Angtawtha 23 - Caekäcai Kangthae (Lemi)

¹ Pawlae lä Sanhendrin kawngci na tea kheng bädiki ea “Kangby jä-ai na ä, kai lä vaini khytä Säthaw üng maw-a, caiping te bälung kaedawng hai-a awng kha kälu sa te vi” näpa.

² Mäthykung kälengky Anania lä hini lo thai kha äteng-a, aedaw saite khimi na tea Pawlae üng täbawng-a, täbeng hethang älo py pa vi.

³ Tukha Pawlae ma “Thung kanglung hai kälo saite usai engpang ä, nang tea ni Säthaw ma täbeng tätang ai to. Nang lä Ubädi kätyng kai tea tärae cei hethang kawngci-a aety ngaila kai tea täbeng hai te lä, Ubädi hai aebäla y vi dy be tu” näpa.

⁴ Äteng-a aedaw saite khimi na lä “Nang lä Säthaw üng mäthykung kälengky tea käsi thui vawng te vi mei” näpa.

⁵ Pawlae ma “Kangby jä-ai na ä, äni lä Mäthykung Kälengky näte kai lä mäny y. Caekäcai thung-a lä ‘Nang üng äceng na bung pyng saite kung tea lä käsi thui hang’ näkha näte vi” näpa.

⁶ Tupyng-a Pawlae lä Sanhendrin kawngci thung-a phütä lä Sadukai na hai kälang phütä lä Pharisai na näte mäny ea lä “Kangby jä-ai na ä, kai lä Pharisai vi. Pharisai üng cäpaw la vi. Dü saite na aetha haile tyng ai näte lä kai üng aethang khai saite vi. Tukätephüng-a vaihi kai lä älo cei hethang aeting saite khimi vi” näkha näpa.

⁷ Tukha Pharisai hai Sadukai na lä älo ae-e kha Sanhendrin kawngci lä phü netä aeprei ö vi dy. (

⁸ Sadukai na lä dü te üng aetha haile tyng te lä awng y. Säthaw üng angtawtha na awng y. Angra na la awng y. Muilaw Käcai lä awng y näkha yng ö te vi. Tungaila Pharisai na lä honi angxynlyng na lä awng näkha yng ö te vi.)

⁹ Äni ce ae-e saite lo lä ätüng aesa te qawng-a aesa rae pa vi dy. Pharisai kangkawng thung üng Mosi üng Ubädi särae na lä aetha kha “Hini khimi tea äte sa tämang te la, kai ce lä nung y. Muilaw, y dylä Säthaw üng angtawtha lawngtä ma äni tea thui te daila awng ai müng” näkha ae-e pa vi dy.

¹⁰ Tukha ae-e te lä ty rae, ty rae pa te phüng-a, äni ce lä Pawlae tea tibu tica sa ai te phüng-a reisae kälengky lä ri hai te vi dy. Äni lä reisae na tea aerung hai kha Pawlae bung reisae na awng saite mityng-a nähai hethang äni ce thung üng käthoja hai pa vi dy.

¹¹ Honi kärung-a Areng lä Pawlae teng-a aedaw kha “Ri hang. Nang lä Jerusalem märü üng khimi na tea kai üng phüng thui pyng te kätyng, Rom märü üng khimi na tea la thui he kae te by vi” näkha näpa.

Pawlae bung bädü he kangru-a aeceng pa

¹² Kädang mang-a Judae khimi phütä na lä aeting kha “Pawlae bung bädü y rytä kai ce lä ca nei y käla awng he vi” näkha älo aedo ö dy.

¹³ Honi kätyng kangru-a aedüng saite khimi na lä lawng ruibälitä cang y awng ö te vi.

¹⁴ Äni ce lä mäthykung käleng na hai, Judae mätawngky na tea ly kha “Kai ce lä Pawlae bung bädü y rytä äte käcakänei la ca y lyng” näkha aedo ö te vi.

¹⁵ “Tukätephüng-a nang ce hai, Sanhendrin kawngci na ma, Pawlae üng phüng tea kähawi-a düng hethang ngai te kätyng sa kha Rom reisae kälengky tea äni bung nang ce tea nähai hethang thui pa ö ba. Nang ce tea tyng y kälang-a, äni bung bädü hethang kai ce lä aering rüng ai mang” näkha näpa.

¹⁶ Tungaila honi aeceng te phüng lä, Pawlae ticaw üng cäpaw lä mäny kha reisae na awng te mityng-a, kung ea Pawlae tea thui pa vi dy.

¹⁷ Pawlae lä reisae käleng lawngtä bung kähyng kha “Hini nade bung reisae kälengky tea nähai ba. Äni tea thui hethang älo haetä awng” näkha näpa

¹⁸ Tukha reisae käleng lä honi nade bung reisae kälengky tea nähai pyng ea, “Thawng thung-a pä-ung saite Pawlae ma kai tea kähyng kha hini nade bung nang tea tha hai te vi. Äni lä nang tea thui hethang älo haetä awng ti” näkha nä vi.

¹⁹ Reisae kälengky lä honi nade bung äkö-a, süng kha khimi awng y saite mityng haetä-a nähai pa vi dy. Tupyng-a “Kai tea nang äte lo thui hethang ngai te mei” näkha düng pa.

²⁰ Nade ma “Judae na lä Pawlae üng phüng tea kähawi-a mäny he ngai te kätyng sa kha khawngdang lä nang tea Pawlae bung kawngci-a nähai hethang mäkai he aedüng ö te vi.

²¹ Äni ce üng mäkai te kätyng tängai hang ba. Lolang-a khimi lawng ruibälitä cang y te na lä aw kha aemaw ö vi. Äni ce lä Pawlae bung bädü y rytä äte käcakänei la ca y näkha älo aedo ö te vi. Vaihi äni ce lä Pawlae bung bädü hethang aerü rüng kha nang ma Pawlae bung mätaw hethang thui saite lo tea aering ö te vi dy” näpa.

²² Reisae kälengky ma “Nang lä hikä kai tea thui saite phüng ämi tea la, thui hang ba” näkha thui ea honi nade bung mätaw pa vi dy.

Pawlae bung aecörae mätawngky Feli tea tha pa

²³ Tupyng-a reisae kälengky lä reisae käleng lawng netä bung ka kha “Vaidüng naeri täkawtä-a, Kesari märü-a ly hethang reisae lawng cungvai netä cäphö aedang saite reisae lawng rui säritä hai, täri süng saite reisae lawng cungvai netä na khölawng tho hethang aerü ö hai rüng ba.

²⁴ Pawlae tähang cäphö la khai rüng pa. Äni bung aecörae mätawngky Feli tea kähawi-a rui kha tha pa ö” näkha älo py pa.

²⁵ Reisae kälengky lä cae haetä tärü ea py pa vi dy.

²⁶ Honi cae thung-a “Kai, Kalodia Lusia, ma aecörae mätawngky nang Feli tea tämö khai te hai cae tärü dy ba.

²⁷ Judae khimi na lä hini khimi bung ne kha bädü he sa ö vi. Äni lä Rom khimi vi näte kai lä mäny kha reisae na hai mangtä ly ea äni bung aeqang hai te vi dy.

²⁸ Kai lä äni tea Judae khimi na ma ätephüng-a käsi thui ö te mei näte mäny he ngai te phüng-a, äni ce üng Sanhendrin kawngci-a äni bung nähai te vi dy.

²⁹ Judae khimi na lä äni tea Mosi üng Ubädi na phüng hai-a, käsi thui ö te vi. Äni lä dü hethang hai thawng thung-a pä-ung hethang khytä sa tämang saite äte haetä la awng y te phüng kai lä mäny te vi.

³⁰ Judae khimi na lä äni tea bädü hethang kangru-a aedüng ö te phüng-a, kai lä angthang thai kha äni bung nang tea mätaw praw te vi. Tärae ngai saite khimi na tea la nang üng maw-a täphawng hethang kai ma älo täru pa te vi dy. Nang lä nawsaw hawi sy ba” näkha tärü te vi dy.

³¹ Reisae na lä reisae kälengky üng älo thui te kätyng sa ö vi dy. Äni ce lä Pawlae bung ka kha honi kärung-a ma, Antipatri märü khytä tha pa ö dy.

³² Kädang mang-a reisae na lä äma ce üng awng saite mityng-a vawi ö haile vi dy. Cäphö aedang saite reisae na lä Pawlae hai mangtä ly ö te vi.

³³ Äni ce lä Kesari märü-a tyng ea reisae kälengky üng cae aecörae mätawngky tea py kha Pawlae bung ämaw-a nähai pa vi dy.

³⁴ Aecörae mätawngky Feli lä honi cae phai pyng-a, “Nang lä äte khö üng khimi mei” näkha düng pa. Kiliki khö üng khimi näte Feli lä mäny vi dy.

³⁵ Tukha aecörae mätawngky Feli ma “Hini mityng-a nang tea tärae ngai saite khimi na tyng dylä, nang üng phüng kai ma düng ai” näpa. Tupyng-a Pawlae bung Herodae sanphrang ing-a kähawi-a rui kha khai hethang älo py pa vi dy.