Angtawtha 8 - Caekäcai Kangthae (Lemi)

¹ Sawlae la Stephen bung bädü te lä bälung aedü te awng by vi. Honi käni üng hai aetawng kha Jerusalem märü üng Yng saite khimi na lä mätangbälai te na tengxyng y aeting ö phi pa vi dy. Tukätephüng-a äni ce lä Judae khö hai Samari khö mityng qütä-a, pryng ö xhixae vi dy. Angtawtha na qaitä ni Jerusalem-a awng ö kae dy.

Äni ce lä kangkawng na tea sakälö khü pa

² Säthaw tea tämö khai saite khimi phütä na ma, Stephen bung aevui kha ätüng käleng hai-a, raw ö pa vi dy.

³ Tungaila Sawlae lä Yng saite khimi na bung täphra hethang aethaw aesa kha awng vi. Äni lä ing qütä-a kung kha Isu tea yng saite nawngmädi nawngmäcaw na bung ne kha thawng thung-a pä-ung pa ö vi dy.

Samari khö-a Angthang Kähawi thui pa

⁴ Yng saite khimi aeprei xhixae saite na lä, mityng qütä-a ly kha Angthang Kähawi thui ö vi.

⁵ Philip lä Samari khö üng märü kälengky-a, ly kha khimi ce tea Mesia üng Angthang Kähawi thui pa dy.

⁶ Khimipui na lä Philip ma thui saite angthang thai kha äni ma sa saite kamarae na la nung ea lä, äni üng älo thui saite na kähawi-a, tängai ö pa vi.

⁷ Philipi lä khimi kä-awng mang na te üng angra na bung mätho pa vi dy. Äni ce lä ätüng käleng hai hangrang kha thoja pa ö vi dy. Ängang kädü sö saite khimi na hai, kökho kangbai na tea la, Philipi ma naw hawi sa ö bawi pa vi dy.

⁸ Tukätephüng-a hani märü üng khimi angxynlyng na lä tengxyng y kawng ö phi pa vi dy.

⁹ Honi märü-a Simon näsaite khimi lawngtä awng vi. Äni lä angra buisaw käqae-a sa te vi. Tukha Samari khimi ce tea cangxei hai pa te vi. Äni lä khimi ce tea “Kai lä mätawngky dy” näkha näpa.

¹⁰ Tukha kaeneng kaesang üng khimi angxynlyng na ma “Hini khimi lä Säthaw ma käleng-a, khai kha haidae käleng hai sa te vi” näkha Simon üng älo tea tängai ö pa vi dy.

¹¹ Simon lä angra buisaw älang hai sa saite lä, khimi ce tea cangxei hai te lä, qae bärai vi dy te phüng-a, khimi ce lä äni üng leithung-a, hui ö vi dy.

¹² Tungaila Säthaw üng pre Angthang Kähawi phüng hai Isu Khrista üng ämüng phüng Philip ma thui te kätü-a lä, äni ce lä yng pa kha nawngmädi nawngmäcaw na lä, äni te üng baptismae la ö vi dy.

¹³ Simon äma mäteng ma yng kha Philip te üng baptismae la by vi dy. Tukha äni lä Philip leithung mityng qütä-a hui vi dy. Äni lä kamarae käleng na nung te phüng-a, cangxei phi pa te vi.

¹⁴ Jerusalem märü-a awng saite angtawtha na lä, Samari khö üng khimi na Säthaw üng Angthang tea yng ö vi dy näte thai saite kätü-a lä, äni ce ma Peterae ni Johan bung honi Samari khimi ce tea mätaw pa vi dy.

¹⁵ Peterae ni Johan tyng te kätü-a, Yng saite khimi na tea lä, Muilaw Käcai dang hethang tähang-a, änini ma aetang pa hawi vi dy.

¹⁶ Ätephüng-a mei nädylä honi kätü khytä Muilaw Käcai lä äni ce thung üng ämi tea lä tyng pa y vi rawng te phüng-a vi. Yng saite khimi na lä, Areng Isu üng ämüng hai-a baptismae la ö te kae vi.

¹⁷ Peterae ni Johan ma äni ce üng älö-a, äkö thyng saite kätü-a, äni ce lä Muilaw Käcai dang pa ö vi dy.

^18-19 Tukha angtawtha änini üng äkö thyng kha khimi ce Muilaw Käcai dang te Simon ma nung ea lä “Kai tea hini kätyng haidae py jo. Tudylä Kai ma äkö hai thyng saite khimi angxynlyng na la Muilaw Käcai dang haw vi ai” näkha angtawtha na tea tangkae py hethang ngai vi.

²⁰ Tungaila Peterae ma “Nang lä Säthaw üng lasawng bung tangkae hai rang he aedawng te phüng-a, nang ma üng tangkae hai mangtä nang lä pra sy.

²¹ Säthaw maw-a nang lä tüng y saite bälung awng te phüng-a, kai ce üng kälu thung-a nang lä qa haw y dy.

²² Tukätephüng-a, hini hawi y saite bälung kaedawng na tähang ae-ui lawi. Hikä bälung kaedawng kähawi y awng te hunghö bälawi hethang Areng tea aetang kha ae-ui lawi. Nang honi kätyng sa dylä Areng ma hunghö bälawi daila awng ai mang.

²³ Nang lä tengxyng y bälung pä-e te hai, hunghö üng mawsawng kätyng-a, awng näte kai mäny vi” näpa.

²⁴ Tupyng-a Simon ma “Nang ce thui saite ätete na tyng y hethang Areng tea kai tähang aetang pa kü jo” näkha mäthang pa.

²⁵ Tupyng-a änini lä Areng Isu üng phüng nung khe saite na hai, Säthaw üng Angthang phüng thui hawi pyng tea lä, Peterae ni Johan lä Jerusalem märü mang-a, vawi haile tyng hawi vi dy. Vawi saite lolang jungtä awng mang saite Samari vang na thung-a, Angthang Kähawi thui pa hawi dy.

Philipi hai Eithiopjae mätawngky

²⁶ Säthaw üng angtawtha lä Philip tea “Nang lä Jerusalem märü üng hai Kaza märü-a ly saite lolang kätyng ätüng mang-a ly ba. Honi lolang mang-a lä, khimi ce ly bärai ö y vi” näkha näpa.

^27-28 Tukätephüng-a Philip lä aetha kha ly vi dy. Tukha äni lä Eithiopia pre üng mätawngky khimi lawngtä hai, aeting pa vi dy. Äni lä Eithiopia pre üng Kangda näsaite sanphrang nä-awi üng kätui awicae angxynlyng na rui pa saite aely kälengky khimi lawngtä vi. Äni lä Jerusalem märü-a ly kha Säthaw tea cäphaw pyng ea äma üng ing mang-a vawi haile tyng te vi. Tukha äni lä äma üng kaeri qawng-a, aedang ea buisaw Isaia üng tärü saite cae-u tea ätüng tho te hai-a, phai pa vi.

²⁹ Muilaw Käcai ma Philip tea “Honi kaeri teng-a ly kha awng ba” näpa.

³⁰ Tukha Philip lä honi kaeri teng-a aehui vi dy. Honi mätawngky lä äteng-a tyng ea lä buisaw Isaia üng tärü saite cae-u tea äni phai te tüng thai pa ea lä “Nang phai saite cae üng älawngsai tea lä nang mäny vai mei” näkha düng pa dy.

³¹ Äni ma “Kai tea thui mäcai saite khimi awng y hi lä, Kai lä mäny haw y vi” näpa. Tupyng-a Philip tea lä kaeri qawng-a paw kha äni hai mangtä aedang hethang ka pa dy.

³² Honi mätawngky phai saite Caekäcai ping-a lä, “Khimi ce ma äni bung beram kätyng ra hethang nähai ö vi. Beram lä ämui ba saite khimi na üng maw-a, sitäri-a awng te kätyng äni lä täbawng aepho y käla awng pa vi.

³³ Äni bung säri mäneng te kätü-a, kätüng-a thui pa hethang ämi lä awng y. Äni üng ceng kaesui na phüng ämi la thui pa haw y. Äni ce lä äni bung älawngpre-a, bädü te phüng-a vi” näpa.

³⁴ Honi mätawngky ma Philip tea “Buisaw lä ämi üng phüng thui te mei. Äma üng phüng mei. Khimi kälang lawng lawngtä üng phüng mei. Kai tea thui mäcai jo kae-e” näkha näpa.

³⁵ Philip ma honi Caekäcai ping älang thung üng hai aetawng kha Areng Isu üng Angthang Kähawi thui pa vi dy.

³⁶ Änini lä khölawng tho te kätü-a, tui awng saite mityng-a, tyng hawi dy. Honi kätü-a mätawngky ma “Hini mityng-a lä, tui awng dy. Kai lä baptismae la hethang dang y mei” näkha düng pa.

³⁷ Philip ma “Nang ma Areng Isu tea bälung mitang hai yng khü dylä, kai ma baptismae nang tea py ai mang” näpa. Mätawngky ma “Areng Isu lä Säthaw üng Cäpaw näte kai lä yng vi” näkha mäthang pa dy.

³⁸ Tukha mätawngky lä kaeri bung aenawng hai kha änini lä tui thung-a aerung hawi dy. Tupyng-a Philip ma mätawngky tea baptismae py pa vi dy.

³⁹ Änini tui thung üng paw hawi te kätü-a lä, Säthaw üng Muilaw Käcai ma Philip bung mityng kälang mang-a, bähawi kha mätawngky lä, äni bung nung haile tyng pa y vi dy. Tungaila äni lä lolang jungtä anghawtho bärai te hai ma, khölawng tho jawjaw vi dy.

⁴⁰ Tukha Philip lä Azotae märü-a tyng vi dy. Khölawng tho prei kha märü haetä pyng-a haetä-a kung ea Angthang Kähawi na thui prei pa vi dy. Kangkhüng-a lä Kesari märü-a tyng dy.