Judae 1 - Caekäcai Kangthae (Lemi)

¹ Kai, Judae, Isu Khrista üng mawsawng hai Jaeko üng kangby ma hini cae tärü dy. Mä-ai üng Pä-ai Säthaw ma re ea äma üng bälung aevaw saite thung-a awng kha Isu Khrista ma aedung hai saite khimi angxynlyng na tea hini cae tärü te vi.

² Säthaw üng bäheng saite, awngneng saite hai bälung aevaw saite lä tengxyng y nang ce tea awng sy.

Särae kaeling na

³ Ngai bärai saite äpy na ä, Säthaw lä mä-ai angxynlyng na bung aeqang saite phüng nang ce tea kai lä cae tärü hethang tengxyng y ngaiphi te vi dy. Honi jüng-a vaihi nang ce lä yng saite tea aedung hai hethang kai lä cae tärü kha mäci he ngai te vi. Säthaw lä äma üng khimi angxynlyng na tea yng saite kätüng qengtä ma dungtäsa tähang py te vi dy.

⁴ Ätephüng-a mei nädylä Säthaw lo tängai y saite khimi phütä na lä nang ce thung-a kangru mang kung ö te vi ba. Äni ce lä Säthaw üng tähang kähawi phüng-a äma ce üng ngaiphi tüng y saite kätyng awng haw vi näkha mätu ö te vi. Äni ce lä mä-ai üng Areng hai Ingkung lawngtä xyng awng saite Isu Khrista tea aephae ö vi. Äni ce tea lä Säthaw ma dengpy ai näkha jangni üng hai ma tärü rüng pyng te vi dy.

Kätüng y mätu te särae na tea Säthaw ma dengpy ai

⁵ Areng lä Isrelae khimi na bung Aikuta pre üng aelawi hai te vi dy. Tungaila honi pyng-a äni ma yng y saite khimi na bung lä täphra pa te vi dy. Nang ce lä honi na phüng mäny pyng ngaila nang ce tea aedawng haile ö tyng hai hethang kai lä ngai te vi ba.

⁶ Säthaw ma äni ce tea py saite kälu na tea khaisö saite Känipre üng angtawtha na phüng aedawng haile ö. Äni ce lä äma ce mityng na mang üng thoja ö te vi. Tukätephüng-a Säthaw lä äni ce tea dungtäsa singqy rui hai mäkhing kha käving thung-a khai pa vi dy. Säthaw lä äte angxynlyng na tea tärae cei te Käni khytä äni ce bung lä hini kätyng khai vi ai rawng.

⁷ Sodom, Komorae märü käleng hai särawng dawngpa märü üng khimi na tea aedawng haile ö ba. Äni ce la honi Känipre üng angtawtha na kätyng hunghö sa ö te by vi. Honi märü na lä nawngmäcaw tingtawi täkübäjang aesa linglawng ö te vi. Säthaw lä äni ce angxynlyng tea dungtäsa mai hai dengpy ai. Äni ce tea dengpy saite lä mä-ai tea sädi py te vi dy.

⁸ Hini kätyng-a kätüng y mätu saite särae na lä äsämai dang vi näkha äma ce üng ätabung tea hunghö sa hai kha äma ce tea pawprae hai ö te vi. Säthaw üng aenae tea elekhei sa kha Känipre-a phung-ang awng saite na tea äni ce lä käsi prawng ö vi.

⁹ Säthaw üng angtawtha käleng Mikhela mäteng ma hini kätyng sa te y. Äni lä Mosi üng äro aelawng te phüng Setan angra hai älo ae-e hawi te kätü-a, käsi prawng saite älo haetä la thui vawng te y. Tungaila äni ma Setan angra tea “Areng ma nang tea pring te lo thui kae sy” näkha thui kae vi.

¹⁰ Tungaila hini kätüng y mätu saite na lä äma ce mänykaw y saite angxynlyng na tea käsi prawng ö vi. Äni ce lä tawngbawi käpryng na kätyng-a äma ce üng aedawng kaw y käla mäny saite honi na sa te phüng-a Säthaw ma äni ce tea täphra pa te vi.

¹¹ Äni ce lä tähang si ö bärai vi. Äni ce lä äma üng kangby bung bädü saite Ka-i-na üng älang mang-a hui ö vi dy. Tangkae ngaiphi te phüng-a Balam kätyng sa tämang ö saite na vi. Äni ce lä Kora kätyng Säthaw tea täre mäsa kha aety ö saite na vi dy. Tukätephüng-a äni ce lä Kora kätyng pra ö by vi ai.

¹² Äni ce lä nang ce hai mangtä aede saite pawi-a nei ca ö te vi. Äni ce üng sa tämang saite na tea aejae y käla ma Areng tea tämö khai y te phüng-a nang ce üng pawi tea äni ce lä nüng hai ö te vi. Äni ce lä äma ce tähang qaitä dawng saite beram kärui kung na kätyng vi. Äni ce lä aeli ma mäsaeja kha khöne hai y saite tämai na kätyng kae. Äni ce lä kätü tyng ngaila äthai aethai y saite thingkawng kung na kätyng kae vi. Äni ce lä angjüng aephawi pyng saite thingkawng kung na kätyng kae vi kha dü king ö saite na vi.

¹³ Äni ce lä pangle üng bungba saite tuileng kätyng vi. Äni ce üng aejae hethang hawi saite kälu na lä pangle tui thung üng mäce pawlaw na tho te kätyng vi. Äni ce lä khösang-a aeja rungrang saite tengpaw na kätyng vi. Honi na tähang lä Säthaw ma thuphi saite käving thung-a dungtäsa mityng khai rüng pyng pa vi dy.

Eno ma tüng y saite särae na phüng thui rüng pa

¹⁴ Adam üng hai aetawng kha dung säritä pyng üng Eno lä hini äphüng cangkhawng-a ma äni ce tea thui rüng saite lo lä, “Areng lä äma üng sangrui-a awng mang saite angtawtha käcai na hai mangtä ly ö ai.

¹⁵ Honi lä khimi angxynlyng na lä Säthaw üng lo tängai y saite na hai, äni ce üng käsi sa saite na hai, Säthaw tea tengxyng y käsi prawng saite angxynlyng na tea lä Säthaw ma tärae cei kha dengpy ö ai näkha thui rüng te vi” näkha näpa.

¹⁶ Hini khimi na lä bälung tangkö phi te hai khimi kälang na tea cy jawjaw ö vi. Äni ce lä aethaw kha äma ce üng ngaiphi tüng y saite na mang-a hui ö te vi. Äni ce lä äma ce üng aely kängai dang hethang khimi kälang na tea mäthaw ö vi.

¹⁷ Ngai bärai saite rawijae na ä, mä-ai üng Areng Isu Khrista üng angtawtha na ma thui rüng saite tea lä aedawng haile ö ba.

Areng üng angtawtha na ma tüng y saite särae na phüng thui rüng pa

¹⁸ Äni ce ma, “Kangkhüng üng käni-a lä Säthaw üng kängai y käla äma ce üng ngaiphi tüng y saite kätyng hui saite, aenui aepai hai thui saite khimi na lä nang ce tea tho ö vi ai” näkha thui pa.

¹⁹ Hini na lä nang ce tea aetäphü hai saite na vi. Äni ce lä äma ce üng ngaiphi tüng y saite na thung-a hui hai kha Muilaw Käcai tea yng y saite khimi na kae.

Yng saite cakhi ö

²⁰ Tudylä kai üng ngai bärai saite äpy na ä, nang ce lä nang ma ce üng caiping-a yng saite qawng-a aenüng kha mä-ai ma tea bälung aethaw aela ö lawi ba. Muilaw Käcai üng haidae hai-a aetang ö.

²¹ Mä-ai üng Areng Isu Khrista üng bäheng saite phüng-a, nang ce tea dungtäsa hing saite dang hethang nang ce ma aering te kätü-a Säthaw üng bäheng saite thung-a awng ö ba.

²² Yng vawng y te bälung awng saite khimi na tea lä bäheng ö ba.

²³ Phütä na bung lä mai thung üng aetho dawde te kätyng ngärei thung üng aeqang ö ba. Sa tämang saite phütä na tea bäheng te kätü-a lä, sädi khai ö. Hunghö sa saite hai pawprae saite aekhu aena nae na tea lä esäre kha aela ö hang.

Säthaw tea bälaw ö

²⁴ Säthaw lä aethaw leng phi te phüng-a nang ce tea aetüng y rung khytä säbawng haw te vi. Nang ce tea sa tämang saite üng cai hai kha anghawtho phi saite hai-a äma üng phung-ang awng saite maw-a nähai haw te vi.

²⁵ Mä-ai üng Areng Isu Khrista hai-a, mä-ai üng aeqang saite Kung lawngtä xyng awng te Säthaw lä jangni üng hai, vaini üng hai ämaw mang-a la, phung-ang hai, pyng saite hai, haidae hai aenae lä awng jawjaw sy. Amen.