2 Timoteo 2 - Manityanati Tupax

Axti naki takisɨrɨ aɨbu narukux ɨmoti

¹ Axɨkɨ isaɨ, aiña nuxia ui noñemaxti Tupax axɨna tusiankana asukarɨkɨ ta tyonenti Cristo Jesús.

² Axɨna onkoi nisura sukarɨ sɨrɨmanama makiataka, nanaiña axɨba aityoximiasio mekuma axɨbama uxia nisɨborikixhimia axɨbamaintyo ipiakama anunekama ɨmo makiataka.

³ Asusiu natakisɨrɨkɨ takanati naki sortabox ipiakati nuxia okɨmati tyakuti Jesucristo.

⁴ Axti naki sortabox baserebioti champɨ nɨmoche uiti nisɨborikixhimia makiataka, nauki uxia nastaxti ɨmoti naki ɨriatuxti.

⁵ Sanentityo naki sɨrotitɨ ɨmo kupiukux champɨ iyebo uiti axtɨ isamutenti isiuki nixhankaxti.

⁶ Axti naki masamunuti ñanaunx, tari kusɨrɨboti atoxi ɨmoti aruki axɨna iyebo auki niyoxti.

⁷ Akionsɨ nuxia ɨmo axɨna sukanañɨ aemo, tyopiki axti Yɨriabux Jesús uiti ñana nanaiña iyebo obi.

⁸ Akionsɨ ɨmoti Jesucristo, aɨtoxti yɨriabux David naki sɨboriko tato axɨpekuki makoiñoka, takana axɨba omixhia manityakax xhanunekaka.

⁹ Yotopiki axɨba omixhia manityakax yaka aɨbu nichakisɨrɨkɨ, yaka ichomoenka ui karenax takanati yatabayox. Tapɨ axɨna nuraxti Tupax chɨtomoenopɨ ui karenax.

¹⁰ Sane naukiche chubatapɨ iñemo nichakisɨrɨkɨ tyopiki namanaiña axɨbama takɨmanaunkunuma uiti Tupax, nauki ataesɨbumaintyo eanaki nomɨnantɨ nauki aye uimia axɨna nanentax esati Tupax.

¹¹ Ñemanaunkuxatoe axɨna sane: Axtɨ okonka chepeti osɨborikiaityo tato ñana chepeti.

¹² Axtɨ utakisɨrɨka aɨbu narukux oemo, iyebo ñana osoi kauta nakaxti. Axtɨ chuxiankapɨ basuriuruti, axtityo chiyasuriurutipɨ oñɨ ñana.

¹³ Axtɨ chɨkuasɨrɨtipɨ oemo, axoñɨ ukuasɨrɨka ɨmoti, tyopiki chɨmapañantipɨ ɨmotiatoe.

Amén nisɨborikixhti Timoteo

¹⁴ Urasoi sukarɨ makiataka axɨna sane, aikuansomokosoma sukarɨti Tupax tapɨ asioma uratokiakama. Tyopiki champɨ nanenekiche axɨmanu nuratokikixhimia. Uixh mameso ñapanaunkuxɨma axɨbama onsapetioma.

¹⁵ Aiña nuxia narukux aemo nauki uxia nasɨboriki au nastaxti Tupax, takanati naki ane yachɨkoiti champɨ ñɨnanache akɨsoti, naki uxia ñanunekakaxti axɨba ñemanauntu omixhia manityakax.

¹⁶ Tapɨ anityaka axɨba chomixhampɨ, tyopiki axɨbama manityanama axɨba chomixhampɨ, isiu nomeki naneneka isamutema axɨba nomɨnantɨ

¹⁷ tapɨ axɨna ñanunekakaxɨma sɨrotɨ au nanaiña takana noxokox champɨ nubatax ɨmo. Sane axɨna isamutenti Himeneo chepeti Fileto,

¹⁸ sɨroma pese pɨnanaki axɨna ñemanauntu namatɨ ta tosɨborikia tato, aboma axɨbama chɨmastakaxɨpɨ ñakokonaunkuxɨma uimia.

¹⁹ Tapɨti Tupax sɨro uiti axɨna nityɨmox uixh chɨtaɨbɨkopɨ, axɨna kauta korobo: “Tusiu ɨmoti Yɨriabux Jesús ñakusanema axɨbama ikokoromati”, namanañaintyo axɨbama iñanuantama nɨrixhti apiñasaño pese pɨnanaki nomɨnantɨ.

²⁰ Au taman pox sɨrɨmanax, chɨtamantaipɨ nenaxixh axɨba omixhantai omixhante ui oro chepe plata, abetyo nenaxixh axɨba chomixhampɨpae axɨba omixhante ui taux chepe soes. Abe axɨba ɨmo nanenekatai, pikiataka ɨmo axtɨ ane pukɨnunkux.

²¹ Axtɨ aiñokokio nanaiña axɨba nomɨnantɨ, tyone nasɨboriki takana axɨmanio nenaxi pox omixhantai omixhante ui oro chepe plata, axɨna kunusɨankana ɨmoti Tupax, axɨna baserebio ɨmo nanaiñantai axɨna uxia.

²² Tapɨ aisamute nanaiñantai nixhantɨmoma mayaɨka, apachesio tyone axɨna uixia mapanaunkux, makokonaunkux, makumananaunkux taikianaintyo uxia obi ɨmo makiataka, chepema axɨbama manaunuma aɨbu kicheseña nausasɨxɨma ɨmoti Yɨriabux Jesús.

²³ Tapɨ ane nɨmoche obi nuratokikixhimia axɨna champɨ nanenekiche. Tɨtusiu aemo tyone iñatai tyakɨru aɨbu chɨrɨri.

²⁴ Axti naki baserebioti ɨmoti Tupax, chuxiampɨ asioti kuata chɨrɨri. Tari makumananaunxti aɨbu namanaiña. Tari aipiati anunekati, tapɨ bapatayotiatai aɨbu makiataka

²⁵ tari masamunaunxti akuansomokoti ɨmoma axɨbama taruku nomɨnantɨ uimia, tari ui noñemaxti Tupax aiñoxonkonomakɨ nauki asuputaraimia axɨna ñemanauntu

²⁶ sane añekama ui nimetoxti chobores kauta aboma amanama nauki aisamunenti aɨbuma axɨna nixhantɨmoti.