Ephesi 3 - Caekäcai Kangthae (Lemi)

Pawlae ma ceng kälang na tea Angthang Kähawi thui pa

¹ Tukätephüng-a ceng kälang na tea Isu Khrista üng Angthang Kähawi thui te phüng-a thawng thung-a pä-ung saite kai, Pawlae, lä nang ce tähang aetang pa dy.

² Kai lä nang ce ceng kälang na tea Angthang Kähawi thui hethang Säthaw ma kai tea äma üng tähang kähawi hai-a py saite kälu lä nang ce thai tätang ö pyng te vi dy.

³ Säthaw lä äma üng ho saite kaedawng kai tea täphawng te vi dy. Kai lä hini phüng äje cäcaw nang ce tea tärü pyng te vi dy.

⁴ Hini tea phai te kätü-a Khrista üng ho saite angthang kai thaikaw saite tea nang ce la mäny ö ai mang.

⁵ Jangni üng dung-a Säthaw lä hini ho saite mawlang kaedawng khimi ce tea täphawng pa te y. Tungaila vaihi Säthaw lä äma üng angtawtha käcai na hai buisaw käcai na tea Muilaw Käcai hai-a hini mawlang kaedawng tea täphawng pa te vi dy.

⁶ Säthaw üng ho saite mawlang kaedawng lä hini vi. Angthang Kähawi phüng-a, ceng kälang na lä Judae khimi na hai mangtä Säthaw py saite tähang kähawi angxynlyng na lä dang ö by ai. Ceng kälang na hai Judae khimi na lä ätabung haetä kätyng lawng ö te vi. Nang ce ceng kälang na lä Isu Khrista hai-a Säthaw ma Judae khimi na tea aedo saite älo dang ö te by vi.

⁷ Säthaw lä äma üng tähang kähawi hai haidae hai-a kai tea hini Angthang Kähawi thui hethang mawsawng-a bälawng te vi dy.

⁸ Kai lä Säthaw üng khimi angxynlyng na thung-a aely leng y ky saite lawngtä vi. Tungaila Säthaw lä ceng kälang na tea Khrista üng tengxyng y tawngnang saite phüng thui hethang kai tea tähang kähawi py te vi dy. Hini Khrista üng tengxyng y tawngnang saite phüng lä khimi ce ma thaikaw saite qawng-a hawiky te vi.

⁹ Äte angxynlyng na sa saite Säthaw lä hini äma üng mawlang kaedawng tea jangni üng dung jungtä-a lä ho king kha khai pa te vi dy. Äma üng ho saite mawlang kaedawng lä ätemakä sa ai mei näte khimi angxynlyng na tea thui mäcai hai hethang Säthaw ma kai bung re te vi dy.

¹⁰ Hikä sa saite lä Säthaw üng cangxei te bälung kähae na tea vaihi lä yng saite kangkawng hai-a käni khösang-a haidae leng saite angra na hai angtawtha angxynlyng na tea mäny hai pa hethang vi dy.

¹¹ Säthaw lä älawng sa y te kälang üng hai ma hini kätyng-a mawlang kaedawng awng te vi dy. Äni lä honi tea mä-ai üng Areng Isu Khrista hai-a khüng rung khytä sa pa te vi dy.

¹² Mä-ai lä Khrista tea yng te hai äni hai bungtä awng te phüng-a, Säthaw üng maw-a ri y käla bälung ae-y khü kha ly haw ö te vi dy.

¹³ Tukha nang ce tähang kai lä mätangbälai hai te phüng-a, aethawsi ö y hethang nang ce tea kai lä aesi aebai he ngai te vi. Nang ce lä hini phüng-a aethaw te bälung awng ö hethang kae.

Pawlae üng aetang saite

¹⁴ Hini phüng-a kai lä mä-ai üng Pä-ai Säthaw üng maw-a khokhö didü kha aetang te vi.

¹⁵ Äni lä Känipre üng awng saite angtawtha angxynlyng na hai kälang angxynlyng na, hai älawngpre-a awng saite ceng angxynlyng na tea sa saite Pä-ai vi.

¹⁶ Säthaw lä äma üng leng bärai te phung-ang kätyng Muilaw Käcai üng haidae hai-a nang ce üng bälung thung-a aethaw py hethang kai lä aetang te vi dy.

¹⁷ Tukäte hai-a nang ce üng yng te phüng-a, nang ce üng bälung thung-a Khrista lä awng ai. Thingkawng lä älawng thung-a angjüng ru kha ca khi te kätyng nang ce lä Säthaw üng bälung aevaw saite thung-a cakhi ö by hethang kai lä aetang te vi.

¹⁸ Nang ce lä, Säthaw üng khimi angxynlyng na hai mangtä, Khrista üng bälung aevaw saite käthu käcawng, kaesang, käka hai kähanglaw na tea mäny te haidae awng haw ö hethang kai lä aetang te vi.

¹⁹ Khrista üng bälung aevaw saite lä leng bärai te phüng-a, khimi ce lä thaikaw haw king ö y lyng. Tungaila nang ce lä äni üng bälung aevaw saite tea mänykaw ö hethang kai lä aetang te vi dy. Tudylä Säthaw äma üng aeme aeqa saite na lä nang ce üng bälung thung-a awng kha cungrü haw ö vi ai.

²⁰ Mä-ai mäkai saite hai aedawng haw saite qawng-a, Säthaw lä awng mang-a py rae haw vi ai. Ätephüng-a mei nädylä äni üng haidae lä mä-ai üng bälung thung-a kälu sa te vi dy.

²¹ Khimi ce lä kangkawng thung-a, Isu Khrista hai-a Säthaw üng leng bärai saite phung-ang tea nung haw ö te vi. Tukätephüng-a mä-ai lä dungtäsa Säthaw tea bälaw ö si. Amen.