Apdia 1 - Nau Brah Ndu Ngơi 2023

Bu n'glưh lơi Êđôm yor nau sưr

¹ Nau Y-Apdia tâm saơ. Kôranh Brah Yêhôva lah ma bri Êđôm: He lĕ tăng nau mbơh tă bơh Brah Yêhôva Jêh ri bu prơh hăn du huê nơm mbơh tât ta nklang lĕ bri dak: “Dâk hom khân may! Dâk hom he tâm lơh đah păng!

² Aơ, Gâp hŏ ƀư jêh ma may jêng jê̆ lê̆ ta nklang lĕ rngôch bri dak. Bu mra tâm rmot may hâu ngăn.

³ Nau sưr tă bơh nuih n'hâm may hŏ ndơm may nơm. May jêng nơm gŭ tâm trôm lŭ, Gŭ rêh tâm ntŭk prêh; May lah êng tâm nuih n'hâm may pô aơ: ‘Mbu dơi nklơ̆ gâp tŭp ta neh?’

⁴ Nđâp lah may mpăr prêh nâm bu klang, Nđâp lah may ƀư rsuăn ta nklang phung mănh Gâp mra nklơ̆ may tŭp tă bơh ntŭk nây,” Brah Yêhôva lah pônây!

Bu mra plơng nau mhĭk Êđôm

⁵ Bu mra ƀư rai yơh may! Tơlah phung ntŭng mâu lah bunuyh pit ndô ndơ tât ta jây may kêng măng, Di lĕ khân păng knŏng ntŭng man tŏng dơm lah? Tơlah phung pĕ play krăk ƀâu văch ma may, Di lĕ khân păng om klen bar pe rkŭm play krăk ƀâu dơm lah?

⁶ Mâm nau bu mra joi rhi Y-Êsau! Nâm lĕ ndô ndơ khlay păng pôn bu mra rhi uănh!

⁷ Lĕ rngôch phung tâm rnglăp đah may hŏ mprơh may tât ta n'har bri. Phung mĭt jiăng may ndơm may nơm jêh ri tŭn jot may; Bi phung sa ƀănh may ƀư dăk sân may nơm Ƀiălah mâu gĭt đê̆ ro.

⁸ Brah Yêhôva lah: “Mâu di hĕ tâm nar nây Gâp mra ƀư rai lĕ phung blau mĭn bơh bri Êđôm, Jêh ri phung gĭt rbăng du bơh yôk Êsau?

⁹ Hơi bri Têman, phung tahan may mra uh ah; Bu mra nkhĭt jêh ri ƀư rai lĕ rngôch bunuyh tă bơh yôk Êsau.

Êđôm ƀư mhĭk ma oh nâu păng

¹⁰ Yor nau djơh mhĭk may hŏ ƀư jêh ma oh nâu may Y-Yakôb Nau prêng mra nkŭm may jêh ri bu mra ƀư rai may ƀaƀơ n'ho ro!

¹¹ Ta nar may dâk uănh phung rlăng sŏk pit drăp ndơ păng Phung bu năch lăp tŭn jot tâm mpông ƀon păng Jêh ri ƀư nau tâm nchroh tâm pă ƀon Yêrusalem May jêng nâm bu du huê tâm phung khân păng.

¹² Di lah, may lơi troh gơm uănh oh nâu may Tâm nar păng geh nau rêh ri; Lơi ta răm maak Ta nar bu ƀư khĭt oh kon Yuđa; Lơi dĭng ngơi hưn Ta nar păng dơn rêh ni.

¹³ May mâu dơi lăp ôh tâm mpông ƀon phung ƀon lan Gâp Tâm nar khân păng geh nau tât; Uănh păng mâp rêh ni lơi dĭng rhơn, Tâm nar păng dơn jâk jêr; Lơi ta ntŭng ôh drăp ndơ păng tâm nar păng geh nau tât.

¹⁴ May lơi ta gŭ ta rdjŭm nglah trong Gay nkhĭt phung khân păng nchuăt du; Jêh ri nhŭp jao phung păng hôm rêh. Tâm nar păng mâp nau uh ah.

¹⁵ Yorlah nar Brah Yêhôva hŏ dăch tât jêh ma lĕ rngôch bri dak. Aƀaơ, bu mra ƀư ma may di nâm bu may hŏ tă ƀư; Lĕ nau kan may ƀư mra nkhŭt tay ta bôk may nơm.

¹⁶ Di ngăn, mâm nau khân may hŏ nhêt jêh ta yôk kloh ueh Gâp Pôri lĕ rngôch bri dak mra nhêt kơt nây; Di ngăn, khân păng mra nhêt jêh ri rvăn ro Jêh nây khân păng mra tâm ban ma ê hŏ mâp geh ôh!

Nau dơi nglĕ dŭt ma phung Israel

¹⁷ Ƀiălah mra geh phung hôm klaih gŭ ta yôk Siôn; Yôk nây mra jêng kloh ueh Jêh ri ngih Yakôb mra dơn drăp ndơn khân păng nơm.

¹⁸ Ngih Yakôb mra jêng ŭnh Jêh ri ngih Yôsep mra jêng mpiăt ŭnh; Ngih Êsau mra jêng mbŭch rhe Khân păng mra su jêh ri ŭnh sa. Ngih Êsau mâu hôm geh nơm mra rêh” Yorlah Brah Yêhôva hŏ lah jêh nau nây.

¹⁹ Phung gŭ ta Nêgep mra ndơn yôk Êsau; Phung gŭ ta Sơphêla mra ndơn neh phung Philistin, Khân păng mra ndơn mir phung Êphraim jêh ri mir phung Samari; Phung Benjamin mra ndơn neh Gilêat.

²⁰ Phung tâm phung ƀon lan Israel gŭ ta nklang phung Kanaan Mra pit in neh kŏ tât ta Sarepta. Phung tă bơh Yêrusalem hŏ jêng bu nă tâm bri Sêpharat Mra ndơn lĕ ƀon toyh ta Nêgep.

²¹ Phung geh nau rklaih jêh mra hao ta yôk Siôn gay phat dôih yôk Êsau; Bi ƀon bri hađăch mra jêng ndơ Brah Yêhôva.