Angtawtha 9 - Caekäcai Kangthae (Lemi)

Sawlae üng khimi kangthae aelawng te phüng

¹ Honi kätü-a Sawlae lä Areng Isu tea Yng saite khimi na bung bädü hethang kätei te lo thui tütü pa te vi rawng. Äni lä mäthykung kälengky tea ly kha,

² Damasaka märü-a awng te Judae na üng ingkäcai mätawngky na tea py hethang cae mäkai pa vi. Sawlae lä Damasaka-a, Areng Isu üng leithung hui saite nawngmädi nawngmäcaw na bung aeting ea äni ce bung ne kha aethaw paitae hai-a, Jerusalem märü-a nähai hethang aenae ngai te vi.

³ Äni lä khölawng tho kha Damasaka märü teng-a tyng te kätü-a, käni mang üng kaevang haetä lä qengtäma äni üng äteng-a, aevang pheng praw pa vi dy.

⁴ Äni lä älawng qawng-a, aetüng praw kha äni hai älo aepe te tüng thai pa vi. Ätüng lä “Sawlae, Sawlae, nang lä ätephüng-a, kai tea sakälö khü te vi mei” näkha düng pa.

⁵ Sawlae ma “Areng ä, nang lä ämi mei” näkha düng pa. Äni ma “Kai lä nang ma sakälö khü saite Isu dy.

⁶ Tungaila nang lä aetha kha märü thung-a kung lawi. Nang makä sa ai mei näte khimi lawng lawngtä ma thui king pa ai mang” näpa.

⁷ Sawlae hai mangtä khölawng tho saite khimi na lä ri phi te hai älo aepe y käla ma, aedaw kha awng ö vi dy. Äni ce lä ätüng ma qaitä thaisö kha ämi bung la nung pa ö y vi.

⁸ Kangkhüng-a Sawlae lä älawng qawng üng aetha kha ämi bäli te kätü-a, äte haetä la nung pa y vi dy. Tukätephüng-a äni ce lä, Sawlae üng äkö-a süng kha Damasaka märü thung-a bähawi ö pa dy.

⁹ Äni lä käni thungtä khytä ämi aevang pa y. Honi käni thungtä käcakänei na lä ca y dy.

¹⁰ Damasaka märü-a lä, Anania näsaite Yng saite khimi lawngtä awng vi. Areng Isu ma äsämai mang hai-a “Anania ä” näkha äni tea ka pa vi. Anania ma “Areng ä, kai lä hi-a awng mang” näkha näpa.

¹¹ Areng ma “Nang lä lolang kätaw näsaite mang-a ly lawi. Judae üng ing-a Tasu märü üng Sawlae ämüng awng saite khimi lawngtä bung düng ba. Äni lä aetang kha awng te vi.

¹² Sawlae lä äsämai mang hai-a, Anania näsaite khimi lawngtä lä kung kha äni üng ämi aevang hai hethang tähang-a, älö-a äkö thyng te nung vi” näkha näpa.

¹³ Anania ma “Areng ä, äni lä Jerusalem märü üng käyng khimi na tea sakälö khü vi näte hai äni üng phüng khimi angxynlyng na ma, thui te lä kai thai vi.

¹⁴ Tukha Areng tea Yng saite khimi angxynlyng na bung ne hethang mäthykung käleng na te üng aenae dang pyng saite khimi vi” näkha näpa.

¹⁵ Tungaila Areng ma “Ly lawi. Äni bung lä kai üng mawsawng tähang-a, kai ma re te vi dy. Äni ma ceng kälang na hai äni ce sanphrang na hai, Isrelae khimi na tea Angthang Kähawi thui vi ai.

¹⁶ Äni lä kai üng phüng khimi ce tea thui te phüng-a, äni lä tengxyng y mätangbälai saite awng mang-a, aeting ai näte kai ma äni tea mäny hai vi ai.”

¹⁷ Tupyng-a Anania lä Sawlae awng saite ing-a ly kha Sawlae tea äkö thyng pa ea “Kangby ä, lolang-a nang tea aetüng pa saite Areng Isu ma kai bung nang tea mätaw te vi dy. Nang üng ämi aevang haile hethang tähang hai, Muilaw Käcai kawi hethang kai bung nang tea mätaw te vi dy” näkha näpa.

¹⁸ Qengtäma Sawlae ämi thung üng mawili kätyng-a, ämi üng aeqa pa vi dy. Ämi la aevang haile tyng pa. Äni lä aetha kha baptismae la vi dy.

¹⁹ Tupyng-a käcakänei na ca kha aethaw na awng haile tyng pa vi dy. Sawlae lä Damasaka märü-a Yng saite khimi na hai mangtä käni bäraw y-a awng pa vi.

Damasaka märü-a Pawlae ma älo thui pa

²⁰ Judae na üng ingkäcai thung-a kung praw kha Isu lä Säthaw üng Cäpaw vi näte phüng thui pa vi dy.

²¹ Äni üng älo thai saite khimi angxynlyng na lä cangxei ö phi vi dy. Äni ce ma “Hini khimi lä Jerusalem märü üng Isu tea Yng saite khimi na bung bädü saite khimi y mei. Hini mityng üng käyng na bung ne kha mäthykung käleng na tea nähai hethang äni lä ly te y vi mei.”

²² Tungaila Sawlae lä aethaw awng te hai, Areng Isu lä Mesia tätang vi näte phüng khüsälü-a, thui pa te thai ea lä, Damasaka märü üng awng saite Judae khimi na lä cangxei ö vi dy.

²³ Tupyng-a käni bäraw y awng te kätü-a lä, Judae mätawngky khimi na lä Sawlae bung bädü hethang kangru-a aedüng ö vi dy.

²⁴ Tungaila äni ce ma kangru-a aedüng te lä, Sawlae ma mäny va pa vi. Äni ce lä Sawlae bung bädü hethang kärung käni märü üng hawngkhae na-a aemaw ö vi dy.

²⁵ Tungaila Sawlae üng äkähui na lä kärung thung-a, äni bung paeceng thung-a mäceng kha märü üng baesung äkhaw mang ruinawng hai bäla käthu pa ö vi dy.

Jerusalem märü-a Sawlae tyng haile pa

²⁶ Sawlae lä Jerusalem märü-a tyng te kätü-a, Yng saite khimi na hai mangtä awng hethang aethaw aesa vi. Tungaila äni lä Yng saite khimi lawngtä by vi dy näte äni ce angxynlyng lä yng pa y kha äni tea ri pa ö vi.

²⁷ Tukha Banaba lä Sawlae bung angtawtha na tea nähai pa dy. Damasaka lolang-a Areng Isu bung Sawlae nung pyng saite phüng läsy, Areng Isu ma äni tea älo thui saite phüng läsy, Damasaka märü-a, Isu üng ämüng hai angthang thui vawng saite phüng na läsy thui pa dy.

²⁸ Sawlae la angtawtha na hai mangtä Jerusalem märü-a awng kha Areng Isu üng phüng ri y käla, khimi ce tea thui pa vi dy.

²⁹ Äni lä Käri lo aepe saite Judae na hai älo ae-e te vi. Tukha äni ce lä äni bung bädü he aethaw aesa pa ö vi dy.

³⁰ Honi phüng yng saite na thai te kätü-a lä, äni bung Kesari märü-a nähai pa kha, tupyng-a Tasu märü-a tha pa ja vi dy.

³¹ Honi kätü-a Judae khö, Kalile khö hai Samari khö mityng qütä-a kangkawng na lä awngneng pa vi dy. Kangkawng üng khimi na lä Areng Isu tea ri te bälung hai-a, awng kha Muilaw Käcai ma, äni ce tea säbawng kha aethaw py pa vi. Tukha yng saite na lä awng mang rae pa ö vi dy.

Luda märü hai Jopa märü-a Peterae tyng pa

³² Peterae lä mityng qütä-a khölawng tho kha Luda märü üng Säthaw Yng saite khimi na tea tyng pa vi dy.

³³ Honi märü-a lä Ania näsaite khimi lawngtä lä ängang dü kha säning täjaetä tütü aesawng ea awng saite khimi lawngtä bung nung dy.

³⁴ Peterae ma äni tea “Ania ä, Isu Khrista lä nang tea naw saite hawi sa te vi dy. Aetha kha i nae tea nang ma ma tä-yng lawi” näkha näpa. Ania lä qengtäma aetha praw pa vi dy.

³⁵ Luda märü hai Saron khö-a awng saite khimipui na lä, Ania bung nung kha Areng Isu tea yng ö vi dy.

³⁶ Jopa märü-a lä Abitha näsaite Isu tea yng te nawngmädi lawngtä awng. Äni üng ämüng tätang lä Käri lo hai-a, Doka näpa vi. Äni lä kähawi sa te hai mätang saite na tea säbawng he ngaiphi saite khimi vi.

³⁷ Doka lä kawngang naw kha dü pa vi dy. Äni üng äro bung lä tui bähu kha ing üng äqawng aekheng-a khai pa ö vi.

³⁸ Luda märü lä Jopa märü hai aenaidei vi kha yng saite na lä Luda märü-a Peterae awng näte mäny ö te vi. Tupyng-a khimi lawng netä bung Peterae tea mätaw pa vi dy. Tukha änini ma “Kai ce tea kärang-a ly dawde ba” näkha näpa.

³⁹ Tukha Peterae lä änini hai mangtä hui pö jaw dy. Tyng te kätü-a, khimi ce lä äni bung ing üng äqawng aekheng mang-a ka pa. Nawngmädi lömai nä-awi na lä Peterae üng äteng-a sävenglü kha Doka hing te thüng-a sa saite kä-o, käni na mätü kha raw pa ö vi.

⁴⁰ Peterae lä äni ce bung ärang mang-a tho hai pang kha khokhö didü ea aetang pa vi. Tupyng-a äro te mang-a aehawi kha “Abitha, aetha lawi” näpa. Äni lä ämi bäli ea Peterae bung nung kha aetha ea aety pa dy.

⁴¹ Peterae ma äkö-a süng kha mätha pa dy. Tupyng-a yng te khimi ce hai nawngmädi lömai na tea kähyng kha hing haile tyng saite Doka bung mätü pa vi dy.

⁴² Honi angthang lä Jopa märü-a awng saite khimi na lä honi angthang thai ö vi dy. Tukha khimipui na lä Areng Isu tea yng ö vi dy.

⁴³ Tukha Peterae lä Jopa märü üng raebawi phö kälu sa saite Simon hai mangtä käni käqae jaw-a awng vi dy.