Angtawtha 27 - Caekäcai Kangthae (Lemi)

Rom märü mang-a Pawlae tui sangphaw aedang te

¹ Aecörae mätawngky Festus ma kai ce bung Itali pre-a tui sangphaw aedang hethang thui vi. Tupyng-a Pawlae hai thawng thung üng khimi phütä na bung Julia näsaite reisae cungvaitä na üng kälengky tea a pa vi. Reisae kälengky Julia lä, Sica sanphrang üng reisae kangkawng näsaite reisae kangkawng thung üng vi.

² Adramiti märü üng tyng saite tui sangphaw qawng-a paw kha tho ö vi dy. Kai ce lä Adramiti märü üng tyng saite tui sangphaw lä Asia pre cäpi tävaw pyng jungtä ly kha tui sangphaw aehaenae mityng na mang-a tyng he tähang vi. Makedonia khö Thesalonika märü üng Aristaku lä kai ce hai mangtä ly te by vi.

³ Kädang mang-a kai ce lä Sidon märü-a tyng ö vi dy. Tukha Julia lä Pawlae tea bäheng kha äma aely ngai saite na säbawng haw hethang rawijae na hai aeting hai pa dy.

⁴ Honi märü üng tho ea lä aelipui tho te hai aeting te phüng-a, Saipära angrai sälawng üng aeli aekhü saite mang-a ly ö dy.

⁵ Kiliki khö hai Pamphulia khö mang üng pangle tea aekae pyng ea lä, Luki khö üng Mira märü-a tyng ö vi dy.

⁶ Honi märü-a reisae kälengky ma Itali pre-a ly hethang Alesanda märü üng tyng saite tui sangphaw haetä tea nung vi dy. Tukha kai ce bung honi tui sangphaw qawng-a paw hai vi dy.

⁷ Kai ce lä käni qae bärai te hai ma kangjai kangjai-a ly kha Kidos märü kaenai-a rae bärai te hai tyng ö vi dy. Aeli tho te nyng kha kai ce lä Salmoni äteng äpa-a mang hai Kreti angrai sälawng aeli aekhü te mang-a aedang ö vi dy.

⁸ Kai ce lä rae bärai te hai ma Käri pre üng pangle pyng hai aenai saite mang-a ly kha Tui sangphaw Aehae nae Hawi näkha ämüng awng saite mityng-a tyng ö dy. Honi teng-a lä Lasia märü awng te vi.

⁹ Kai ce lä kätü na byng mang kha hunghö bälawi saite käni tea cäqengja te vi dy. Tukätephüng-a tui sangphaw hai khölawng tho te lä ri hethang hawi vi. Pawlae lä äni ce tea hini kätyng älo na thui pa vi dy.

¹⁰ Tukha Pawlae ma “Khimi na ä, vaihi kätü-a pangle thung-a khölawng tho he nädylä, ri he hawi phi. Tui sangphaw hai vyngsai na la te cang y mä-ai üng hing saite la, la haw ai te phüng, kai lä mäny vi” näkha thui pa.

¹¹ Tungaila reisae kälengky lä Pawlae üng thui te älo qawng-a, tui sangphaw kung hai tui sangphaw üng kälu sämae üng thui saite älo tea yngky pa te vi.

¹² Hini tui sangphaw aehae nae-a lä säding jungtä aehae hethang hawi y te phüng-a, khimi ce angxynlyng lä hini mityng üng tho ea Phoni märü-a tyng haw dylä tyng rung khytä ly kha säding-a aehae he ngai ö te vi. Phoni tui sangphaw aehaenae lä Kreti angrai sälawng-a awng kha käni kädüng, älüng hai käni kädüng ätüng mang-a, aehawi ea awng te vi.

Pangle-a aeli kangcai tho pa

¹³ Tävaw ätüng mang üng aeli lä tho te aetawng ea tui sangphaw üng khimi na lä äma ce üng aedawng te kätyng mawcawng hethang aepö kha tui sangphaw aehae ea cakhi hai nae süng käleng aetho kha Kreti tui teng-a jungtä aenai rae rung khytä ly ö vi dy.

¹⁴ Tungaila qae y tea ma käni käse hai älüng mang üng aeli kangcai aethaw awng phi saite lä mepui mang üng tho pa vi dy.

¹⁵ Tui sangphaw lä aelipui hai aeting pa te phüng-a, ly hethang dang y vi dy. Tukha äni ce lä ly hethang ngai saite mityng-a ly haw y vi dy. Aeli tho saite mang-a aebaja kae vi dy.

¹⁶ Koda näsaite angrai sälawng cäpi ätüng mang-a tyng ea lä aeli aekhü pa vi dy. Tukha honi mityng-a tui sangphaw leithung üng bälawng cäpi bung pra y rung khytä rae bärai te hai ma cakhi-a sa hai pa vi dy.

¹⁷ Tui sangphaw üng kälu sämae na lä honi bälawng bung täryng ho ea mäkhing vi dy. Tui sangphaw tea ätäkui mang ruinawng hai mäkhing kha cakhi rung khytä sa ö vi dy. Äni ce lä Lebia pre üng bälang-a, tui sangphaw aetang rang he mawng te phüng-a, tui sangphaw üng jae saite libyng na bäla kha aeli tho saite mang-a aebaja hai ö vi dy.

¹⁸ Tukha kädang khytä aeli kangcai lä tho jawjaw pa kha äni ce lä vyngsai na tea tui sangphaw qawng üng käde phae ö vi dy.

¹⁹ Ämäthung käni-a lä tui sangphaw üng tawng saite vyngsai na äni ce lä pangle thung-a käde phae ö be vi dy.

²⁰ Kai ce lä käni bäraw y-a käni, law, tengpaw na tea nung haw y vi dy. Aeli la aethaw hawi te hai aenawng y käla ma, tho jawjaw te vi. Kangkhüng-a kai ce lä hing hethang mäteng ma aethang khai ö y te vi dy.

²¹ Khimi ce lä käni bäraw y, ca nei y käla awng ö te vi. Tupyng-a Pawlae lä äni ce maw-a aedaw kha “Khimi na ä, nang ce lä kai üng lo tängai kha Kreti angrai sälawng üng tho y käla awng ea kha lä, hini kätyng mätang saite hai pra saite na aeting ö y vi ai.

²² Tungaila vaihi lä aethawsi ö hang. Nang ce thung-a ämi la dü y lyng. Tui sangphaw ma qaitä ni pra he kae mang.

²³ Jangdüng kärung-a kai cäphaw saite Säthaw üng angtawtha lawngtä lä kai teng-a aedaw kha

²⁴ ‘Pawlae ä, ri hang ba. Nang lä Sica sanphrang üng maw-a aedaw he kae. Säthaw üng tähang kähawi phüng-a, nang hai mangtä tui sangphaw aedang saite khimi angxynlyng na bung kädü thung üng aelawi hai vi ai’ näpa.

²⁵ Tukätephüng-a aethawsi ö hang. Kai lä Säthaw tea Yng saite khimi vi. Tukha kai tea Säthaw üng angtawtha ma thui te kätyng lä, tyng khaw vi ai näte kai lä yng vi.

²⁶ Tungaila mä-ai üng tui sangphaw lä angrai sälawng haetä qawng-a aetang kha awng vi ai” näpa.

²⁷ Käni hawlai bälitä tyng saite kädüng-a, kai ce üng tui sangphaw lä Adriatic pangle-a aeli tho saite mang-a, aebaja kha awng vi. Kärung angnihü rytä-a lä, tui sangphaw üng kälu sämae na lä tui teng hai aenai dy müng näte aedawng ö vi dy.

²⁸ Tukha äni ce lä tui thu mei näte mätae kha pe cungvai kuisytä awng te mäny ö vi dy. Tukha ämaw mang-a ly sosei kha mätae be ea lä, pe rui täkawtä awng te mäny ö vi dy.

²⁹ Äni ce lä kälung bärawng na hai aetei he ri te phüng-a, tui sangphaw äpai mang tui sangphaw aehae ea cakhi hai saite süng käleng bälitä tea käde kha khö aevang lawi sy näkha aetang ö vi dy.

³⁰ Tui sangphaw üng kälu sa saite na lä aehae ea cakhi hai saite süng käleng na bung bäla te käjüng sa kha bälawng cäpi tui thung-a bäla ea aedang kha aehuija he sa ö vi dy.

³¹ Tukha Pawlae la reisae kälengky hai reisae na tea “Hini tui sangphaw üng kälu sämae ce tui sangphaw qawng-a awng jaw y dylä, nang ce lä aelaw haw y lyng” näpa.

³² Tukätephüng-a reisae na lä bälawng cäpi üng ruinawng bung täleibae kha bälawng tea tho hai pa vi dy.

³³ Khö aevang aetawng-a, Pawlae lä khimi ce angxynlyng tea käcakänei na ca hethang bälang kha “Nang ce lä äte haetä la ca y käla ma awng te lä käni hawlai bälitä awng vi dy. Nang ce lä äte käcakänei la ca ö y vi.

³⁴ Nang ce hing he käcakänei ca hethang tähang-a, kai lä vaihi aebai kha thui te dy. Nang ce thung-a ämi üng äsangme haetä la, la y lyng mang” näpa.

³⁵ Tupyng-a Pawlae lä täkaw süng kha äni ce üng maw-a, Säthaw tea kawng te lo thui vi dy. Tukha täkaw täpe ea ca hai pa ö vi dy.

³⁶ Tukha äni ce angxynlyng lä aethaw dang haile kha käcakänei na ca ö tyng dy.

³⁷ Tui sangphaw qawng-a khimi angxynlyng na lä lawng cungvai netä hai rui säri tärutä awng vi dy.

³⁸ Khimi ce angxynlyng mängae rung khytä ca pyng ea tui sangphaw jang hai kü hethang kjung caw ni na pangle thung-a käde ö pang vi dy.

Tui sangphaw pra pa

³⁹ Khö aevang ea lä tui sangphaw üng kälu sämae na lä äma ce mani mityng-a, tyng dy mei näte mäny ö y vi dy. Tungaila tävaw pyng üng täpung bälang haetä nung te phüng-a, honi mityng-a, tui sangphaw tyng haw hethang aedawng ö vi dy.

⁴⁰ Äni ce lä aehae ea cakhi hai saite süng käleng ruinawng tälei bae kha pangle tui thung-a käde ö vi. Qengtäma tui sangphaw haw saite äpai mang üng ruinawng na lä sö kha tui sangphaw ämawng-a jae saite äsae na jae ea tui teng mang-a haw ö vi dy.

⁴¹ Tungaila tui sangphaw lä bälang-a ky kha aetang rang pa vi dy. Tui sangphaw ämawng lä täpung älawng ngang-a, kungju kha cakhi-a awng te phüng-a aecü y pa vi dy. Tui sangphaw äpai mang-a lä tuileng ma bo te phüng-a aekhy he sa pa vi dy.

⁴² Reisae na lä thawng thung üng khimi na tuija kha aehui pang ai näte bälungbi pa te phüng-a, äni ce bung bädü hethang aedüng ö dy.

⁴³ Tungaila reisae kälengky lä Pawlae bung hing hai hethang ngai te phüng-a, reisae na üng aedüng te kätyng sa y hethang mäkhang pa. Tukha tuija kaw saite khimi na bung lä angcü-a tui sangphaw qawng üng säly kha tui teng mang-a ja hai pa vi dy.

⁴⁴ Tupyng-a äkälang na bung pephei hai tui sangphaw pra saite üng vyng na qawng-a aedang hai kha aekae hethang älo thui pa dy. Hini kätyng-a kai ce angxynlyng lä kädü thung üng aelawi kha mepui-a kähawi-a tyng ö vi dy.