Angtawtha 21 - Caekäcai Kangthae (Lemi)

Jerusalem märü-a Pawlae tyng pa

¹ Kai ce lä äni ce hai aeprei pyng-a, tui sangphaw hai kätaw-a aedang kha Kos angrai sälawng-a tyng ö vi dy. Kädang mang-a lä Rodes angrai sälawng-a tyng be kha honi üng hai ly be ea lä Patarae märü-a ly ö dy.

² Phonecia khö-a ly saite tui sangphaw haetä hai, aeting kha honi tui sangphaw hai ly ö dy.

³ Tupyng-a kai ce lä Saipära angrai sälawng bung nung ea lä, honi angrai sälawng üng käni kädüng mang-a cäqeng kha Siria pre mang-a ly ö vi dy. Taira märü-a tui sangphaw kälu sa saite na vyng täkhü hethang awng pa vi kha tui sangphaw lä honi märü-a aehae vi dy.

⁴ Honi mityng-a Yng saite khimi phütä na hai aeting kha kai ce lä käni säritä äni ce hai mangtä awng kae dy. Honi Yng saite khimi na lä Muilaw Käcai hai-a Pawlae bung Jerusalem märü-a ly y hethang thui pa ö vi.

⁵ Tungaila käni säritä pyng ea lä, kai ce lä Jerusalem märü mang-a khölawng tho haile ö be dy. Käyng khimi angxynlyng na lä äma ce üng nawngpui cäpi caw nade na hai mangtä märü ärang pangle pyng khytä kai ce bung tha ö dy. Kai ce angxynlyng lä pangle pyng-a khokhö didü kha aetang ö dy.

⁶ Tupyng-a lawngtä hai lawngtä kawng bärai aesa ö kha kai ce lä tui sangphaw qawng-a paw ea äni ce lä äma ce üng ing-a vawi ö haile tyng vi dy.

⁷ Taira märü üng khölawng tho haile ea kai ce lä, Tolami märü-a tyng ö dy. Hani märü-a käyng na tea nawsaw hawi ö cämei näpa kha äni ce tea känitä aehae ö vi.

⁸ Kädang mang-a lä, khölawng tho kha Kesari märü-a tyng ea kai ce lä Angthang Kähawi thui pa saite Philip ing-a aehae ö vi. Jangni-a Jerusalem kangkawng thung-a, lömai na tea säbawng hethang khimi lawng täjaetä re ea Philip la qa by vi.

⁹ Äni tea nawngpaw nang y saite cänung lawng bälitä awng vi. Honi äcänung na lä buisaw lo aepae haw saite na vi.

¹⁰ Honi mityng-a kai ce lä käni käqae-a aehae kha Akäbu näsaite buisaw lawngtä lä Judae khö üng ly vi dy.

¹¹ Tukha äni lä kai ce tea ly ea Pawlae üng khabai la kha äma üng äkö hai äkho tea aemäkhing vi. Tupyng-a Akapu lä “Muilaw Käcai lä hini kätyng thui te vi. Jerusalem märü-a Judae khimi na ma hini khabai üng äkung bung hini kätyng mäkhing kha ceng kälang khimi na tea a vi ai” näkha näpa.

¹² Hini älo thai ea, kai ce hai ho-a awng saite khimi na lä Pawlae tea Jerusalem märü-a ly y hethang aesi aebai kha thui pa ö vi.

¹³ Tungaila Pawlae ma “Nang ce lä ätephüng-a, hini kä raw kha kai tea bälungsi hai ö te vi mei. Kai lä Areng Isu tähang Jerusalem märü-a, aemäkhing hethang cang y, dü hethang mäteng ma, aerü rüng kha awng te vi” näkha mäthang pa.

¹⁴ Pawlae tea aebai kha mäkhang te dang y ea lä, kai ce lä “Areng üng kängai kätyng kae sy” näkha aenawng ö sö kae dy.

¹⁵ Hini pyng-a kai ce lä khölawng tho hethang aerü kha Jerusalem märü-a ly ö dy.

¹⁶ Kesari märü üng Yng saite khimi phütä na lä, kai ce hai mangtä ly kha kai ce bung Mason näsaite ing-a nähai ö vi. Mason lä Saipära angrai sälawng üng ly kha yng angcü saite khimi vi.

Pawlae lä Jaeko hai aeting pa

¹⁷ Jerusalem märü-a kai ce tyng ea kangby jä-ai na lä kawng te hai lady ö dy.

¹⁸ Kädang mang-a Pawlae lä kai ce hai mangtä Jaeko hai aeting hethang ly vi. Kangkawng üng mätawngky angxynlyng na lä honi mityng-a awng ö vi.

¹⁹ Pawlae lä honi khimi ce tea kawng bärai sa dy. Tupyng-a ceng kälang na tea Säthaw lä Pawlae te mang hai-a, sa pa saite kälu na phüng äni ce tea thui king pa vi dy.

²⁰ Pawlae ma thui te thai ea lä, äni ce angxynlyng la Säthaw tea bälaw ö dy. Tukha Pawlae tea “Kangby ä, yng saite Judae khimi sangrui-a awng mang kha äni ce angxynlyng lä Mosi üng Ubädi tea matangtä bälungrui sui mei näte nang lä mäny dy.

²¹ Ceng kälang na thung-a awng saite Judae khimi na tea Mosi üng Ubädi khaisö hethang nang ma mätu te äni ce lä thai ö vi. Nade na bung lengkhüng täke hai y hethang Judae na üng reitae hui y hethang nang ma mätu te äni ce lä thai ö vi dy.

²² Kai ce lä makä sa ö ai mei. Nang tyng te angthang lä äni ce thai khe ö te vi dy.

²³ Tukätephüng-a kai ce thui te kätyng sa ba. Kai ce hai mangtä Säthaw tea älo aedo saite khimi lawng bälitä awng.

²⁴ Äni ce bung ka kha äni ce hai mangtä aemäcai ping te Judae reitae kätyng sa ö ba. Äni ce lä mäthy hethang kätü tyng ea nang ma honi byng saite ävang na py pa. Tukha äni ce äsang aeba hethang dang ö ai. Hini kätyng sa dylä nang üng phüng khimi ce ma thai saite lä tüng y vi näte hai, nang ma ma Mosi üng Ubädi lo tängai vi näte khimi qütä na ma mäny ö vi ai.

²⁵ Yng saite ceng kälang khimi na tähang cae tärü pyng vi dy. Honi cae thung-a hini kätyng thui vi. Mimi tea löci sa saite mawi ca hang. Äthi la nei hethang kae y. Känawngjang tära kha ra saite üng ängang la ca hethang kae y. Aepawng y käla nawngpui nawngpaw kätyng awng vai y,” näkha näpa.

²⁶ Pawlae lä kädang mang-a, honi khimi lawng bälitä na bung ka ea äni ce hai mangtä aemäcai ping te Judae reitae kätyng sa vi dy. Tupyng-a äni lä Säthaw üng Ingkäcai thung-a kung kha aemäcai ping-a sa saite mani käni-a khüng ai mei näte thui rüng vi dy. Tukha äni ce lä lawng lawngtä tähang mäthy hethang mani käni-a sa ai mei näte la thui rüng te vi.

Pawlae bung ne pa

²⁷ Judae na üng reitae kätyng aemäcai ping te käni säritä byng aetawng ea, Asia pre cäpi üng Judae khimi phütä na lä, Pawlae bung Säthaw üng Ingkäcai thung-a nung ö vi. Äni ce lä khimipui na tea bärawi bäleng kha Pawlae bung ne ö vi.

²⁸ Äni ce ma “Isrelae khimi ce ä, säbawng ö jo kae-e. Hini khimi lä mityng qütä-a ly kha Isrelae khimi na phüng läsy, Mosi üng Ubädi phüng läsy, Säthaw üng Ingkäcai phüng läsy, käsi thui kha khimi ce angxynlyng tea mätu pa vi. Honi cang y vaihi äni lä Käri khimi na bung Säthaw üng Ingkäcai baesung thung-a nähai ea hini Ingkäcai üng caiping te tea täphra vi dy.” (

²⁹ Ätephüng-a mei nädylä äni ce lä Pawlae ni Ephesi märü üng Trophima näsaite Käri khimi hai mangtä märü thung-a aeting te nung te phüng-a vi. Tukätephüng-a Pawlae lä Trophima bung Säthaw üng ingkäcai-a nähai müng näte aepö te phüng-a vi.)

³⁰ Märü qütä aepuilung kha khimi ce lä mityng qütä üng aehui kha Pawlae bung ne ea Säthaw üng Ingkäcai ärang mang-a re ö vi. Tupyng-a qengtäma Ingkäcai kätho lä aekhae praw pa vi.

³¹ Äni ce lä Pawlae bung bädü he sa ö te thüng-a, Rom reisae kälengky lä Jerusalem märü üng khimi angxynlyng na xhuxa te angthang thai pa vi.

³² Tukha äni lä qengtäma reisae na hai reisae käleng phütä na bung ka kha khimipui awng saite mityng-a aehui ö vi dy. Khimi ce lä reisae kälengky hai reisae na bung nung dylä Pawlae tea bo te lä aenawng ö vi dy.

³³ Reisae kälengky lä ly kha Pawlae bung ne ea singqy rui känetä hai mäkhing hethang älo py pa. Tukha “Hini khimi lä ämi mei. Äte sa te mei” näkha düng pa.

³⁴ Khimipui na lä ätüng amäjy cawngkhang tho kha hang pa ö vi. Hikä hang te tüng na phüng-a reisae kälengky lä ätemakä mei näte mäny haw y kha Pawlae bung reisae na awng saite mityng-a, nähai hethang älo py pa vi.

³⁵ Äni lenglö-a tyng ea lä, khimipui na lä tengxyng y kädawtho phi te phüng-a, Pawlae bung reisae na ma aepö kha nähai pa vi dy.

³⁶ Khimipui na lä leithung-a hui kha “Äni bung bädü la” näkha hang ö vi dy.

Pawlae ma thui pa

³⁷ Pawlae bung reisae na awng saite mityng-a nähai he sa te kätü-a, Pawlae lä reisae kälengky tea “Kai nang tea älosaitä aepe haw ai mei” näpa. Äni ma “Nang lä Käri lo aepekaw mei.

³⁸ Jangni nang lä khimi ce aecörae tea täre sa hethang bärawi bäleng saite Aikuta khimi y mei. Nang lä aecörae tea täre aety hethang khimi sang bälitä na bung daithung dairang-a nähai saite khimi y mei” näkha düng pa.

³⁹ Pawlae ma “Kai lä Judae khimi vi. Kiliki khö ämüng aethang saite Tasu märü üng khimi vi. Kai lä khimipui na tea älo aepe hethang säbawng kü” näpa.

⁴⁰ Tukha reisae kälengky ma älo aepe he py ea Pawlae lä lenglö qawng-a aedaw kha khimipui na tea sitäri-a awng hethang äkö hai mätü pa. Äni ce sitäri ea äma lä Hebärai lo hai thui pa dy.