Angtawtha 18 - Caekäcai Kangthae (Lemi)

Korin märü-a Säthaw üng kälu sa pa

¹ Tupyng-a Pawlae lä Athen märü üng tho kha Korin märü-a tyng vi.

² Honi märü-a Ponta khö üng Akuila näsaite Judae khimi lawngtä hai, äni üng nawngpui Precila ni hai aeting vi. Judae khimi qütä na lä Rom märü üng tho hethang Kalodia Sica sanphrang ma aenae lo thui pa te phüng-a, äni ce lä qae y te kätü-a ma, Itali pre üng tho saite khimi na vi.

³ Äni ce lä Pawlae kätyng mawiphö hai taipung kälu sa saite khimi na vi. Tukätephüng-a Pawlae lä, äni ce tea ly kha äni ce hai mangtä kälu sa kha awng pa te vi dy.

⁴ Aehae te Käni qütä Pawlae lä Judae na üng ingkäcai-a Judae khimi na hai Käri khimi na yng hethang äni ce hai Säthaw lo aedüng aethui ö dy.

⁵ Saila hai Timothe ni lä Makedonia khö üng tyng te kätü-a, Pawlae lä Angthang Kähawi kätü qütä thui jawjaw kha Areng Isu lä Mesia vi näte phüng Judae khimi na tea kähawi-a thui mäcai pa ö vi dy.

⁶ Tungaila Judae khimi na lä äni tea älo e pa kha käsi prawng te kätü-a lä, Pawlae lä äma üng kä-o qawng üng angmawngdi na täkhy kha äni lä “Säthaw ma nang ce tea dungtäsa dengpy dylä, honi lä nang ma ce üng sa tämang saite phüng-a kae. Kai üng sa tämang te y. Vai üng hai aetawng ea kai lä ceng kälang khimi na tea ly ai” näkha näpa.

⁷ Tupyng-a Pawlae lä Judae na üng ingkäcai thung üng tho kha Säthaw tea cäphaw saite ceng kälang khimi Titu Justus üng ing-a Angthang Kähawi thui pa vi dy. Honi ing lä Judae na üng ingkäcai hai aenaidei pa vi.

⁸ Judae na üng ingkäcai mätawngky sa saite Krispus hai, äma üng engthung rütä na lä Isu tea yng ö vi dy. Korin märü üng ceng kälang khimi na la, Angthang Kähawi thai ea yng pa kha baptismae la ö mang vi dy.

⁹ Pawlae lä kärungtä-a äsämai haetä nung vi. Areng ma “Ri y hang. Kai üng phüng thui phai thui ba. Sitäri-a awng hang.

¹⁰ Kai lä nang hai mangtä awng te phüng-a, ämi ma la, nang tea käsi sa haw y lyng. Hini märü-a, kai üng khimi na lä awng mang te vi” näpa.

¹¹ Tukätephüng-a Pawlae lä Korin märü-a säningtä hai law tärutä awng kha Säthaw üng älo äni ce tea mätu pa vi dy.

¹² Kalio lä Käri pre-a, Rom aecörae üng mätawngky kälengky-a re kha pyng te thüng-a, Judae khimi na lä aekäcö kha Pawlae bung ne ea älo cei saite mityng mang-a nähai pa vi dy.

¹³ Äni ce ma “Hini khimi lä Judae na üng Ubädi tea elekhei sa kha Säthaw tea cäphaw hethang khimi ce bung bäleng te vi” näkha thui pa.

¹⁴ Pawlae ma älo aepe hethang sa ea lä, Kalio ma “Judae khimi na ä, hini khimi ma Rom Ubädi tängai y käla kaeling-a hawi y saite sa te awng dylä, kai lä nang ce üng thui saite lo tea änawngsa te hai tängai pa ai mang.

¹⁵ Tungaila hini aedüng aethui saite älo hai ämüng na lä nang ce üng reitae hai aesui te phüng-a, nang ma ce ma aethui ö raw te kae. Kai ma hini phüng tea lä tärae cei hethang ngai y lyng” näkha näpa.

¹⁶ Tupyng-a Judae khimi na bung älo cei saite mityng üng äni ma mäthoja hai pa vi dy.

¹⁷ Äni ce lä Judae na üng ingkäcai mätawngky Sothene bung ne kha älo cei saite mityng-a bo pa ö vi. Tungaila Kalio lä honi sa saite tea dawngcang y käla awng pa vi.

Antioh märü-a Pawlae tyng haile pa

¹⁸ Pawlae lä Korin märü-a, käni rui bäraw y-a awng vi. Tupyng-a by jä-ai na te üng tho kha Precila, Akuila ce hai mangtä Siria pre-a tui sangphaw aedang kha ly ö dy. Kenkria märü üng tui sangphaw tho y kälang-a, äni lä Säthaw tea älo aedo te sämai nae tähang-a äma lä äsang aeba vi dy.

¹⁹ Ephesi märü-a tyng saite kätü-a, Pawlae ma Prekila ni Akuila lä märü-a, awng hai pa vi dy. Pawlae lä Judae na üng ingkäcai-a kung kha Judae khimi na hai älo aedüng aethui vi dy.

²⁰ Khimi ce lä äma ce hai mangtä käni rui bäraw y-a, awng hethang mäkai ngaila Pawlae lä ngai pa y.

²¹ Tungaila Pawlae lä “Säthaw ma aely ngai vi dylä, nang ce tea kai ly haile tyng ai mang” näkha tui sangphaw-a paw kha Ephesi märü üng tho ja pa vi dy.

²² Äni lä Kesari märü-a tyng ea tui sangphaw qawng üng aerung pyng-a Jerusalem märü-a ly kha kangkawng üng Yng saite khimi na tea kawng bärai sa pa dy. Tupyng-a Antioh märü-a ly vi dy.

²³ Honi märü-a käni bäraw y, awng pyng-a khölawng tho kha Kalatia khö hai Phrukia khö-a tyng ea lä, Yng saite khimi angxynlyng na tea Säthaw üng älo angthang hai aethaw py pa vi dy.

Ephesi märü hai Korin märü-a Apolo älo thui pa

²⁴ Honi kätü-a Apolo näsaite Judae khimi lawngtä lä Ephesi märü-a tyng pa vi dy. Äni lä Alesanda märü üng vi kha bälung cüng bärai te hai Caekäcai tea lä mäny bärai saite khimi vi.

²⁵ Areng Isu üng phüng na aetu vai saite khimi la vi. Äni lä Isu üng phüng na bälung mitang hai-a, khimi ce tea mätu pa vi dy. Äni lä Isu üng phüng thui tätang khaw te vi. Tungaila äni lä Baptismae Johan üng baptismae ma qaitä mäny te kae vi.

²⁶ Äni lä Judae na üng ingkäcai-a, ri y te hai älo thui vawng vi dy. Precila hai Akuila ni äni üng thui saite älo thai ea lä, äni bung ing-a kähyng kha Säthaw lä khimi ce tea ätemakä aeqang mei näte phüng na kähawi-a, thui mäcai hai pa vi dy.

²⁷ Apolo lä Käri pre-a ly hethang ngai ea lä, Ephesi märü üng kangby jä-ai na ma äni tea aethaw py pa vi. Käri pre üng khimi na tea äni bung lady hethang cae tärü te hai-a säbawng pa dy. Äni lä ha-a tyng ea Säthaw üng tähang kähawi hai-a, yng saite na tea awng mang-a säbawng pa dy.

²⁸ Khimipui na maw-a aedüng aethui bärai ea Judae khimi na tämang vi näte mätü pa vi dy. Ätephüng-a mei nädylä, äni ma Isu lä Mesia vi näte Caekäcai na hai-a mätü pa te vi.