Angtawtha 20 - Caekäcai Kangthae (Lemi)

Pawlae lä Makedonia khö hai Käri pre-a ly te

¹ Tukha xhuxa saite na byng ea, Pawlae lä Yng saite khimi na bung kähyng kha aethaw py te älo na thui pa dy. Tupyng-a äni ce tea kähawi-a, awng ö ba. Kai ly ai dy ba ä, näkha Makedonia khö-a ly ja pa vi dy.

² Äni lä honi khö-a ly prei kha Yng saite khimi na tea aethaw py te älo na thui pa mang pyng ea lä, Käri pre-a ly pa vi dy.

³ Äni lä Käri pre-a law thungtä awng dy. Tupyng-a Siria pre-a tui sangphaw aedang he sa ea, äni bung bädü hethang Judae khimi phütä na ma, aemäcü saite angthang äma lä mäny pa vi. Tukätephüng-a äni lä Makedonia khö cäqeng kha vawi hethang bälung aedawng dy.

⁴ Pawlae hai mangtä hui saite äpy na lä Beri märü Puru üng cäpaw Sopata, Thesalonika märü üng Aristaku hai Sekunda ni, Debe märü üng Kaju, Timothe Asia pre cäpi üng Tukhika hai Trophima ce angxynlyng na vi.

⁵ Äni ce lä langmaw-a ly kha kai ce tea Troa märü-a aering ö te vi.

⁶ Täkaw aepae saite aesi qa y käla täkaw ca saite pawi pyng-a, Philipi märü üng hai tui sangphaw aedang kha käni bangawtä pyng ea lä, äni ce awng saite Troa märü-a tyng dy. Hani märü-a, kai ce käni säritä awng ö vi.

Troa märü-a Pawlae üng Kangkhüng dawnghang ly te

⁷ Kai ce lä ätäru käni üng kädüng-a mangtä Areng bö ca hethang aekäcüng ö dy. Pawlae lä kädang mang-a honi märü üng khölawng tho hethang aedawng te phüng-a, äma lä kärung angnihü khytä Yng saite khimi na tea Säthaw üng Angthang thui pa vi.

⁸ Kai ce aekäcö saite äqawng üng engthung-a lä, maibung thawng saite na awng mang vi.

⁹ Tudylä Eutakhu näsaite särai lawngtä lä kailae haetä qawng-a aety kha awng pa vi. Pawlae älo thui te thüng-a, äni lä i-sämu kha awng. Äni i khü te kätü-a lä, ing tang thungtä awng saite üng hai älawng-a aeqa pa vi. Khimi ce ma äni bung mätha ea lä äni lä dü pa vi dy.

¹⁰ Tungaila Pawlae lä älawng-a aerung käthu kha äni tea kaibu kha täkawi ea “Bälung mawng ö y ma. Äni lä hing vi ai rawng” näkha thui pa.

¹¹ Tupyng-a Pawlae lä ing qawng-a paw haile ea äkähui khimi na hai mangtä Areng bö ca ö dy. Ca ö pyng ea lä, khö aevang te khytä äni ce hai mangtä awng kha älo na aepe ö vi dy. Tupyng-a honi märü üng tho vi dy.

¹² Yng saite khimi na lä hing saite särai bung äma ce üng ing-a, nähai kha bälung awngneng te dang ö vi dy.

Troa märü üng Mile märü-a ly te

¹³ Kai ce lä tui sangphaw tea ly dawde kha aedang ea Aso märü mang-a ly ö dy. Honi märü-a tyng ea ni, Pawlae bung tui sangphaw qawng-a paw hai hethang vi. Ätephüng-a mei nädylä Pawlae lä honi märü khytä äkho hai ly hethang sa te vi.

¹⁴ Kai ce lä Aso märü-a äni hai aeting ea, tui sangphaw qawng-a äni bung nähai kha Mitulen märü mang-a ly ö dy.

¹⁵ Kädang mang-a lä honi mityng üng tho kha Kio näsaite angrai sälawng teng-a, kai ce lä tyng ö vi dy. Kädang mang üng känitä-a lä, Samo angrai sälawng-a tyng kha kädang mang-a lä, Mile märü-a tyng ö dy.

¹⁶ Pawlae lä Asia pre cäpi-a kätü byng hethang ngai y te phüng-a, Ephesi märü tea cäqeng kha tui sangphaw aedang hethang dawng vi dy. Tyng haw dylä Pengtikos Pawi käni Jerusalem märü-a, kärang-a tyng hethang ngai pa te phüng-a vi.

Pawlae lä Ephesi kangkawng üng mätawngky na hai aeting pa

¹⁷ Pawlae lä Ephesi märü üng kangkawng mätawngky na hai aeting hethang ngai te phüng-a, Mile märü üng Ephesi märü-a, khimi lawngtä bung mätaw pa vi.

¹⁸ Kangkawng üng mätawngky na tyng ö te kätü-a, Pawlae ma “Kai lä Asia pre cäpi-a tyng angcü te käni üng hai aetawng kha nang ce hai mangtä awng saite kätü qütä-a, makä sa mei näte nang ce lä mäny ö te vi.

¹⁹ Judae khimi na ma kai tea mätang bälai-a, sakälö khü kha kai bung bädü hethang aemäcü ö ngaila, kai lä bälung aemäneng ea minaw tui rui te hai, Areng üng kälu sa te vi.

²⁰ Khimipui na maw-a läsy, nang ce üng ing-a läsy, nang ce tähang aerawi saite lo na angxynlyng kai ma mätu king te nang ce lä mäny ö te vi dy.

²¹ Aedawng mäkhüng ea Säthaw tea aekö haile hethang hai mä-ai üng Areng Isu tea yng hethang, kai lä Judae khimi na hai Käri khimi na tea la kähawi-a thui pa te vi.

²² Vaihi kai lä Muilaw Käcai ma thui te lo tängai kha Jerusalem märü-a ly te vi dy. Honi märü-a makä awng ai mei näte kai lä mäny y.

²³ Tungaila Muilaw Käcai ma ‘Thawng thung-a pä-ung te hai mätangca saite na nang lä aeting vi ai’ näkha märü qütä-a thui rüng kha sädi py saite kai lä mäny vi.

²⁴ Kai lä dü ea la, hing ea la, kai tähang aely leng y lyng. Tungaila Areng Isu ma sa hai hethang kai tea py saite kälu khüng haw hethang sa saite lä aely lengky te vi. Honi kälu lä, Säthaw üng tähang kähawi phüng-a, Angthang Kähawi thui hethang vi.

²⁵ “Kai lä Säthaw pre phüng nang ce angxynlyng tea ly kha thui vi dy. Nang ce lä kai bung nung haile y vi ai dy näte kai lä vaihi mäny te vi dy.

²⁶ Tukätephüng-a khimi lawng lawngtä phra vi dylä, honi lä kai üng sa tämang te y näte vaini ma nang ce mäny hethang kai thui te dy.

²⁷ Ätephüng-a mei nädylä, kai lä Säthaw üng aely kängai angxynlyng na nang ce tea thui king te phüng-a vi.

²⁸ Tukätephüng-a nang ce lä mä-ai ma ce tea sädi hai awng ö. Muilaw Käcai ma nang ce tähang a saite kangkawng tea kähawi-a rui ö. Beram rui saite Kung ma beram rui te kätyng nang ce lä, Säthaw üng kangkawng tea kähawi-a, rui kha kheng ö. Ätephüng-a mei na dylä, Säthaw lä äma üng Cäpaw thi hai-a honi kangkawng bung rang te vi.

²⁹ Kai ly ja te kätü-a, kätüng y mätu saite khimi phütä na lä, nang ce thung-a kung vi ai. Äni ce lä käsui hai aetawng kha bäheng y te hai kangkawng tea täphra hethang aethawsa vi ai näte kai lä mäny vi.

³⁰ Nang ce thung üng mäteng ma phütä khimi ce lä kaeling thui kha Yng saite khimi na bung äma ce leithung hui hai hethang the te kätü lä tyng vi ai.

³¹ Tukätephüng-a kähawi-a aering ö. Kai lä nang ce lawng lawngtä tea säning thungtä tütü kärung käni minaw tui rui kha thui saite Angthang Kähawi mätu saite tea aedawng ö haile ba.

³² “Nang ce bung Säthaw üng äkö thung-a a te vi dy. Säthaw üng tähang kähawi ma nang ce tea säbawng vi ai. Säthaw üng tähang kähawi phüng-a, nang ce üng yng saite cakhi haw ö vi ai. Tukäte hai-a Säthaw üng khimi käcai qütä tähang khai rüng saite tähang kähawi lä nang ce dang ö vi dy.

³³ Kai lä khimi üng sui, tangkae, kä-o nitha na bädö te y vi.

³⁴ Kai hai kai rawijae na aely ngai saite kä-o nitha hai, käcakänei na dang hethang kai äkö hai kälu sa te tea nang ce lä mäny ö vi.

³⁵ Nang ce lä hini kätyng kälu sa kha mätang saite na tea säbawng hethang kätü qütä kai lä mätü te vi. Areng Isu ma ‘Khimi ce te üng dang te qawng-a, py saite lä tähang hawiky’ vi näkha thui saite lo tea aedawng haile ö ba” näpa.

³⁶ Tupyng-a Pawlae lä khokhö didü kha äni ce hai mangtä aetang pa vi dy.

³⁷ Äni ce angxynlyng lä Pawlae tea täkawi kha mänang te hai tengxyng y raw ö vi dy.

³⁸ Yng saite na lä Pawlae bung nung haile y vi ai dy näte äni ma thui te phüng-a, äni ce lä tengxyng y bälungsi ö phi vi dy. Tupyng-a Pawlae bung tui sangphaw mang-a tha pa ö vi dy.