2 Juan 1 - Manityanati Tupax

Makionkox

¹ Axti yɨriabux naki asaratitɨ tyakuma axɨbama samamekanama uiti Tupax axɨbama ikokoromati Jesús. Ñemanauntu aukuasɨrɨka iñemo, chaxɨpɨñɨantai, namanaiñaintyo axɨbama isuputakaimia axɨna ñemanauntu.

² Aukuasɨrɨka iñemo tyopiki axɨna ñemanauntu ane au nuyausasɨ axɨna sɨsio usaɨbu ɨmo nanaiña naskɨbeka.

³ Tari axti Tupax naki Uyaɨ, axtityo Jesucristo, Aɨtoxti naki Uyaɨ, aukurusɨka uimia apukɨruma autaku tari ui nipukɨruxɨma autaku ñemanauntu napakumananaunku.

Bakɨpukux ɨmo makumananaunkux

⁴ Taruku nipukɨnunku tyopiki aboma axɨbama isuñukama abaxɨpekuki isamutema nisɨborikixhimia isiuki axɨna ñemanauntu, takana yakɨpukuxti oemo Tupax naki Uyaɨ.

⁵ Kaɨma xhankikia amopɨnanaki masarukityaiki nauki ukuasɨrɨ oemoantoe. Axɨna xhakonomoka aume axɨna bakɨpukux chaɨboataipɨ, ta tyoneantoe axɨmanu toxio oemo naukiche uikokoroti Cristo.

⁶ Axɨna makumananaunkux tyone axɨna axtɨ uisamute axɨba yakɨpukuxti Tupax oemo, axɨmanu bakɨpukux, tɨtusiu aume aukiapae maɨbo, ta nauki apisamune nausɨboriki aɨbu napakumananaunku.

⁷ Iku axɨna kɨx aboma sɨrɨmanama axɨbama matachemakanama ɨmo makiataka, chikokotapɨma ta axti Cristo kuatati iku kɨx takana nakaxti ñoñɨnx. Axti naki sane nisɨborikixhti tyonenti naki ñatachemakax chuxiampɨ uiti ɨmoti Cristo.

⁸ Amasasai nuxia, tapɨ munatai nanaiña axɨna supachɨkoi autaku, ta nauki ane ñana toxiobo ityobo aume.

⁹ Axti naki xhanxti aiñanti pese ñanunekakaxti Cristo, champɨti Tupax chepeti. Tapɨti naki sɨsioti aɨbu axɨmanu ñanunekakaxti, anati chepeti Yaɨtoti chepetityo Aɨtoxti.

¹⁰ Axtɨ anati naki sɨrotitɨ asarati año chɨmanunekanatipɨ aume axɨna sane, tapɨ apasukiukati au naupo tapɨ apankikia ɨmoti.

¹¹ Tyopiki axtɨ apankikia nuxia ɨmoti apisamutentyo axɨba chomixhampɨ isamutenti.

Tyakɨrux makionkox

¹² Abiki sɨrɨmana surapoboibo ausukarɨ, ta chixhankapɨ sukanañɨ aume ikuki nikorox. Ixhanka yɨrotɨ tanu yasaraño nauki xhanitya aupu. Sane uixh taruku nipukɨnunku.

¹³ Axɨbama ikokoromati Jesús auna kauta yaka axɨbama samamekanaintyo uiti Tupax, apasusiutyo ñakionkoxɨma tanu aume.