Angtawtha 28 - Caekäcai Kangthae (Lemi)

Malta angrai sälawng-a tyng te

¹ Kai ce lä kähawi-a mepui qawng-a tyng pyng ea, hini lä Malta angrai sälawng näte mäny ö vi dy.

² Angrai sälawng üng khimi na angxynlyng lä kai ce tea bäheng kha säbawng ö vi. Khöne kha de phi pa te phüng-a, äni ce lä kai ce tähang maiti kha kai ce tea lady ö vi dy.

³ Pawlae lä thing aecawng ea mai thung-a thing ti pa dy. Tukha thing aecawng saite üng bärui metä lä tho ea Pawlae üng äkö-a mätu kha aehawi loko pa vi dy.

⁴ Äni üng äkö-a aehawi loko saite bärui tea angrai sälawng üng khimi na ma nung ea lä “Hini lä khimi bung bädü saite khimi ngaw müng. Pangle-a kädü thung üng aelawi ngaila tärawitha saite angra ma lä äni tea hing hethang py pa y lyng” näkha äma ce tingtawi aethui ö vi.

⁵ Tungaila Pawlae lä bärui tea mai thung-a, käthüng kha kädepö pa vi dy. Äni lä äte haetä la naw te awng pa y vi.

⁶ Äni ce ma Pawlae lä ba vi ai. Tukä y dylä qengtäma aetüng ea dü ai näkha aering kha kheng ö rü te vi. Hini kätyng käqae-a aering ngaila Pawlae lä ätemakä la, awng pa y vi te nung ea lä, äni ce lä bälung äkälang dawng kha “Hini lä angra vi ai” näkha thui ö vi dy.

⁷ Honi mityng teng üng angrai sälawng-a, mätawngky Publiu üng älawng na lä awng vi. Äni lä kai ce bung ing-a lady kha käni thungtä tütü mäcaw mänei pa te vi.

⁸ Publiu üng pä-ai lä kawngang naw te hai, äjosaw kha aesawng pa vi. Pawlae lä känaw awng saite mityng-a ly kha Säthaw tea aetang pa. Tupyng-a äni üng qawng-a, äkö thyng kha äni tea naw hawi hai pa vi dy.

⁹ Tupyng-a honi angrai sälawng üng naw saite khimi angxynlyng na lä, Pawlae tea ly ö dy. Pawlae ma äni ce tea naw te na hawi hai bawi pa vi dy.

¹⁰ Äni ce lä kai ce tea tämö khai phi ö vi dy. Kai ce ly hethang kätü tyng ea kai ce üng aely ngai saite angxynlyng na tui sangphaw qawng-a tha pa ö vi dy.

Rom märü-a Pawlae tyng te

¹¹ Law thungtä qae pyng ea lä, kai ce lä honi angrai sälawng-a säding-a aehae saite tui sangphaw hai aedang ö vi dy. Honi tui sangphaw lä Alesanda märü mang üng ly te vi. Angra kangby jä-ai Kaephe lawng netä näkha ämüng awng te vi. (Honi tui sangphaw üng ämaw-a Kasta hai Polu näsaite kangby jä-ai Kaephe üng mimi tea thui te vi dy.)

¹² Kai ce lä Siraku märü-a tyng ea tui sangphaw lä käni thungtä aehae vi dy.

¹³ Honi märü üng tho kha Rikion märü-a tyng ö dy. Kädang mang-a lä ätüng mang üng aeli tho te phüng-a, käni netä qae te kätü-a lä Puteoli märü-a tyng ö vi dy.

¹⁴ Honi märü-a lä Yng saite khimi phütä na hai aeting ö vi dy. Tukha äni ce lä äma ce hai käni säritä awng hethang mäkai pa dy. Tukha kai ce lä Rom märü-a äkho hai ly kha tyng ö dy.

¹⁵ Rom märü üng Yng saite khimi na lä kai ce tyng te phüng mäny kha Apiu üng vyngjaw saite mityng hai, Cärai Käthungtä näsaite märü khytä ly kha lady ö vi. Pawlae lä äni ce bung nung ea Säthaw tea kawng te lo thui kha aethaw dang vi dy.

Rom märü-a Säthaw üng kälu sa pa

¹⁶ Rom märü-a tyng ea Pawlae lä rui saite reisae lawngtä hai mangtä awng he dang dy.

¹⁷ Käni thungtä qae pyng ea Pawlae ma Judae mätawngky na bung kähyng vi dy. Äni ce lä aekäcö qu ea Pawlae ma “Kangby jä-ai na ä, kai lä mä-ai üng khimi na tea hai, kangsi na üng reitae tea äte haetä la sa tämang te awng y. Tungaila Judae khimi na lä Jerusalem märü-a kai bung ne kha Rom khimi na tea a ö te vi dy.

¹⁸ Äni ce lä kai tea älo cei pyng ea bädü hethang sa ö te vi. Tungaila sa tämang te awng pa y te phüng-a, kai bung äni ce lä bälawi hethang ngai ö vi.

¹⁹ Tungaila Judae khimi na lä älo ae-e te phüng-a, kai lä Sica Sanphrang tea tyng te khytä mäkai te vi. Tungaila mä-ai ma üng khimi na tea käsi thui hethang awng te y vi dy.

²⁰ Tukha nang ce hai aeting kha älo thui hethang kai lä mäkai te vi dy. Kai tea hini singqy rui hai mäkhing te lä, Isrelae khimi na aethang khai saite Mesia phüng-a vi” näpa.

²¹ Äni ce ma “Kai ce lä nang üng phüng Judae khö üng cae lä dang te y vi. Isrelae pre üng ly saite kai ce üng yng te khimi ämi lawngtä la nang üng phüng hawi y saite na thui te y vi.

²² Tungaila nang hai aesui saite hini kangkawng phüng ae-e kha mityng qütä-a thui saite na kai ce lä thai vi. Tukätephüng-a nang üng yng saite phüng na kai ce lä thai hethang ngai vi” näpa.

²³ Tudylä äni ce ma Pawlae tea aeting hethang käni rui aedo pa ö dy. Aedo saite käni-a Pawlae üng ing-a khimi ce ly ö mang pa dy. Pawlae lä kädang üng hai kädüng khytä Säthaw üng pre phüng kähawi-a thui mäcai pa dy. Mosi üng Ubädi hai buisaw na tärü saite cae tea kheng kha Isu üng phüng la äni ce bälungva hethang kähawi-a bäleng kha thui pa vi.

²⁴ Khimi phütä na lä Pawlae üng thui saite älo tängai ngaila phütä na lä yng ö y vi.

²⁵ Pawlae thui pyng te kätü-a Judae khimi na lä äma ce tingtawi ae-e kha vawi ö vi dy. Pawlae kangkhüng-a thui saite älo lä, “Buisaw Isaia hai nang ma ce üng kangsi na tea Muilaw Käcai ma thui te lä tätang khaw vi.

²⁶ ‘Hini khimi na tea ly kha thui ö lawi. “Nang ce lä känawkhing hai thai jawjaw ngaila thaikaw ö y vi ai. Nang ce lä ämi hai nung jawjaw ngaila mäny ö y vi ai.”

²⁷ Ätephüng-a mei nädylä hini khimi na üng bälung lä tangkö te vi. Äni ce lä känawkhing pang ö te vi. Äni ce üng ämi lä bäjö ö te phüng-a vi. Tukä y dylä äni ce lä känawkhing hai thai ö ai. Äni ce üng ämi hai nung haw kha bälung hai la mäny va haw ö vi ai. Äni ce lä hini kätyng awng kha kai tea aekö haile dylä, äni ce tea känaw käsaw hawi sa pa ö vi ai.’

²⁸ “Tukätephüng-a Säthaw ma khimi ce bung aeqang saite angthang lä ceng kälang tea tyng pyng vi dy. Äni ce lä tängai ai näte nang ce lä mäny ö lawi” näpa.

²⁹ (Hini kä Pawlae ma thui pyng ea, Judae khimi na lä äma ce tingtawi älo ae-e täto kha ly ö pang vi dy.)

³⁰ Pawlae lä honi märü-a äma vanglang saite ing-a säning netä awng vi dy. Äma üng ing-a ly saite khimi angxynlyng na tea kähawi-a lady pa vi dy.

³¹ Äni lä ri y te hai ma Säthaw üng pre phüng hai Areng Isu Khrista phüng khimi ce tea thui kha mätu pa vi dy. Ämi lawngtä la äni tea mäkhang pa y.