Ephesi 6 - Caekäcai Kangthae (Lemi)

Änä-awi, äpä-ai hai cäpaw cänung na

¹ Caw nade na ä, nang ce lä Areng hai bungtä awng ö te vi. Tukätephüng-a nang ce lä nang ma ce üng nä-awi pä-ai älo na tängai ö hethang kae. Hini kä awng hethang nang ce lä aeteng khaw ö te vi.

² Caekäcai thung-a tärü te lä, “Nang nä-awi, ni nang pä-ai tea tämö khai ba” näkha nä vi. Mosi üng Ubädi thung üng hini Ubädi tea lä Säthaw ma angcü-a aedo saite lo vi.

³ “Nang nä-awi ni nang pä-ai tea tämö khai dylä, nang lä tähang kähawi dang kha älawng qawng-a hing sa ai” näkha awng vi.

⁴ Pä-ai na ä, nang ce üng caw nade na tea rang saite lo hai thui kha kädawtho hai ö hang. Honi jüng-a nang ce lä äni ce tea cülä-ü-a Säthaw üng lo mitang hai mätu pa ö.

Ingkung na hai mawsawng na

⁵ Mawsawng na ä, hini älawngpre-a nang ce lä nang ma ce üng ingkung na lo tängai ö. Nang ce lä Khrista üng lo tängai te kätyng-a, nang ma ce üng ingkung na älo tea bälung mäke angxynlyng na hai tängai kha tämö khai ö ba.

⁶ Nang ce üng ingkung ma nang ce tea kheng te kätü-a mimai dang hethang qaitä y vi. Nang ce lä Säthaw üng aely kängai-a nang ma ce üng bälung mäke angxynlyng na hai Khrista üng mawsawng na kätyng sa ö.

⁷ Khimi ce üng mawsawng kätyng sa te cang y, Areng tähang mawsawng sa te kätyng nang ce lä anghawtho kha kälu tea sa ö.

⁸ Mawsawng te läsy, khimi kaelawi te läsy, hawi saite kälu sa dylä, Säthaw ma nang ce tea ävang käting py ai näte mäny ö ba.

⁹ Ingkung na ä, nang ma ce üng mawsawng na tea kai thui te kätyng sa ö ba. Nang ma ce üng mawsawng na tea aethüng hethang hawi saite na sa pa ö hang. Nang ce hai nang ma ce üng mawsawng na üng Ingkung käleng lä Känipre-a awng vi näte aedawng haile ö. Äni lä khimi ce tea mimai kheng te y vi.

Säthaw üng täre aevyng na

¹⁰ Kangkhüng üng lo nang ce tea kai thui te lä hikä vi. Areng üng haidae käleng hai-a nang ce lä aethaw aela ö.

¹¹ Nang ce lä Säthaw ma py saite täre aevyng angxynlyng na tea aelawng ö. Tudylä Setan angra üng hawi y saite kaedawng na tea nang ce lä aedung haw ö ai mang.

¹² Mä-ai lä khimi ce hai täre aety ö te y. Käni khösang üng haidae hai aenae awng saite angra na, hini älawng käving pre tea pyng saite angra käleng na, älawng qawng-a aenae awng saite na hai täre aety ö te vi.

¹³ Tukätephüng-a nang ce lä Säthaw ma py saite täre aevyng angxynlyng na aelawng ö. Tudylä angra na tyng te kätü-a, nang ce lä aedung haw ö ai mang. Täre aety hethang aerü rüng pyng te kätü-a, nang ce lä cakhi-a aedaw haw ö ai.

¹⁴ Tukätephüng-a nang ce lä aedung hethang aerü kha awng ö rüng. Säthaw üng lo mitang lä khabai hai aetawng vi. Honi hai angkeng tea kähawi-a aekheng ö ba. Säthaw üng cüng saite lä tatärang-a aedung hai saite süng kä-o kätyng vi. Honi tea nang ce lä aelawng ö.

¹⁵ Awngneng hethang py saite Angthang Kähawi thui he nang ce lä aerü ö rüng. Tukha hini na lä nang ma ce üng kho painai na tea aecö rüng pa te kätyng vi.

¹⁶ Hini na cang y, nang ce üng Säthaw tea yng saite lä cakhi-a süng ö. Hini lä reisae na üng khöpui kätyng vi. Hini khöpui hai-a Setan ma kae te maikang saite bälaw cung tea nang ce lä bädü haw ö ai.

¹⁷ Säthaw üng aeqang saite lä reisae na üng süng lökhu kätyng vi. Honi tea lä aekhu ö ba. Säthaw üng losai lä Muilaw Käcai üng aekei sawngseng kätyng vi. Hini tea nang ce lä kähawi-a süng ö khü ba.

¹⁸ Kätü qütä-a Muilaw Käcai üng bähawi te kätyng aetang ö ba. Nang ce tähang äte angxynlyng na säbawng hethang Säthaw tea aetang ö ba. Hini kätyng sa haw hethang nang ce lä canglailing-a awng ö. Säthaw üng khimi angxynlyng na tähang aethawsi y käla ma aetang ö jawjaw pa ba.

¹⁹ Kai tähang la aetang pa jo ba. Säthaw üng ho saite Angthang Kähawi tea mäny hai hethang hai kai lä ri y käla ma thui te kätü qütä-a, Säthaw ma kai tea py te aebäla saite lo thui haw hethang aetang pa ö jo.

²⁰ Kai lä Angthang Kähawi thui hethang Isu Khrista ma re saite angtawtha lawngtä vi. Hini kätyng sa te phüng-a kai bung lä thawng thung-a pä-ung te vi. Angthang Kähawi tea ri y käla ma thui he kae te kätyng thui haw hethang kai tähang Säthaw tea aetang pa ö jo.

Kangkhüng üng cibai sa te lo

²¹ Tukhika lä mä-ai üng bälung aevaw saite kangby vi. Äni lä Säthaw üng kälu mitang khü-a sa te vi. Äni ma kai üng phüng angxynlyng na nang ce tea thui pa ai mang ba. Tukätephüng-a nang ce lä kai üng sa saite na hai awng saite na phüng mäny ö ai.

²² Tukätephüng-a kai lä äni bung nang ce tea mätaw te vi dy. Tudylä kai ce lä makä awng mei näte nang ce mäny haw hethang hai nang ce tea äni ma aethaw py haw hethang vi.

²³ Mä-ai üng Pä-ai Säthaw hai Areng Isu Khrista lä nang ce yng saite na tea awngneng saite, bälung aevaw saite hai yng saite na py sy.

²⁴ Manila bynglei y saite bälung aevaw te hai-a, mä-ai üng Areng Isu Khrista bung bälung aevaw saite, nang ce angxynlyng na qawng-a Säthaw üng tähang kähawi lä tyng sy.