Hebrai 1 - Caekäcai Kangthae (Lemi)

Säthaw lä khimi ce tea Äcäpaw te mang hai-a thui te

¹ Jangni üng hai Säthaw lä mä-ai üng kangsi kangjaw na tea älang cawngkhang na hai kätü awng mang-a buisaw na te mang hai-a älo aepe vi dy.

² Tungaila vaihi kangkhüng käni-a lä Äcäpaw te mang hai-a mä-ai tea älo thui te vi dy. Säthaw lä Äcäpaw hai-a käni hai älawng sa kha äte angxynlyng na tea pyng hai hethang re vi dy.

³ Äcäpaw lä Säthaw üng phung-ang matangtä cangxei hethang hawi mei näte tea mätü kha äma khekhe lä Säthaw üng aeme aeqa saite hai aetawng khaw te vi. Hini älawng hai käni äte angxynlyng na tea lä äma üng haidae awng saite lo hai äma ce üng mityng-a awng jawjaw hethang sa te vi. Äni lä khimi ce üng hunghö na tea mäcai pyng ea Känipre-a awng saite phung-ang kälengky Säthaw üng bangtang mang-a aety vi dy.

Äcäpaw lä Känipre üng angtawtha na qawng-a lengky

⁴ Säthaw üng Cäpaw lä Känipre üng angtawtha na qawng-a tengxyng y lengky te kätyng Säthaw ma mäthi saite ämüng lä Känipre üng angtawtha na üng ämüng na qawng-a lengky vi.

⁵ Säthaw lä ämi Känipre üng angtawtha tea, “Nang lä kai üng Cäpaw vi. Vaini kai lä nang üng Pä-ai-a aelawng vi dy” näkha thui vai y lyng. Y dylä Säthaw ma Känipre üng angtawtha lawngtä phüng tea, “Kai lä äni üng Pä-ai-a lawng kha äni lä Kai üng Cäpaw-a lawng ai” näkha thui tyng y lyng.

⁶ Säthaw lä äma üng Cäpaw äcälö bung hini älawngpre-a mätaw te kätü-a, “Säthaw üng Känipre üng angtawtha angxynlyng na lä äni tea cäphaw ö hethang kae” näkha äni ma näpa vi dy.

⁷ Tungaila Säthaw lä Känipre üng angtawtha na üng phüng tea, “Säthaw lä äma üng Känipre üng angtawtha na tea aeli kätyng lawng hai kha, äni ce lä äma üng mawsawng na tea maikädo na kätyng lawng hai vi” näkha näpa.

⁸ Tungaila Äcäpaw phüng äni ma thui te lä, “Säthaw ä, nang üng pyng saite pre lä dungtäsa awng jawjaw vi ai. Nang lä nang ma üng khimi na tea cüng saite hai pyng te vi.

⁹ Nang lä mitang khaw saite tea bälung aevaw kha sa tämang saite tea lä esäre te vi. Tukätephüng-a kai, nang üng Säthaw, lä nang bung re ea nang üng kangby jä-ai na qawng-a, mäsang kha tengxyng y anghawtho saite na nang tea py te vi dy” näkha nä vi.

¹⁰ Säthaw ma la, “Areng ä, Nang lä, angcüky älawng tea sa kha, käni khösang na tea lä nang üng äkö na hai sa te vi.

¹¹ Honi angxynlyng na pra ö king ngaila nang lä dungtäsa awng jawjaw ai. Äni ce angxynlyng lä kä-o kätyng mawng ö vi ai.

¹² Nang lä kä-o tea bäle te kätyng äni ce tea bäle kha käde phae vi ai. Äni ce lä kä-o kämawng na kätyng awng ö ngaila nang lä lang te awng y lyng. Nang lä manila dü y lyng” näkha nätyng te vi.

¹³ Säthaw lä, “Nang üng täre na bung nang üng äkho täkui-a khai te khytä, kai üng bangtang mang-a aety ba” näkha, Känipre üng ämi angtawtha tea la thui vai y lyng.

¹⁴ Känipre üng angtawtha na lä mawsawng na xyng lawng te kae vi. Äni ce lä Säthaw üng aeqang saite na tea säbawng hai hethang mätaw saite na kae.