Luka 23 - Chakfem (ckyc)

Jesu kihkyeen Bilatus kihh Hiridus

¹ Bhi dw'uu gurum ni mwopp yakhal dum kihh Jesu tekhem Bilatus w'u a govno.

² Bhi mwopp y'aa ji kihh waamatt kaah nyi mwopp le, “Mu kad gwoh mhize ni phi blung'pan khi mwopp'muun tihh mwopp teekwall diy. Kihh zhwam gurum mwopp le tapp nw'aa diy kwat wapp lhidum Kaisar mou, yakhal kihh satt le, wai a riy a Kristi, w'u a Miskakhamm.”

³ A nyi seh, bhi Bilatus nang phi Jesu le, “A gha a Miskakhamm khi Zhepp Yahuda shi aa'?” Jesu lapp nyi satt le, “Ghi satt a nyi seh.”

⁴ Bhi Bilatus satt prist wu'nan ni mwopp kihh dw'uu gurum ni mwopp le, “Baah ih kad mee'bii w'u wall dyeell kaah gwoh mhize ni mou.”

⁵ Weett kihhsheh bhi mwopp dy'iin dyishig mwopp le, “Gwoh mhize ni phi yakhal kihh teen naar mwopp'muun sh'i kamm keeniy dhighin yill Yahudiya kihhdihng, phi'wu shee bii niy diy Galili harr k'aa putt se bihze.”

⁶ Kaarooh Bilatus klihng bii mihhseh, bhi nang phi mwopp le, “Gwoh mhize ni a Gu-Galili kan e'?”

⁷ Kaarooh Bilatus klihng rooh Jesu put a yill w'u a Hiridus a Miskakhamm kaah, bhi shenn nyi lhidum Hiridus ni, p'ee gyet sh'i mihhseh ni bhi Hiridus ni wu'nyi nhighin Urshalima zag.

⁸ Kaarooh Hiridus naah Jesu bhi rettyit nyi pwetd, p'ee phigyet kihh t'ang naah nyi diy. P'ee bii w'u gyet Hiridus kihh klihng kaah Jesu, bhi kihh naah le dyinn gw'ar diy sh'in pakk bii'aapwoo ni wu'riy ri naah.

⁹ Pee'mhinyi, bhi Hiridus sh'in t'al dhess phi Jesu, dhangg baah Jesu lapp m'ee t'al ni nyi mou.

¹⁰ Prist wu'nan kihh Mhikamm-w'aar mwopp dyarrang nhighin, mwopp kihh yakhal kihh pwoo bhall-bhall kaah Jesu.

¹¹ Bhi Hiridus mwopp kihh mhi'lek w'u mwopp kihh tapp riy mwopp zal Jesu, mwopp grangg nyi pwetd, bhi mwopp lop m'ee bh'aar w'u mellep rett nyi phishumm nwang'zhung nyi, bhi mwopp shenn nyi lhi'baa dum Bilatus.

¹² P'ar mihhseh bhi shaar n'ung Hiridus mwopp kihh Bilatus dhellekk, p'ee gyet seh bhi mwopp a wu'kob shag.

¹³ Bilatus peet k'ang kihh prist wu'nan mwopp, kihhsheh kihh mwoohnan mwopp, kihh pakk gurum ni mwopp dyi weett zag

¹⁴ bhi satt mwopp le, “Wu ji kihh waamatt kaah gwoh mhize tekhem na, wu le gw'ar a g'u blung'pan khi gurum tihh nw'aa teekwall diy. Dhangg wu naah, bwoonrooh a'n a bhekhelbhelepp phi nyi kihyit wu, bhi baah ih kad mee'bii w'u wall dyeell kaah nyi mou.

¹⁵ Kooh Hiridus wu'nyi maah kad gwoh mhize ni sh'in mee'bii wu'bis mou; a kihhsheh bhi shenn nyi lhi'baa ji munn. Wu naah shisihng, baah gwoh mhize ni sh'in mee'bii w'u wall muutt mou.

¹⁶ Pee'mhinyi, bhi a'n p'ee nyigkarr nyi bhi ih yet nyi diy.”

¹⁷ (Gyet Bilatus kihh lokhot kihh shang m'ee laa'shakhat kihmeh dhighin luh'shakhat p'ar puus Ku'khur Mettkaah.)

¹⁸ Bhi gurum ni mwopp weett shatt waaw phishag chapp-chapp mwopp le, “Wu mihmwan kihh gwoh mhize ni wurr-wurr, dum wu t'u! Ghi shang a Barabbas munn ee'h!”

¹⁹ (Gyet mwopp bwakhat Barabbas ni luh'shakhat p'ee m'ee pwoobhangg w'u mwopp tungg dhighin khishikhitt Urshalima, kihh tu'kaah w'u wu'nyi sh'in dhighin pwoobhangg ni.)

²⁰ Bilatus kihh t'ang yet Jesu, a kihhsheh bhi kamm dwakk gurum ni mwopp.

²¹ Weett kihhsheh bhi mwopp sihkhitt shatt waaw chapp-chapp mwopp le, “Ghi pihpwas nyi ee'h! Ghi pihpwas nyi fyaad!”

²² Bilatus waa nang dyi phi mwopp, dheeh a wu'kunn seh le, “A p'ee mihyeh? Gwoh mhize ni sh'in a mihyeh wu'bis? Baah a'n ih kad sh'in mee'bii w'u wall muutt mou. Pee'mhinyi, bhi a'n p'ee fwa a gw'am nyi kyekk, bhi ih yet mwan niy.”

²³ Weett kihhsheh bhi gurum ni mwopp sihkhitt shatt waaw chapp-chapp, mwopp dyarrang gakhatt-gakhatt mwopp satt le nw'aa pihpwas Jesu fyaad. Kyess nyi bhi dhekheh mwopp mett bhall mhi Bilatus.

²⁴ A nyi seh, bhi Bilatus sh'in bii w'u gurum ni mwopp kihh dh'om seh.

²⁵ Shang Barabbas, w'u a gwooh deh bwakhat luh'shakhat p'ee pwoobhangg kihh tu'kaah seh, w'u a gwooh gurum ni mwopp le gw'ar shang a nyi runn. Bhi Bilatus pihh Jesu tihh mwopp sh'in bii w'u gurum ni mwopp kihh dh'om diy kihh nyi.

Mwopp pwas Jesu kih sheepmuutt

²⁶ Kaarooh mhi'lek ni mwopp kihh put kihh Jesu p'ee dum pwas, bhi mwopp mengg y'aa Siman w'u a m'ee Gu-Sairiin, w'u kihh tong kihtekhell ji p'ee dhel dhighin khishikhitt Urshalima ni. Bhi mwopp m'ang sheepmuutt kihh Jesu dhen Siman ni; mwopp le'ching nyi tihh lang diy kihbwoon Jesu kihh nyi.

²⁷ Dw'uu gurum mwopp tuud pwat kihbwoon Jesu; pakk a shwarab w'u mwopp chaat wall, mwopp kihh seer maab kopp nyi.

²⁸ Jesu buakhar bhi satt mwopp le, “Shwarab Urshalima Oo, tapp wu kihh wall a p'ee a'n mou; wu wall a p'ee shuk kihh zhepp wuh mwopp zag.

²⁹ Ih kihh satt wunn, pee kihh ji w'u wunn p'ee p'ar satt le, ‘Ai, zh'eer a long kyekk oou! Ai zh'al mhi shwarab w'u baah mwopp cham la zhepp kooh mwopp kyeer mou.’

³⁰ Sh'i pee mhizeh ni, bhi gurum mwopp p'ee kihh satt bwumm mwopp le, ‘Wu rumm wu samm kaah mu kyekk e'h!’ Yakhal mwopp kihh satt zhwakk mwopp le, ‘Wu paahpee kaah muh kyekk oou!’

³¹ “T'o, dheeh mihh wus l'ang a kih a'n, w'u a kaa sheep wu'bharak se, bhi nyi p'ee p'ar sh'in a rangg kihh wu'wunn, w'u a kaa sheep wu'fii se?”

³² Bhi mwopp pwat kihh m'ee mhi-wadpee mwopp vel kihshag kihh Jesu p'ee dum twa.

³³ Kaarooh mwopp dum wull m'ee pee w'u mwopp kihh peet Kih Yesskaah, bhi mwopp pwas Jesu nhighin kihshag kihh mhi-wadpee mhizeh ni mwopp, kooh meehrangg kih sheepmuutt m'iin: wu'zeh sarrsoh, wu'zeh sarr'kul Jesu kihnaar.

³⁴ Bhi Jesu satt le, “Daa, ghi fwa mwopp, p'ee baah mwopp manshiiy bii w'u runn phi sh'in nyi mou.” Bhi mhi'lek ni mwopp shap looh'lop khi Jesu shut sh'i wangg'mang.

³⁵ Gurum mwopp dyarrang mwopp kihh naah nyi diy, yakhal mhi-kihkyeen khimwopp kihh grangg nyi, mwopp kihh finn pwoo ru nyi, mwopp kihh satt le, “Bham mwoohzeh; bhi bham shin sihng, kad kan a nyi a Kristi khi Naan, w'u a Gwooh Naan l'e sarr kaah.”

³⁶ Mhi'lek ni wu'mwopp zag kihh ja dyarrang kihkyeen nyi mwopp kihh nwang'zhung nyi diy. Mwopp pihh am'anab w'u dhidwangg nyi

³⁷ mwopp kihh satt nyi le, “Mihh kan a gha a Miskakhamm khi Zhepp Yahuda, bhi ghi bham sak dhak e'h.”

³⁸ Mwopp ran m'ee r'an l'ang kih sheepmuutt ni tihngg kaah nyi le, “A GWOH MHIZEH A MISKAKHAMM KHI ZHEPP YAHUDA.”

³⁹ Kihmeh dhighin mhi-wadpee w'u mwopp pwas mwopp kihshag kihh Jesu seh kas nyi, yakhal satt nyi le, “Dhok a gha shi a Kristi 'y, ghi bham sak yakhal ghi bham wu'munn zag sihng!”

⁴⁰ Dhangg wu'nyee nyi tepbhelepp nyi le, “Hah, ghi kihh kihkhir Naan a'ng? Mwopp shan a dyeell wu'khimhi wu'gha kihh wu'nyi 'y.

⁴¹ Ghi naah mwopp phi nyigzheell wu'munn a dihhreh, p'ee wu'munn phi lapp a kwatkopp mhi-dhakk'shin keemu 'y. Dhangg gwoh mhizeh wu'nyi sh'in mee'bii wu'bis maah.”

⁴² Bhi wu'nyi satt Jesu le, “Daah Jesu, ghi p'an kihh a'n p'ar w'u mihh ghi ji diy dhighin dhenglong keegha.”

⁴³ Bhi Jesu pring nyi le, “Ih kihh satt a zeenn gha, gha p'ee kwed kihshag kihh a'n dhighin BlengNaan shishinn se.”

Muutt khi Jesu

⁴⁴ Kaarooh pee wull kaa gonggpee wu'kaghapaad baa'vel mhi puus se, bhi pee taah'kwoo kih yill ni kihhdihng harr gonggpee wu'kunn,

⁴⁵ p'ee puus yakhal nook bhanggpee. Fwaat-pwooluh w'u dhighin LuhNaan tee sag sam putt, shap vel.

⁴⁶ Bhi Jesu peet satt kihh dhekheh niy bhall-bhall le, “Daa, ih dhen seen na sarr gha oou!” Kaarooh satt kihhsheh bhi m'uut.

⁴⁷ Kaptin khi mhi'lek w'u kihh dharr nhighin naah bii mihhseh, bhi y'aa kwoob Naan le, “Ai gwoh mhize ni a gu'shigrett.”

⁴⁸ Kaarooh mwooh mwopp ja dyarrang tongnaah mwopp naah bii mihhseh, bhi mwopp kihh sram phitukhurr ruh sh'i wadphitukhup, mwopp wakba.

⁴⁹ Mwooh mwopp man Jesu ni, kihhsheh kihh shwarab w'u gyet mwopp tong Galili ka dang nyi, mwopp dyarrang zhong-zhong mwopp kihh nah bii w'u kihh dum diy.

Mwopp wum Jesu

⁵⁰ M'ee gurum gyet nhighin w'u shumm nyi a Yusufu, w'u gyet a kihmeh dhighin To'ng-Mhi'nan. Gwoh mhizeh ni gyet a gurum pwetd, nyi gyet a gu'shigrett.

⁵¹ Baah gyet wu'nyi tuppbwoonn pwoo w'u gyet mwopp kukhul kaah Jesu, kihh bii w'u mwopp sh'in nyi seh mou. Nyi gyet a Gu-Arimatiya dhighin yill Yahudiya. Gwoh ni gyet a gurum w'u kihh tong gongg ji khi dhenglong khi Naan.

⁵² Bhi gwoh ni dum dhang kumm Jesu phi Bilatus.

⁵³ A nyi seh, bhi shang kumm nyi kih sheepmuutt lhisam, bhi mwet dhighin fwaat linen, dum dhen dhighin m'ee kihshirr w'u gyet slak shi'bwut pangg. Kihshirr ni a m'ee kihshirr w'u baah gyet mwopp khi cham dhen m'ee kumm gurum dhighin mou.

⁵⁴ Gyet bii mihhseh ni a p'ar Puus Dhakkshik, yakhal pee dheeh a lee tihh mwopp dhel Puus Nookdyi.

⁵⁵ Bhi shwarab w'u mwopp tong Galili ka kihshag kihh Jesu mwopp yakhal dang Yusufu ni, mwopp dum naah kihshirr w'u dhen nyi diy, yakhal mwopp naah pee'dhen kihh nyi zag.

⁵⁶ Bhi shwarab ni mwopp wakba, mwopp dum dhakk loohteghez kihh mwoor'teghez l'e. Mwopp lapp'nook kih Puus Nookdyi kaa W'aar mhi Musa satt seh.