Angtawtha 25 - Caekäcai Kangthae (Lemi)

Aecörae mätawngky Festus maw-a Pawlae awng te

¹ Aecörae mätawngky Festus lä honi khö-a tyng kha käni thungtä qae ea Kesari märü üng hai Jerusalem märü-a ly vi dy.

² Mäthykung kälengky na hai Judae mätawngky na ma Pawlae lä sa tämang te awng mang saite phüng Festus tea thui pa ö vi.

³ Äni ce lä Pawlae bung lolang-a aemaw kha bädü hethang kangru-a aedüng ö vi dy. Festus lä äni ce maw-a mimai dang hethang Pawlae bung Jerusalem märü-a nähai hethang Festus tea mäkai dawde pa ö vi dy.

⁴ Tungaila aecörae mätawngky Festus ma “Kesari märü-a Pawlae bung lä thawng thung-a pä-ung pa te vi. Honi märü-a lä qae y tea kai ma ly khe ai.

⁵ Nang ce üng mätawngky na lä kai hai mangtä hui kha Pawlae sa tämang saite hae haetä awng dylä kai üng maw-a thui ö sy” näpa.

⁶ Aecörae mätawngky Festus lä Jerusalem märü-a käni täjaetä awng pyng ea Kesari märü-a ly vi dy. Kädang mang-a lä älo cei saite mityng-a aety kha Pawlae bung nähai hethang älo py pa dy.

⁷ Pawlae tyng saite kätü-a lä, Jerusalem märü üng ly saite Judae khimi na ma äni tea sävenglü kha käsi thui pa ö vi dy. Tungaila äni ce lä äte sasi lo na mätü haw pa ö y vi.

⁸ Tupyng-a Pawlae ma “Kai lä Judae na üng Ubädi hai, Säthaw üng Ingkäcai hai, Rom sanphrang Sica tea äte haetä la käsi sa te awng y lyng” näkha thui haile pa.

⁹ Tungaila aecörae mätawngky Festus lä Judae khimi na thung-a, ämüng kähawi dang hethang ngai kha Pawlae tea “Nang lä Jerusalem märü-a ly kha ho-a kai üng maw-a hini lo cei hethang ngai te mei” näkha düng pa.

¹⁰ Tukha Pawlae ma “Kai lä vaihi Sica sanphrang üng älo cei saite mityng-a awng te vi. Hini mityng-a kai üng ämö cei hethang aeteng te vi. Aecörae mätawngky nang ma kähawi-a mäny te kätyng kai lä Judae khimi na tea hawi y sa saite äte haetä la awng te y lyng.

¹¹ Kai lä tätang khü-a dü he aeteng te khytä ätete kähawi y sa law vi dylä, dü hethang tea kai lä e y lyng mang. Tungaila Judae khimi na ma kai tea käsi thui saite na tätang khü y vi dylä, ämi ma la kai bung äni ce kö thung-a a haw y lyng. Sica sanphrang tea kai bung mätaw hethang kai lä mäkai te vi dy” näpa.

¹² Aecörae e mätawngky Festus lä äma ce tärae cei te kung na hai aedüng pyng ea, “Nang lä Sica sanphrang tea ly hethang ngai dylä ly he kae vi” näpa.

Aecörae mätawngky Festus hai Akripa sanphrang älo aedüng te

¹³ Käni qae y saite kätü-a lä, Akripa sanphrang hai äticaw käna Berni lä Kesari märü-a tyng hawi dy. Änini lä aecörae mätawngky Festus tea kawng bärai sa he ly hawi vi.

¹⁴ Honi märü-a käni awng mang-a aehae ea aecörae mätawngky Festus lä Pawlae üng phüng, sanphrang tea thui pa vi dy. Festus ma “Hini mityng-a Feli ma thawng thung-a bäla kha khai saite khimi lawngtä awng.

¹⁵ Kai lä Jerusalem märü-a tyng ea mäthykung käleng na hai Judae mätawngky na ma kai tea äni üng phüng käsi thui pyng ea äni tea bäjeng hethang mäkai ö vi.

¹⁶ Tukha kai ma äni ce tea ‘Älo käcei kung na hai mangtä aeting hai kha tärae ngai saite ce üng käsi thui te lo tea mäthang haile hethang py pa y käla ma, bäjeng te lä Rom khimi na üng reitae y lyng’ näkha mäthang pa.

¹⁷ Tukätephüng-a äni ce lä hini märü-a tyng ea, kai lä aenawng y te hai ma kädang mang-a älo cei saite mityng-a, aety kha honi khimi bung ka hai pa te vi dy.

¹⁸ Tärae ngai saite kung na lä aetha kha äni tea käsi thui ngaila kai üng aethang khai te kätyng äni üng sa tämang saite na phüng äni ce thui ö te y vi.

¹⁹ Äma ce üng reitae phüng älo ae-e ö vi. Äni ce lä Isu näsaite lawngtä dü te phüng thui ö te vi. Tungaila Pawlae lä Isu lä hing haile tyng vi näkha ae-e vi.

²⁰ Honi phüng kai lä dawng hethang mäny y vi dy. Tukätephüng-a kai ma Pawlae tea ‘Nang lä hini phüng Jerusalem märü-a ly ea älo aecei he ngai cäkae mei’ näkha düng pa.

²¹ Tungaila Pawlae ma ‘Sica sanphrang ma cei saite ni kai lä ngai te kae vi’ näkha näpa. Tukätephüng-a äni bung Sica tea ly hai y rytä reisae na tea awng hethang kai lä älo khai pa vi” näpa.

²² Tupyng-a Akripa sanphrang lä Festus tea “Honi khimi thui saite lo kai ma thai khe he ngai vi” näpa. Tupyng-a Festus ma “Äni thui saite lo lä khawngdang, nang ma thai ai mang” näpa.

Akripa hai Berni ni maw-a Pawlae tyng pa

²³ Tukha kädang mang-a lä Akripa hai Berni lä aevyng ävang käting phi na hai ma, reisae kälengky na hai märü üng mätawngky khimi na hai mangtä aecö saite ingkäleng pui thung-a kung ö vi dy. Tupyng-a Festus ma thui te kätyng Pawlae bung nähai ö dy.

²⁴ Festus ma “Akripa sanphrang ä, Tyng saite khimi angxynlyng na ä, äni tea kheng ö. Jerusalem märü hai hini märü-a awng saite Judae khimipui na ma ‘Hini khimi bung lä kanghing-a khai he aeteng y’ näkha hang ea kai tea thui ö te vi.

²⁵ Tungaila äni lä dü he khytä sa tämang saite haetä la, awng te kai lä nung y vi. Tungaila äma lä Sica sanphrang tea ly he ngai vi näte phüng-a, äni bung Sica sanphrang tea mätaw he kai lä aedawng te vi.

²⁶ Äni üng phüng Sica sanphrang tea cae hai tärü hethang kai lä mäny te haetä la awng te y vi. Tukätephüng-a äni bung nang ce üng maw-a nähai te vi dy. Akripa sanphrang, nang ma äni tea älo düng ba. Tupyng-a ni kai lä cae hai hae haetä tärü te dang haw hethang vi.

²⁷ Thawng thung üng khimi lawngtä bung lä sa tämang te phüng haetä la thui y käla mätaw te lä aevaw y lyng näkha kai lä aedawng te vi” näpa.