Angtawtha 24 - Caekäcai Kangthae (Lemi)

Pawlae phüng Judae khimi na ma käsi thui pa

¹ Käni bangawtä pyng-a Mäthykung Kälengky Anania lä Judae mätawngky phütä na hai Tathula näsaite Rom Ubädi mäny te kung hai mangtä Kesari märü-a tyng ö dy. Äni ce lä aecörae mätawngky Feli maw-a, Pawlae phüng käsi na thui pa ö vi.

² Aecörae mätawngky Feli lä Pawlae bung ämaw-a nähai ea Ubädi mäny te kung, Tathula ma, “Aecörae mätawngky Feli ä, nang lä kai ce tea bälung käcüng hai pyng saite tähang kähawi phüng-a, kai ce lä kätü käsa-a awng hai neng ö te vi dy. Nang lä kai ce üng pre tähang kangthae saite na sa bälai pa te vi.

³ Feli ä, Hikä sa saite na phüng-a, kai ce lä mityng qütä-a, kawng bärai te lo hai kähawi thui ö jawjaw te vi.

⁴ Kai ce lä nang üng kätü na byng rung khytä sa he ngai y lyng. Tungaila kädawi byng-a kai ce thui saite na tängai kü ba.

⁵ Hini khimi lä pre tea täre mäsa saite vi. Äni lä älawngpre qütä üng Judae khimi qütä na tea aepuilung hethang bäleng pa vi. Äni lä Nazare kangkawng khimi na üng mätawngky lawngtä vi näte kai ce lä mäny ö te vi.

⁶ Säthaw üng Ingkäcai tea la känüng hai hethang aethawsa te phüng-a, äni bung kai ce lä ne ö te vi. (Äni tea kai ce lä Mosi üng Ubädi kätyng älo cei he ngai ö te vi.

⁷ Tungaila reisae kälengky Lusia lä ly kha kai ce kö thung üng Pawlae bung aethaw paitae hai ma lawngprae kha nähai te vi.

⁸ Äni tea käsi thui saite Judae khimi na bung la nang tea ly ö hethang kae te phüng älo py pa te vi dy.) Nang ma äni tea tärae cei dylä, kai ce thui saite phüng angxynlyng na tätang vi näte mäny ai mang” näkha näpa.

⁹ Judae khimi na ma, “Hini lo na lä tätang vi” näkha Pawlae phüng käsi na thui ö rü pa vi dy.

Pawlae lä aecörae mätawngky Feli maw-a awng

¹⁰ Aecörae mätawngky lä äkö hai äsäny mätü kha Pawlae tea älo thui hethang py pa dy. Tukha Pawlae ma “Aecörae mätawngky ä, nang lä Judae khimi na tea säning bäraw y-a tärae cei kha awng te phüng kai lä mäny vi. Tukätephüng-a, kai üng sa tämang y te phüng nang tea thui hethang dang te phüng-a, kai lä kawng bärai vi.

¹¹ Kai lä Jerusalem märü-a Säthaw tea cäphaw hethang tyng pyng te lä, käni hawlai netä ni awng te kae vi rawng. Hini phüng na nang ma düng dylä, mäny haw vi ai.

¹² Säthaw üng Ingkäcai-a läsy, Judae na üng ingkäcai hai märü thung-a la khimi ce xhuxa hai hethang kai mäcü te lä, Judae khimi na la nung ö te y vi.

¹³ Vaihi kai tea käsi thui saite na, äni ce lä ätete lo hai mätü haw ö te y.

¹⁴ Tungaila kai ce üng kangsi na üng Säthaw tea cäphaw kha Areng Isu üng mätu saite älang kai lä bäjui te vi. Äni ce lä honi tea tämang saite vi näkha aedawng ö te vi. Tungaila Mosi üng Ubädi hai buisaw na tärü kha thui saite angxynlyng na tea kai lä yng vi.

¹⁵ Kai tea käsi thui saite na kätyng, kai la Säthaw tea aethang khai te by vi. Kai üng aethang khai saite äte mei nädylä, Säthaw lä khimi käsi kähawi re y käla, khimi ce angxynlyng bung kädü thung üng mätha haile vi ai.

¹⁶ Tukätephüng-a kai lä Säthaw hai khimi ce maw-a, bälung käcai-a awng hethang käni qütä aethaw aesa kha awng te vi.

¹⁷ “Kai lä Jerusalem märü üng tho kha khösäning qae bärai saite kätü pyng-a, kai ma üng khimi kangtang na tea lasawng py hethang hai aemäthy hethang Jerusalem märü-a ly haile tyng te vi.

¹⁸ Äni ce lä kai bung Säthaw üng Ingkäcai thung-a nung ea kai lä caiping-a sa pyng te vi dy. Tukha khimipui na lä awng mang te y vi. Xhuxa te la awng te y.

¹⁹ Tungaila honi mityng-a Asia pre cäpi üng ly saite Judae khimi phütä na lä awng ö vi. Kai tea käsi thui he awng dylä, äma ce ma hini mityng-a ly kha kai sa tämang saite na nang tea thui hethang kae te vi.

²⁰ Honi kätyng y dylä vaihi hi-a awng saite khimi na lä Sanhendrin kawngci maw-a kai awng te kätü-a kai üng sa tämang saite äte awng mei näte thui ö sy.

²¹ Äni ce lä kai tea haetä phüng ni käsi thui haw te kae. Äni ce maw-a aedaw ea kai lä ‘Dü saite na aetha haile tyng vi ai näkha kai lä yng te phüng-a, vaini nang lä kai tea tärae cei te vi’” näkha näpa.

²² Feli lä Areng Isu üng mätu saite älang phüng kähawi-a mäny te vi kha älo aecei saite lä honi kätü-a, aenawng hai pa vi dy. Äni ma “Reisae kälengky Lusia tyng ea lä, nang ce üng ämö tea kai ma bädü pa ai mang” näpa.

²³ Tupyng-a Pawlae bung rui saite reisae na hai khai pa. Äni üng rawijae na ly kha äni üng aely kängai säbawng saite na tea mäkhang pa y hethang reisae käleng tea älo py pa vi dy.

Pawlae lä aecörae mätawngky Feli hai Drusila maw-a awng

²⁴ Käni qae te kätü-a aecörae mätawngky Feli lä äma üng nawngpui Drusila hai mangtä tyng hawi vi. Änawngpui lä Judae khimi vi. Feli ma Pawlae bung kähyng hai kha Isu Khrista tea yng saite phüng Pawlae thui te lo tängai vi dy.

²⁵ Tungaila Pawlae lä Säthaw maw-a, käcüng saite phüng hai, bälung üng kängai saite aeküng hethang phüng hai, Säthaw ma tärae cei te kätü tyng hethang phüng na thui pa ea lä aecörae mätawngky Feli lä ri phi vi dy. Äni ma, “Vaihi nang lä ly haw dy. Kai ma aevaw saite käni-a nang bung ka haile ai mang ba” näpa.

²⁶ Feli lä Pawlae ma täbüng py ai müng näte aethang khai te hai äni tea kähyng leilae kha älo aepe pa vi dy.

²⁷ Säning netä pyng-a lä aecörae mätawngky Feli mityng-a, Porcius Festus näsaite Rom khimi hai aele dy. Aecörae mätawngky Feli lä Judae khimi na maw-a mimai dang hethang ngai te phüng-a, Pawlae bung thawng thung-a pä-ung pa jawjaw te vi rawng.