Ephesi 4 - Caekäcai Kangthae (Lemi)

Yng saite na lä Khrista hai bungtä awng

¹ Areng üng kälu sa te phüng-a kai bung lä thawng thung-a pä-ung te vi. Säthaw ma nang ce bung ka te hai kaeteng-a nang ce lä kähawi-a awng hethang kai lä aesi aebai te vi.

² Nang ce lä kätü qütä-a bälung aemäneng kha äkäneng-a awng ö. Änawngsa te hai lawng lawngtä tea bälung aevaw te hai khung kha awng ö jaw jaw ba.

³ Muilaw Käcai hai-a nang ce lä bungtä-a lawng te vi dy. Tukätephüng-a nang ce lä aebälung te hai awng jawjaw hethang aethawsa ö. Nang ce lä awngneng te hai awng dylä, hini kätyng lawng ö ai.

⁴ Mä-ai yng saite na lä khimi lawngtä üng ätabung kaesui kaebeng kätyng vi. Mä-ai üng bälung thung-a aeta saite Muilaw Käcai lä lawngtä kae. Hini kätyng Säthaw lä nang ce bung ka te kätü-a, aethang khai saite haetä py te kae.

⁵ Mä-ai angxynlyng na lä Areng lawngtä, yng saite haetä awng kha baptismae haetä la ö te kae.

⁶ Pä-ai Säthaw lawngtä xyng tea mä-ai angxynlyng na lä cäphaw ö te kae vi. Äni lä mä-ai angxynlyng na tea pyng te vi. Äni lä mä-ai angxynlyng na thung-a aeta kha mä-ai hai-a kälu sa te vi.

⁷ Tungaila Khrista lä mä-ai lawng lawngtä tea äma üng aely kängai-a sakaw saite cawngkhang na py qi ö te vi.

⁸ Hini lä Säthaw üng cae-u thung-a tärü te kätyng vi. “Areng lä aesangky saite mityng-a paw te kätü-a, äni ma bäja saite täre na tea lä ne kha äma hai mangtä nähai vi dy. Äni lä khimi ce tea lasawng cawngkhang na py pa vi dy” näkha nä vi.

⁹ “Aesangky saite mityng-a äni lä paw ja vi dy” näkha thui te kätü-a, hini lo lä Khrista lä hini älawngpre-a cäqa rüng pyng te vi dy näte tea thui te vi.

¹⁰ Hini älawngpre-a cäqa saite lawngtä lä khösang qawng-a aesangky saite mityng mang-a paw ja saite lawngtä hai mangtä kae. Tukätephüng-a äni lä Käni hai älawng mityng qütä-a awng haw te vi.

¹¹ Hini Areng lä äma üng kangkawng na tea sakaw saite cawngkhang na py pa te vi. Äni lä khimi phütä na tea angtawtha na-a lawng hethang sakaw saite na py kha kälang phütä na tea lä buisaw na-a lawng hethang sakaw saite na py pa te by vi. Phütä na tea lä Angthang Kähawi thui hethang sakaw saite na py pa te vi. Kälang phütä na tea lä yng saite na bung rui kha mätu hethang sakaw saite na py pa vi dy.

¹² Khrista ma hini kätyng sakaw saite na py te lä Säthaw üng khimi na tea äma tähang kälu sa hethang aerü rüng hai te vi. Tudylä Khrista üng ätabung lawng saite Säthaw üng kangkawng angxynlyng na lä aethaw awng kha ryng ö rae vi ai.

¹³ Tukätephüng-a Säthaw üng Cäpaw tea yng saite hai mäny saite hai-a mä-ai lä bungtä-a lawng ö vi ai. Mä-ai lä Khrista üng cungrü saite tea pha hethang ryng te khimi na-a aelawng ö ai.

¹⁴ Tupyng-a mä-ai lä nade na kätyng y lyng. Kaesyng y-a mätu saite hai kaeling kaemae sa saite na lä mä-ai tea the haw ö y dy. Mä-ai lä aeli pui hai tuileng ma bäja rungrang saite bälawng haetä kätyng y vi dy.

¹⁵ Hini jüng-a, mä-ai lä bälung aevaw te hai lo mitang tea thui te hai-a, mä-ai lä äte angxynlyng na-a Khrista kätyng aetawng rae kha ryng ö ai. Khrista lä kangkawng üng älö vi.

¹⁶ Khrista lä äma üng ätabung kaesui kaepreng angxynlyng na tea kaebäla-a mangtä käcüng te vi. Ätabung aela xhixae y hethang mä-ai lä aesätawng saite ähu ähawng hai aethaw rui na kätyng vi. Ätabung angxynlyng na üng kaesui kaepreng angxynlyng na äma ce üng kälu sa qi dylä ätabung angxynlyng na lä ryng kha aethaw awng te hai ätabung kaepreng tingtawi bälung aevaw ö qi te vi.

Mä-ai üng hing saite kangthae

¹⁷ Tukätephüng-a Khrista üng aenae hai-a nang ce tea kai lä mäci te vi. Nang ce lä Säthaw tea mäny y saite na kätyng awng ö vi hang lawi. Äni ce üng kaedawng saite na lä aetütü kae.

¹⁸ Äni ce lä Säthaw lo mitang tea thaikaw king haw ö y vi. Äni ce lä Säthaw ma py te hing saite hai hanglaw bärai ö te vi. Ätephüng-a mei nädylä äni ce lä bälung tangkö kha Säthaw bung mäny haw ö y.

¹⁹ Äni ce lä aejae te bälung awng y te phüng-a, äma ce tea aeküng y käla äma ce üng ngaiphi tüng y saite mang-a hui ö vi dy. Äni ce lä täkü bäjang sa saite angxynlyng na tea anghawtho te hai sa ö jawjaw te vi.

²⁰ Tungaila nang ce lä Khrista üng mätu saite hai-a hini kätyng hing hethang nang ce lä aetu ö te y lyng.

²¹ Khrista üng phüng thai saite nang ce hai äni üng äkähui na ma nang ce tea mätu te na lä, Isu üng lo mitang kätyng vi näte kai lä bälung ae-y khaw te vi.

²² Tukätephüng-a jangni Säthaw bung mäny y te kälang-a, nang ce üng aeme aeqa kha käsi sa jawjaw saite na tea lä khaisö ö lawi. Hini ngaiphi tüng y saite na lä nang ce tea kaeling kaemae sa hai kha täphra hethang ngai ö te vi.

²³ Säthaw ma nang ce üng bälung hai kaedawng saite na tea lä kangthae-a sa sy.

²⁴ Säthaw lä nang ce tea äma üng täthei-a aeme aeqa saite kangthae py te vi. Säthaw üng aeme aeqa saite lä cungrü kha cai te vi. Tukätephüng-a hini aeme aeqa saite kangthae kätyng-a nang ce lä awng kha sa ö lawi.

²⁵ Tukätephüng-a nang ce lä ätete kaeling kaemae na jangni üng kätyng-a thui ö vi hang lawi. Mä-ai lä ätabung haetä üng kaepreng na kätyng vi te phüng-a, mä-ai angxynlyng na lä mä-ai ma üng yng saite rawijae na tea lo mitang xyng ni thui ö hethang kae.

²⁶ Nang ce kädawtho dylä, hunghö sa ö hang. Käni düng y te kälang-a ma kädawtho te aenawng ö lawi.

²⁷ Nang ce üng kädawtho jawjaw te hai Setan angra ma nang ce tea pyng hethang py ö hang.

²⁸ Jangni-a bäru saite khimi lä bäru jawjaw hethang kae y dy. Hini jung-a äni lä äma üng kö na hai aethaw rae kha kälu sa sy. Tudylä khimi kangtang na tea säbawng haw ai mang.

²⁹ Älo aetütü saite na hai khimi kälang na tea naw rung khytä aepe ö hang. Honi jüng-a, khimi kälang na aethaw dang saite lo na nang ce lä aepe ö. Thai saite na tähang aesäbawng saite lo na aepe ö ba.

³⁰ Säthaw üng Muilaw Käcai tea lä bälungsi hai ö hang. Säthaw lä Muilaw Käcai py te hai-a nang ce tea äsäny sa te vi. Hini äsäny hai kangkhüng üng käni-a nang ce bung Säthaw lä cungrü-a aeqang vi ai näte mätü te by vi.

³¹ Nang ce lä bälung thung-a khai khü te käsi dawng saite na, kädaw rae saite angxynlyng na hai, kädawtho saite, aejaw aemang saite, khimi ce phüng aeqa saite na hai esäre saite angxynlyng na tea lä khaisö ö lawi.

³² Nang ce lä nang ma ce tingtawi aebäheng kha bälung aevaw ö ba. Säthaw lä Isu Khrista üng phüng-a nang ce üng hunghö na bälawi te kätyng-a, hunghö na tea nang ma ce tingtawi la aebälawi ö.