2 Tesalonicenses 3 - Manityanati Tupax

Bakɨpukux nauki eama

¹ Au nityakɨrux masarukityaiki, amea suichaku, nauki sopiñanai au nanaiña yupu axɨba omixhia nuraxti Yɨriabux Jesús, nauki makiataka asuriuma aɨbu nipukɨnunkuxɨma, sane takana apisamute axaño.

² Apankityo pɨnanakiti Tupax tari asaratitɨ suichaku ñɨnanama axɨbama chuxiampɨ nisɨborikixhimia, tyopiki chɨnamanaiñampɨ ikokoromati Cristo.

³ Axti Yɨriabux Jesucristo ñemanauntu nuraxti, ui noñemaxti sɨsio año aɨbu napakokonaunku okɨmanatityo autaku pɨnanaki nomɨnantɨ.

⁴ Axɨsomɨ somonkatɨ ɨmoti Yɨriabux Jesús tusiu suiñemo ta axaño apisamute axɨna supakɨpuka aume.

⁵ Tari ui noñemaxti Yɨriabux Jesús apakumananaunka ɨmo makiataka takanati Tupax makumananaunxti ɨmo namanaiña, tari aruku nuxia aume axtɨ autakisɨrɨka takana narukux ɨmoti Cristo.

Tari namanaiña ane apachɨkoboibo

⁶ Masarukityaiki supakɨpuka aume au nɨrixhti Yɨriabux Jesucristo, nauki apiñanaño pese pɨnanaki axɨbama usarukityaiki chuxiampɨ nisɨborikixhimia, axɨbama chixhanxɨpɨma aisamunema nisɨborikixhimia isiuki axɨna supanunekaka aume.

⁷ Axaño tusiu aume kausane apisamune nausɨboriki isiuki suisɨboriki: axɨsomɨ sopisamute axɨna uxia suisɨboriki abaxɨpeku,

⁸ champɨityo tɨsubaka axɨna toxiatai suiñemo. Ta supapacheka supachɨkoboibo au sapes autyo tobixh, tapɨ apasapakasomɨantai champɨ ityoboche.

⁹ Ñemanauntu ane tyopikiche supanki amopɨnanaki nauki apakumana suiñemo, tapɨ axɨsomɨ ane supachɨkoi nauki ane sumutuburibo saneityo axaño apisamuse.

¹⁰ Naukiche amonkosomɨ abaxɨpeku, sukanasomɨ aume axti naki chixhanxtipɨ ane yachɨkoiti tapɨ apasapakati.

¹¹ Sopipiate ta aboma abaxɨpeku axɨbama chixhanxɨpɨma ane niyachɨkoimia, naneneka champɨ niyachɨkoimia.

¹² Ɨmoma axɨmanuma sane nisɨborikixhimia supakɨpuka ɨmoma au nɨrixhti Yɨriabux Jesucristo, tari yapacherama yachɨkoboiboma nauki aye uimia utuburiboma.

¹³ Tapɨ axaño masarukityaiki, tapɨ tochenko aboi napasamuku axɨna uxia.

¹⁴ Axtɨ anati naki chixhanxtipɨ aikokoti axɨna supakɨpuku iku axɨna korobo soboi, amasasai nuxia ñakuti tapɨ apiyoberabakaño chepeti nauki akɨsoti.

¹⁵ Tapɨ autɨborikiatai ɨmoti, ta apikuansomokosoxti takanati aubaruki.

Tyakɨrux makionkox

¹⁶ Tari axti naki Yɨriabux uxia uiti taikiana uxia uiti aume, au nanaiña nausɨboriki, tari sɨsioti Yɨriabux abaxɨpeku.

¹⁷ Axɨñɨ Pablo, nixhakionko tanu aume ui nixhakonomosoatoe. Sane ikonomota nisɨri iku nanaiña axɨba nixhakonomoso. Tyone axɨna nixhakonomoso.

¹⁸ Axɨna nixhanka ta nauki axti Yɨriabux Jesucristo apukɨruti akumananaunti ɨmo namanaiña axaño.