2 Corintios 8 - Manityanati Tupax

Isane nɨmoche makumanatax

¹ Sane masarukityaiki, suixhanka suburaboi ausukarɨ kausane atusianka axɨna nipukɨruxti Tupax axɨpekuma axɨbama ikokoromati Jesús au Macedonia.

² Axɨpekuki nautakisɨrɨkɨ ui axɨmanu makokotox aume, taruku naupukɨnunku. Axɨna champɨ namenaxi, sɨrɨmana napakumanata takana axtɨ tarukapae namenaxi.

³ Axɨñɨ tusiu iñemo axaño apakumanaka ta'aiki pɨrɨkɨ axɨna ane aboi. Auki namoñemantoe

⁴ amukanaño suiñemo nauki chebo soboi supakumanaintyo ɨmoma axɨbama ikokoromati Tupax.

⁵ Apakumanaka ta'aiki pɨrɨkɨ axɨna supakɨpuka, kusɨrɨbo apakumanaka nausɨboriki ɨmoti Yɨriabux Jesús aukityo suiñemo, sane takana noñemaxti Tupax.

⁶ Sane naukiche sukanasomɨ ɨmoti Tito asamuti nuxia aikianti abaxɨpekuki axɨmanio makumanataka axɨna tyone tɨkañe yachɨkoiti.

⁷ Tyopiki axaño, abɨrikiatɨ nuxia au nanaiña: au napakokonaunku, apipiaka nuxia apanitya, taruku napapanaunku, auxiankatai apaserebi axɨnaintyo nikuasɨrɨkɨxɨma makiataka aume axɨna iyebo aboi suisiuki, saneityo tari abɨrikiatɨ nuxia au axɨna napakumanaka ɨmo makiataka.

⁸ Chɨsukanapɨñɨ aume axɨna sane takana nixhakɨpuku. Ta ixhanka nauki ausuputane nixhankaxɨma makiataka, nauki aityusiankama ausukarɨ axɨna ñakumananaunkuxɨma ta ñemanauntu.

⁹ Tyopiki tɨtusiu aume axti naki Yɨriabux oemo Jesucristo, ui nukuasɨrɨkɨ ɨmoti, abo chiyaupɨ nenaxixhti iñatati takanati naki champɨ nenaxixhti autopiki, yakɨna ui axɨna taruku nityakisɨrɨkɨxti axaño taruku namenaxi.

¹⁰ Tyone axɨna sukanañɨ aume tyopiki tyone uxia ɨmo nausɨboriki. Aukiapae au kutanu kiatax nasɨkɨbes, chapisamuteantaipɨ, ta apisamute aɨbu narukux aume.

¹¹ Sane kaɨma, apakumana isiu axɨna ane aboi, apityakɨnuku axɨmanu napachɨkoi aɨbu naupukɨnunku takana apisamute auki maɨbo.

¹² Tyopiki axtɨ anati naki ñemanauntu xhanxti akumanati, yasutiuti Tupax ñakumanataxti isiu axɨna ane uiti. Axti Tupax chɨmankiotipɨ axɨna champɨ osoi.

¹³ Tapɨ tyopiki axɨna napakumanaka ɨmo makiataka axaño champɨ ane aume. Ta nauki chepe ane aume.

¹⁴ Axaño kaɨma ane aboi axɨna champɨ uimia. Au kiatax ñana ane uimia axɨna champɨ aboi, sane kaɨma chepe ane aume.

¹⁵ Sane takana nantɨ iku Nikorox: “Axti naki matakɨmanaukunuti chama chɨsobɨraupɨ ɨmoti, axtityo naki matakɨmanaunkunuti simiantai iñatai ɨmoti.”

Axɨbama yakɨpusuxti Pablo

¹⁶ Chapie ɨmoti Tupax, tyopiki iñatati au nausasɨxti Tito nauki asaratitɨ autaku takana axɨñɨ.

¹⁷ Tyopiki yasutiuti nixhakɨpuku, tyopiki taruku nipukɨruxti autaku, ta kaɨma sɨrotitɨ tanu asarati año auki noñemaxtiatoe.

¹⁸ Chepeti Tito, ikɨpukati tanu tamanti naki usaruki, axti naki uxia nuraxɨma kɨtɨpɨti axɨpekuma namanaiña axɨbama ikokoromati Jesús, tyopiki axɨna uxia ñanunekakaxti axɨba omixhia manityakax.

¹⁹ Tyopiki tyonenti naki uxianti au ñakionkoxɨma axɨbama ikokoromati Jesús nauki aɨrotitɨ suichepe nauki aikianti axɨmanio makumanataka supatakɨmanaunkuka tyone axɨna numanaunku ɨmoti Yɨriabux Jesús saneityo uityusianka axɨna nuxianka makumana ɨmo makiataka.

²⁰ Axtɨ sane osoi champɨti naki chuxiampɨ nuraxti tyopiki axɨba makumanataka supatakɨmanaunkuka,

²¹ sane naukiche suixhanka sopisamune nanaiña au nanentax, sukarɨti Tupax takanaintyo sukarɨ mañoñɨnka.

²² Chepemaintyo, ikɨpukati tanu kiatax usaruki, axti naki somonkatɨ nuxia ɨmoti tyopiki sumastai axɨna isamutenti suichepe, saneityo uiti kaɨma tyopiki onkotitɨ nuxia aume.

²³ Axti Tito, tyonenti naki anati auna chepeñɨ ɨmo niyachɨkoi autaku. Tapɨ axɨmanuma toxɨma makiataka usarukityaiki, bakɨpukux ɨmoma uimia axɨbama ikokoromati Jesús manaunumaintyo ɨmoti Cristo.

²⁴ Yakɨna axɨbama ikokoromati Jesús atusi ɨmoma, apityusianka sukarɨma ta ñemanaunkuxatoe kuasɨrɨma aume, sane naukiche taruku suipukɨnunku autopiki.