Angtawtha 26 - Caekäcai Kangthae (Lemi)

Akripa sanphrang maw-a Pawlae awng te

¹ Akripa sanphrang ma “Nang thui haw dy” näkha Pawlae tea näpa. Tukha Pawlae lä äkö bäjae kha,

² “Akripa sanphrang ä, kai tea Judae khimi na ma käsi thui saite na phüng vaihi nang üng ämaw-a kai thui he dang te kai lä kawngphi vi.

³ Nang lä Judae khimi na üng reitae na hai älo ae-e saite phüng angxynlyng na kähawi-a mäny te vi. Tukätephüng-a kai thui saite lo tea änawng käsa hai tängai pa jo.

⁴ “Kai lä nade käni üng hai ma kai üng pre-a hai, tupyng-a Jerusalem märü-a makä awng mei näte Judae khimi na lä mäny ö bawi te vi dy.

⁵ Kai bung äni ce mäny te lä qae vi dy. Kai lä Judae na üng kangkawng thung-a Ubädi kähawi-a tängai khü saite Pharisai vi näte äni ce ma ngai dylä thui haw mang.

⁶ Säthaw lä kai ce üng kangsi sangrung na tähang khai pa te älo aedo saite tea kai üng aethang khai te phüng-a, vaihi kai lä älo aecei hethang hi-a aedaw te vi dy.

⁷ Kai ce Judae ceng hawlai netä na ma kärung käni Säthaw tea cäphaw kha aethang khai te hai aering ö pa saite aedo te älo vi. Akripa sanphrang ä, hini aethang khai te phüng-a, kai tea Judae khimi na ma käsi thui ö te vi.

⁸ Kädü na bung Säthaw ma mätha haile tyng te hi-a awng saite nang ce lä ätephüng-a yng he ngai ö y te mei.

⁹ “Kai ma la Nazare märü üng Isu ämüng tea e hethang aethawsa te lä aeteng vi näkha yng vai te vi.

¹⁰ Hini kätyng Jerusalem märü-a kai lä sa te by vi dy. Mäthykung käleng üng aenae hai Yng saite khimi angxynlyng na bung kai ma thawng thung-a pä-ung pa te vi. Äni ce bung bädü saite kätü-a lä kai la bälung mangtä aedü te by vi.

¹¹ Kai lä Judae na üng ingkäcai-a ly kha äni ce tea bäjeng hai tütü te vi. Äni ce üng yng saite na khaisö hai hethang kai aethawsa te vi. Äni ce tea kai lä esäre phi te vi. Tukha kai lä pre kälang üng märü na mang-a ly kha äni ce tea sakälö khü pa te vi dy.

Pawlae lä äma yng saite phüng thui pa

¹² “Hini kätyng sa hethang kai lä mäthykung käleng üng aenae hai-a, äni ce te üng dang te cae süng kha, Damasaka märü-a ly te vi dy.

¹³ Sanphrang ä, hokä ly te kätü, käni anghung-a, käni mang üng kaevang haetä lä kai hai mangtä ly saite äpy tea säveng lükü kha aevang pheng te kai lä nung vi dy. Honi kaevang lä käni qawng-a angky vi.

¹⁴ Tukha kai ce angxynlyng lä älawng qawng-a aetüng praw ö vi. Tupyng-a Hebärai lo hai kai tea ‘Sawlae, Sawlae, nang lä ätephüng-a kai tea sakälö khü te vi mei. Nang lä kai aely ngai saite tea e dylä nang mani naw hethang kae vi’ näsaite ätüng kai lä thai vi.

¹⁵ Tupyng-a kai ma ‘Areng ä, nang lä ämi mei’ näkha düng pa. Äni ma ‘Kai lä nang ma sakälö khü saite Nazare märü üng Isu dy.

¹⁶ Tungaila vaihi aetha kha aedaw lawi. Nang bung kai üng mawsawng sa hai hethang nang tea kai ly te vi dy. Vaini nang nung pyng saite na hai, ämaw mang-a kai ma nang tea mätü hethang awng saite na phüng, khimi ce tea thui hethang kae.

¹⁷ Kai lä nang bung Isrelae khimi na kö thung üng hai, ceng kälang khimi na kö thung üng la aelawi hai ai mang.

¹⁸ Nang lä ceng kälang khimi na üng ämi tea aevang hai pa he kae. Äni ce bung käving thung üng hai kaevang mang-a aekö hai lawi. Tukha Setan angra üng haidae thung üng hai Säthaw te mang-a, tyng hai hethang kae. Äni ce lä kai tea yng te phüng-a, Säthaw ma äni ce üng hunghö na bälawi pa ai. Säthaw ma re saite khimi na thung-a, awng haw hethang mityng py ai. Hini kä aelawng hethang kai lä nang bung mätaw te vi.’

Pawlae äma üng sa saite phüng thui pa

¹⁹ “Akripa Sanphrang ä, kai lä käni mang üng äsämai tea tängai khü te vi dy.

²⁰ Angcü-a Damasaka märü-a, tupyng-a Jerusalem märü üng khimi na hai, Judae khö üng khimi qütä tea hai, ceng kälang khimi na tea la Säthaw te mang-a aekö haile tyng te hai hunghö aedawng mäkhüng hethang kai lä äni ce tea thui pa te vi. Tätang khü-a aedawng mäkhüng dy näte mätü hethang äni ce lä hawi saite kälu sa hethang kae vi näkha kai thui te vi.

²¹ Tukätephüng-a Judae khimi na lä Säthaw üng Ingkäcai thung-a kai bung ne kha bädü hethang aethawsa ö vi.

^22-23 Tungaila Säthaw lä kai tea säbawng te phüng-a, vaini khytä kai lä hing kha khimi cäpi käleng angxynlyng na tea Lo Angthang thui te vi. Mesia lä dü he kae näte hai kädü thung üng hai angcü-a aetha tyng ai näte phüng kai thui te vi dy. Tukätephüng-a Mesia lä Isrelae khimi hai, ceng kälang khimi na tähang äkaevang vi kha äni ce bung aeqang ö pa te vi. Mosi hai buisaw na ma thui te kätyng kai la thui te by vi” näkha näpa.

²⁴ Hini kätyng thui ea aecörae mätawngky Festus lä “Pawlae ä, Nang lä mäthö te vi dy. Mäny pro kha mäthö te vi dy be tu” näkha hang pa.

²⁵ Pawlae ma “Aecörae mätawngky Festus ä, kai lä mäthö te y vi. Nang tea mitang khü-a kai thui te kae vi.

²⁶ Hini phüng na lä Sanphrang nang ma mäny be ä. Tukätephüng-a kai lä äni üng maw-a thui vawng te vi. Hini phüng na lä khimi angxynlyng ma mäny ö te vi. Honi phüng angxynlyng na tea Sanphrang ma mäny king pyng vi dy näkha kai lä yng te vi.

²⁷ Akripa Sanphrang ä, nang lä buisaw na üng älo yng cäkae mei. Nang yng te phüng kai lä mäny te vi” näkha näpa.

²⁸ Akripa Sanphrang ma “Nang lä hikä kätü dawi tea kai bung Khristen aelawng hai hethang bäleng haw he aepö vi nang mei” näpa.

²⁹ Pawlae ma “Kätü dawi te, sa te lä aely leng y lyng. Sanphrang, nang hai vaini mangtä kai thui te lo tängai saite khimi angxynlyng na lä kai kätyng awng king by hethang Säthaw tea kai lä aetang te vi. Tungaila nang ce tea kai bung mäkhing te kätyng awng hai hethang lä ngai te y vi” näpa.

³⁰ Tudylä Sanphrang hai mangtä äma üng äticaw käna Berni hai aecörae mätawngky Festus hai, khimi angxynlyng na lä aetha kha ly ja ö vi dy.

³¹ Äni ce lä honi mityng üng ly ja pyng ea lä “Äni lä dü hethang hai thawng thung-a pä-ung hethang khytä, sa tämang saite haetä lä awng te y” näkha äma ce tingtawi aethui ö vi dy.

³² Akripa ma “Hini khimi lä Sica sanphrang tea tärae aecei hethang mäkai te awng y kha lä, äni bung bälawi haw vi dy” näkha aecörae mätawngky Festus tea thui pa vi dy.