dŭt prêh may n'hao tât ta klơ trôk, nau may dơi chiă uănh lăk dĭ tât ta nglĕ dŭt rplay neh.

²³ Kêng nây, hađăch saơ du huê nơm gak, jêng nơm kloh ueh jŭr tă bơh trôk jêh ri lah: ‘Kăl lơi tơm si jêh ri ƀư rai lơi păng, ƀiălah cha lat tơm reh păng tâm neh, jêh nây sŏk du mlâm rse rvăk loih jêh ri kông kât ta nklang gơ̆ nđĭr tâm mir, ăn păng bĕ ma dak ngom bơh trôk jêh ri tâm pă đah lĕ mpô mpa bri, kŏ tât tâm pơh gưl yan rgăn ta păng.’

²⁴ Ơ hađăch, aơ jêng nau rblang jêh ri jêng nau dôih bơh Nơm Dŭt Prêh ntăm mra tât ma hađăch jêng kôranh gâp:

²⁵ Bu mra nsot may tă bơh kon bunuyh jêh ri may mra gŭ ndrel mpô mpa bri tâm ndrêch. Bu mra ăn may sa gơ̆ nâm bu ndrôk jêh ri mra bĕ ma dak ngom bơh trôk; pơh gưl yan mra rgăn ta hađăch kŏ tât hađăch gĭt pô aơ Nơm Dŭt Prêh chiă uănh ƀon bri hađăch kon bunuyh jêh ri Păng ăn ma mbu nơm tĭng nau mĭn Păng ŭch.

²⁶ Bi nau ntăm ăn cha lat tơm reh tơm si nây geh nau khlay jêng ƀon bri hađăch may mra dơi njêng tay ma may tơlah may gĭt năl Nơm chiă uănh lĕ ndâr trôk.

²⁷ Yor nây, ơ hađăch, ăn may dơn nau gâp sâm nchră, chalơi hom nau tih ƀư ma nau sŏng srăng, ƀư nau yô̆ ma phung o ach gay chuai lĕ nau mhĭk may ƀư. Pônây, rnôk chiă uănh geh nau đăp mpăn dơi ntop jong jŏ lơn.”

²⁸ Lĕ rngôch nau nây geh tât ma hađăch Nêbukatnetsar da dê.

²⁹ Jât ma bar khay pakơi, dôl păng hăn nsong ta klơ bôk phok ngih hađăch ƀon Babilôn,

³⁰ hađăch lah: “Mâu di hĕ aơ ƀon Babilôn dŭt toyh gâp nơm rdâk jêh ƀư ƀon hađăch ma nau dơi dŭt prêh gâp tâm rnê ma nau chrêk rmah chrat ang ma gâp ta nây lĕ?”

³¹ Nau hađăch ngơi ê hŏ dŭt tă bơh trôm mbung pônây geh bâr ngơi bơh trôk lah: “Hơi Y-Nêbukatnetsar, aơ jêng nau mbơh ăn ma may gĭt: Ƀon bri hađăch du jêh tă bơh may.

³² Bu mra nsot may tă bơh ta nklang phung bunuyh jêh ri gŭ ndrel ma mpô mpa bri. Bu mra ăn may sa gơ̆ nâm bu ndrôk jêh ri lăn tâm pơh gưl kŏ may gĭt rbăng pô aơ Nơm Dŭt Prêh chiă uănh tâm ƀon bri hađăch kon bunuyh jêh ri ăn ma bu tĭng nau Păng nơm ŭch.”

³³ Rnôk nây ro, nau ngơi nây tât di ngăn ma hađăch Nêbukatnetsar. Bu nsot păng tă bơh tâm nklang kon bunuyh, sa gơ̆ tâm ban ma ndrôk; săk jăn păng bĕ dak ngom bơh trôk kŏ tât nôk sŏk păng hon tâm ban ma rsau klang ƀŭng, nheh jâng nheh ti tâm ban ma nheh sĭm.

³⁴ Tơlah lôch jêh nar nây, gâp, Y-Nêbukatnetsar, n'gơr măt ta klơ trôk, nau gĭt rbăng plơ̆ sĭt tay, gâp tâm rnê lah ueh ma Nơm Dŭt Prêh. Gâp mprơ tâm rnê jêh ri mât ton Nơm Rêh N'ho Ro. Nau dơi Păng chiă uănh jêng nau dơi n'ho ro, Ƀon bri hađăch Păng ntơm bơh rnôk aơ tât rnôk ri.

³⁵ Lĕ rngôch bunuyh gŭ ta neh ntu jêng tâm ban ma dơm dam. Păng ƀư tĭng nâm nau Păng ŭch da dê ma lĕ manh tâm trôk Nđâp ma phung bunuyh gŭ ta neh ntu. Mâu geh du huê dơi nkân ti Păng Mâu lah ôp: “Moh nau May ƀư?”

³⁶ Mông nây nau gĭt rbăng gâp plơ̆ sĭt tay. Gâp joi geh tay nau chrêk rmah ma ƀon bri hađăch gâp, nau rnam jêh ri nau chrêk rmah sĭt tay ma gâp. Phung kôranh tâm nchră jêh ri phung kôranh toyh văch tanăp gâp da dê. Dơi ndâk tay gâp chiă uănh tâm ƀon bri hađăch jêh ri ntop đŏng ma gâp jêng toyh lơn ntơm saơm.

³⁷ Aƀaơ aơ, gâp, Y-Nêbukatnetsar mprơ tâm rnê, mât ton jêh ri yơk ma hađăch tâm Trôk Yorlah lĕ nau kan Păng jêng nanê̆ ngăn da dê Jêh ri lĕ trong Păng jêng sŏng da dê. Mbu nơm hăn tâm nau sưr Păng mra ntrŭnh.