Angtawtha 22 - Caekäcai Kangthae (Lemi)

¹ Pawlae ma “Kangby jä-ai na hai Ä-ai na ä, vaihi kai thui he ngai saite älo tea tängai ö re ba. Kai lä sa tämang te awng y näte thui mäcai he ngai vi” näpa.

² Hebärai lo hai thui te khimipui na thai ea lä, äni ce lä sitäri-a awng pa ö rae vi.

³ Tupyng-a Pawlae ma “Kai lä Judae khimi vi. Kai lä Kiliki khö näsaite Tasu märü-a aepeng te vi. Tungaila hini Jerusalem märü-a ryng te vi. Kangsi sangrung na bäjui saite Judae Ubädi tea kai lä Kamela üng khokung mang kähawi-a aetu te vi. Vaihi nang ce lä Säthaw tähang bälung aepy te kätyng, kai la bälung aepy te by vi.

⁴ Kai lä Areng Isu üng lolang bäjui saite khimi na bung bädü he khytä sakälö khü pa te vi. Nawngmädi nawngmäcaw na bung ne kha thawng thung-a pä-ung pa te vi dy.

⁵ Kai thui saite lo tätang vi näte mäthykung kälengky na hai Sanhendrin kawngci üng Judae khimi mätawngky na lä mäny kha thui haw ö vi. Kai lä äni ce te üng Damasaka märü-a awng saite Judae khimi mätawngky na tea py hethang cae na dang te vi dy. Tukha Isu tea Yng saite khimi na tea bäjeng hethang tähang hai, ne kha Jerusalem märü-a nähai hethang honi cae ma, kai tea aenae py te vi.

Pawlae aepeng kangthae te phüng

⁶ “Tukha kai khölawng tho kha Damasaka märü teng-a tyng te kätü-a, käni anghung-a käni mang üng kaevang haetä lä qengtäma kai tea säveng lükü kha aevang pheng praw vi dy.

⁷ Kai lä älawng qawng-a aetüng praw kha ‘Sawlae, Sawlae, nang lä ätephüng-a kai tea sakälö khü te vi mei’ näsaite ätüng haetä thai vi.

⁸ Tukha kai ma ‘Areng ä, nang lä ämi mei’ näkha düng dy. Äni ma ‘Kai lä nang ma sakälö khü saite Nazare märü üng Isu dy’ nä vi.

⁹ Kai hai mangtä ly saite khimi na lä honi äkaevang nung ngaila, kai tea thui saite Areng üng älo tüng lä thai ö y lyng.

¹⁰ Kai ma ‘Areng ä, kai lä makä sa ai mei’ näkha düng dy. Areng ma ‘Aetha kha Damasaka märü-a ly lawi. Nang sa hethang khai rüng saite kälu phüng nang tea kai ma thui king ai mang’ nä vi.

¹¹ Kai lä aevang pheng saite äkaevang phüng-a, kai üng ämi lä ving vi dy. Tukha kai ma hai mangtä ly saite khimi na ma kai üng äkö-a süng kha Damasaka märü thung-a bähawi ö vi dy.

¹² “Anania näsaite khimi lä kai tea ly dy. Äni lä Mosi üng Ubädi na tängai kha Säthaw tea bälung aepy saite khimi lawngtä vi. Äni lä Damasaka märü üng Judae khimi angxynlyng na ma tämö khai saite khimi vi.

¹³ Äni lä kai üng äteng-a aedaw kha ‘Kangby Sawlae ä, nang üng ämi aevang lawi ba’ näkha näpa. Qengtäma kai lä äni bung nung haw vi dy.

¹⁴ Tupyng-a Anania ma ‘Nang lä mä-ai kangsi sangrung na cäphaw saite Säthaw üng kängai mäny hethang äma lä nang bung re te vi. Nang lä Säthaw üng tüng saite mawsawng bung nung kha äni üng täbawng mang thui saite älo thai vi ai.

¹⁵ Nang ma nung saite hai thai saite na khimi angxynlyng na tea thui hethang Areng üng älo thui saite kung-a aelawng vi ai.

¹⁶ Tukätephüng-a äte tea aering kha awng te mei. Aetha kha baptismae la lawi. Nang üng hunghö na aelawi hethang Areng tea aetang lawi’ näkha näpa.

Pawlae bung ceng kälang khimi na tea älo thui he mätaw pa

¹⁷ “Kai lä Jerusalem märü-a tyng haile kha Säthaw üng Ingkäcai-a aetang ea äsämai nung vi.

¹⁸ Äsämai thung-a Areng bung nung ea ‘Jerusalem märü üng tho praw lawi. Hini märü üng khimi na lä kai üng phüng nang thui te na tängai ö y lyng’ näpa.

¹⁹ Tungaila kai lä ‘Areng ä, kai lä Judae na üng ingkäcai qütä ly kha nang tea Yng saite khimi na bung thawng thung-a pä-ung hethang ne kha bo saite khimi lä kai dy näte äni ce mäny ö vi.

²⁰ Nang üng phüng angthang thui saite Stephen bung bädü ea kai lä äteng-a aedaw kha ngai hai te by vi. Äni bung bädü te khimi ce üng nitha, kä-o na tea rui pa te vi’ näkha näpa.

²¹ Tupyng-a Areng ma ‘Ly lawi. Mityng kähanglaw-a awng saite ceng kälang khimi na tea nang bung kai mätaw ai’ näkha thui vi” näpa.

²² Khimi ce lä Pawlae ma ceng kälang khimi na tea Angthang Kähawi thui te khytä tängai ö vi dy. Tupyng-a hini kätyng Pawlae thui te thai ea lä “Hini khimi bung älawng qawng üng mäthoja la. Äni lä hing hethang aeteng y vi dy” näkha ätüng käleng hai hang ö vi.

²³ Äni ce lä äma ce üng aekhu saite kä-o käsa na aeling kha hawi ea angmawngdi na khösang mang-a, hi kha hang ö vi dy.

²⁴ Tukha Rom reisae mätawngky lä Pawlae bung reisae na awng saite mityng-a nähai hethang thui pa. Ätephüng-a hikä khimi ce ma äni tea hang te mei, näte phüng mäny hethang Pawlae tea bo kha düng hethang älo thui pa ö vi dy.

²⁵ Tupyng-a äni ce lä Pawlae bung bo hethang mawiphö rui hai mäkhing rang pyng ea, Pawlae ma äteng-a aedaw saite Rom reisae käleng tea “Rom khimi lawngtä tea älo cei te awng y käla ma bo saite lä Rom Ubädi hai aebäla by cäkae mei” näkha düng pa.

²⁶ Honi älo thai ea lä reisae käleng ma reisae äkälengky tea ly kha “Nang lä makä sa ai dy mei. Äni lä Rom khimi vi” näkha thui pa.

²⁷ Tukha reisae kälengky lä Pawlae tea ly kha “Kai tea thui khü e. Nang lä Rom khimi mei” näkha düng pa. Pawlae ma “Üng, Rom khimi cy” näkha näpa.

²⁸ Tukha Reisae kälengky ma “Kai lä tangkae awng mang-a py kha Rom khimi-a aelawng te kae vi” näpa. Pawlae lä “Kai lä aepeng te üng hai ma, Rom khimi vi” näkha näpa.

²⁹ Äni tea düng saite khimi na lä qengtäma aenaw ö king pa vi dy. Pawlae lä Rom khimi vi näte hai äni bung kharui hai mäkhing myng te mäny ea reisae kälengky lä ri by vi dy.

Judae na üng kawngci maw-a Pawlae tyng pa

³⁰ Kädang mang-a lä, Pawlae tea Judae khimi na ma äte sa tämang te hai-a, käsi thui ö te mei näte reisae kälengky lä kähawi-a, mäny he ngai pa vi dy. Tukätephüng-a äni ma Pawlae tea mäkhing saite singqy rui na sö hai pa ea, mäthykung käleng na hai Sanhendrin kawngci üng mätawngky na tea aekäcüng ö hethang älo py pa by vi dy. Tupyng-a Pawlae bung nähai kha äni ce maw-a aedaw hai dy.