Angtawtha 19 - Caekäcai Kangthae (Lemi)

Ephesi märü-a Pawlae tyng pa

¹ Korin märü-a Apolo awng te thüng-a Pawlae lä khölawng tho kha Kalatia khö hai Prukia pre cäqeng kha aeke prei pyng-a, Ephesi märü-a tyng vi dy. Honi märü-a äni lä Yng saite khimi phütä na hai aeting vi.

² Äni ma “Nang ce lä Yng saite khimi-a aelawng ea Muilaw Käcai dang ö dy mei” näkha düng pa. Äni ce ma “Muilaw Käcai awng saite phüng kai ce lä thai vai te y vi rawng” näkha mäthang pa.

³ Tukha Pawlae ma “Tukä dylä nang ce lä äte makäti baptismae dang ö te mei” näkha düng pa. Äni ce ma “Baptismae Johan üng baptismae dang te vi” näkha näpa.

⁴ Pawlae ma “Baptismae Johan üng baptismae lä hunghö üng aedawng mäkhüng vi dy näte sämai nae vi. Johan lä äma üng leithung-a, tyng saite äni tea yng he kae näkha Isrelae khimi na tea thui pa te vi. Äni ma thui saite lä Areng Isu vi dy” näpa.

⁵ Tukätephüng-a hani älo thai ea, äni ce lä Areng Isu üng ämüng hai-a, baptismae la ö vi dy.

⁶ Pawlae ma äni ce üng älö-a äkö thyng pa ea lä, Muilaw Käcai lä äni ce tea tyng pa vi dy. Tukha äni ce lä Muilaw Käcai ma aepe hai saite älo cawngkhang na aepe ö vi dy. Säthaw üng Angthang Kähawi na la thui pa ö by vi dy.

⁷ Äni ce lä khimi lawng hawlai netä tingtang awng pa te vi.

⁸ Pawlae lä Judae na üng ingkäcai-a ly kha Säthaw üng pre phüng khimi ce tea ri y te hai aedüng ea äni ce yng rung khytä bäleng pa vi. Äni lä hini kätyng, law thungtä tütü sa vi.

⁹ Tungaila khimi phütä na lä bälung tangkö kha yng he ngai ö pa y vi. Khimipui maw-a Areng üng mätu saite phüng na tea käsi thui pa ö vi. Tukätephüng-a Pawlae lä Judae na üng ingkäcai üng tho kha Yng saite khimi na bung nähai vi dy. Tairana näsaite khimi üng cae aetu nae mityng-a, käni qütä älo na aedüng aethui pa vi dy.

¹⁰ Hini kä säning netä tütü sa kha Asia pre cäpi-a, awng saite Judae khimi na hai Käri khimi na angxynlyng lä, Säthaw üng älo angthang thai ö pa vi dy.

Seva üng caw na

¹¹ Säthaw lä Pawlae hai-a tengxyng y cangxei saite kamarae na sa hai pa vi.

¹² Khimi ce lä Pawlae ma tawng saite sipry hai aekhu aena nae na khimi känaw na hai angra kung saite khimi na tea nähai pa kha äni ce üng äqawng-a thyng kha khimi känaw na üng naw saite na hawi hai pa ea angra na bung la äma ce kung saite khimi te üng tho hai ja pa ö vi dy.

¹³ Judae khimi phütä na lä, khölawng tho rungrang ea Areng Isu üng ämüng hai-a, angra na bung mätho hethang aethawsa ö vi. Äni ce lä “Pawlae ma thui saite Isu üng ämüng hai-a, nang bung kai mätho dy” näkha khimi üng äthung-a kung saite angra tea näpa ö vi.

¹⁴ Seva näsaite Judae na üng mäthykung kälengky üng cäpaw lawng säritä na lä hini kätyng sa ö vi dy.

¹⁵ Tungaila angra ma “Isu bung kai mäny vi. Pawlae bung la kai mäny vi. Tungaila nang ce lä ämi ce mei” näkha düng pa vi dy.

¹⁶ Tupyng-a angra kung te khimi lä äni ce tea täba kha äni ce bung bäja ea bo täto pa vi. Äni ce lä kä-o na aesä-ei ea tengxyng y tämaw dang kha honi ing üng aehui ö pang vi dy.

¹⁷ Hini phüng na Ephesi märü üng Judae khimi na hai Käri khimi na angxynlyng ma thai ea lä, äni ce lä ri ö phi pa vi dy. Tukha Areng Isu üng ämüng tea äni ce tämö khai ö phi pa vi dy.

¹⁸ Areng Isu tea Yng saite khimi na lä ly mang kha äma ce üng hunghö na khimi ce maw-a täphawng pa ö vi dy.

¹⁹ Angra haidae hai khimi ce tea hawi y sa saite khimi na lä äma ce üng cae ang-yng na käcüng kha nähai ea khimipui na maw-a maisawi ö vi dy. Honi cae-u na üng ävang na to ea lä, phawisae pjae täsawng bangtä tingtang awng pa te vi.

²⁰ Hini kätyng-a Areng Isu üng angthang lä aesadü kha khimi ce lä mäny ea yng ö mang pa vi dy.

Ephesi märü-a aepuilung te tyng pa

²¹ Hini na pyng-a, Pawlae lä Makedonia khö hai Käri pre cäqeng kha Jerusalem märü-a ly hethang aedawng pyng pa te vi dy. Äni lä “Honi märü-a ly pyng-a Rom märü-a lä ly ngece by vi ai rawng” näkha thui pa vi.

²² Äni lä äma hai mangtä kälu sa saite Timothe hai Erastus ni bung Makedonia khö-a mätaw vi dy. Äma lä Asia pre cäpi-a, käni käqae-a awng te vi.

²³ Honi kätü-a Ephesi märü-a, Areng Isu üng angthang mätu saite phüng-a, aepuilung hai pa vi dy.

²⁴ Demetrius näsaite pething the te khimi lawngtä lä tangkae hai mimi sa te vi. Hini mimi na lä Atemi angra anglaw üng ingkäcai hai aetawng vi. Demetrius lä äma üng äpy na tähang phawisae dang hai mang pa te vi.

²⁵ Demetrius lä äma üng äpy hai honi kälu sa saite khimi na bung aekäcüng hai kha “Rawijae na ä, hini kälu hai-a, mä-ai lä phawisae na dang mang te nang ce lä, mäny ö vi dy.

²⁶ Hini Pawlae näsaite khimi lä, Ephesi märü üng khimi na angxynlyng tea äni üng lo yng rung khytä bäleng vi näte nang ce lä mäny ö vi dy. Äni lä Asia pre cäpi angxynlyng na-a hini kätyng sa vi. Pawlae ma thui saite lo lä khimi üng äkö hai sa saite lä Säthaw na tätang y näkha thui jawjaw vi.

²⁷ Khimi ce lä äni üng lo tängai jawjaw dylä qae y kälang-a, mä-ai üng sa saite na ävang ting y näkha thui vi ai dy. Honi qawng-a cang y khimi ce lä, Atemi angra anglaw cäpaw hethang näkha ämi la äni üng ingkäcai-a ly y dy lyng. Asia pre cäpi hai älawngpre angxynlyng na-a khimi ce lä Atemi angra anglaw käleng tea cäphaw ö te vi.”

²⁸ Honi älo thai ea lä, khimipui na lä Pawlae tea kädawtho ö vi dy. “Äni ce lä Ephesi märü üng Atemi angra anglaw lä kälengky vi” näkha ätüng käleng hai-a, hang ö vi dy.

²⁹ Hini aepuilung saite lä Ephesi märü-a awng pa vi dy. Khimi ce lä Pawlae üng rawijae sa saite Makedonia khö üng khimi Kaju hai, Aristaku ni bung ne kha märü üng miting sa te mityng käleng-a nähai pa ö vi dy.

³⁰ Pawlae lä äma ma honi khimipui na maw-a ly kha älo thui he ngai te vi. Tungaila Yng saite khimi na ma honi kätyng sa y hethang mäkhang pa ö vi.

³¹ Pawlae üng rawijae aecörae mätawngky phütä na ma äni tea khimi mätaw praw kha miting sa te mityng thung-a, kung y hethang aesi aebai pa ö vi dy.

³² Hini kätü-a, aecö saite khimi na lä tengxyng y, xhuxa ö pa vi dy. Phütä na lä älo tho ea mangtä hang kha äkälang phütä na lä älo kälang tho ea mangtä hang ö te vi. Tyng saite khimi kä-awng mang na lä, ätephüng-a aecö ö te mei näte mäny ö y vi.

³³ Judae na lä Alesanda näsaite Judae khimi bung khimipui maw-a, nui pa vi. Khimipui thung üng khimi phütä na lä, Alesanda ätemakä sa ai mei näte ätüng käleng hai-a, hang ö vi dy. Alesanda lä khimipui na tea sitäri-a awng hethang äkö hai mätü pa vi. Äni ce tea älo thui hethang äni lä ngai te vi.

³⁴ Tungaila äni lä Judae khimi vi näte khimi ce ma mäny ea lä “Ephesi märü üng Atemi angra anglaw lä kälengky vi” näkha naeri netä khytä ätüng mangtä hai hang ö vi dy.

³⁵ Tupyng-a märü üng cärei kälengky ma, khimipui na tea sitäri-a, awng hai kha “Ephesi khimi na ä, Ephesi märü lä Atemi angra anglaw üng ingkäcai hai, Känipre üng aeqa saite äni üng mimi kähawi-a rui vi näte älawngpre khimi ce ma, mäny bawi te vi.

³⁶ Hini phüng na lä ämi ma la, e haw y lyng. Tukätephüng-a nang ce lä sitäri-a, awng he kae. Kähawi-a aedawng y käla, äte la, sa he aevaw y vi.

³⁷ Nang ce lä hini khimi ce bung hini mityng-a nähai ö vi. Äni ce lä mä-ai üng cäphaw saite ing na thung-a, kung kha theru sa te y vi. Mä-ai üng angra anglaw tea käsi prawng te la awng te y vi.

³⁸ Demetrius hai äpy pething sa saite khimi na lä, khimi lawng lawngtä tea käsi thui he ngai dylä älo aecei te mityng awng. Aenae pyng saite khimi na la awng. Jung-a la, nang ce teng hethang dang mang.

³⁹ Tungaila nang äkälang ätete phüng na awng dylä märü üng aekäcö nae mityng-a ly kha aedüng hai hethang dang mang.

⁴⁰ Vaini xhuxa saite phüng-a, aecörae mätawngky na ma, käsi thui he awng te vi. Hikä xhuxa hethang lä awng te y vi. Hikä xhuxa hai hethang phüng la mä-ai lä älang mätü haw y lyng” näkha näpa.

⁴¹ Hini kätyng thui pyng ea märü üng cärei kälengky ma khimipui na tea honi mityng üng aeprei hai pa vi dy.