Angtawtha 17 - Caekäcai Kangthae (Lemi)

Thesalonika märü-a Säthaw üng kälu sa pa

¹ Pawlae hai Saila ni lä khölawng tho ea Angphipoli hai Apolonia märü na bung cäqeng kha Thesalonika märü-a tyng pa ö vi dy. Honi märü-a lä, Judae na üng ingkäcai awng vi.

² Pawlae lä äma sa vävawi te kätyng honi Judae na üng ingkäcai-a ly dy. Aehae te Käni thungtä khytä Caekäcai phüng aedüng ö dy.

³ Pawlae lä Caekäcai phüng thui mäcai kha Mesia mätangbälai ea dü te üng aetha te phüng mätu vi dy. Pawlae ma “Kai ma nang ce tea thui saite Isu lä Mesia vi” näkha näpa.

⁴ Judae Khimi phütä na lä Pawlae thui saite älo tätang vi näkha yng ea äni ce lä Pawlae ni Saila te mang-a qa vi dy. Säthaw tea cäphaw saite Käri khimi awng mang te na hai märü thung-a ämüng aethang saite nawngmädi na la qa by vi.

⁵ Tungaila Judae khimi na lä pä-e te bälung awng ö vi. Äni ce lä märü lolang üng khimi käpra na bung käcö kha aepuilung hai ö pa vi dy. Äni ce lä märü angxynlyng na tea aepuilung hai te vi. Jason näsaite üng ing-a, aethaw paitae hai äni ce lä kung ea Pawlae ni Saila bung mäqang ö vi dy. Änini bung khimi ce maw-a re hethang ngai ö vi.

⁶ Änini bung mäqang kha dang y saite kätü-a lä, Jason hai Yng saite khimi phütä na bung märü üng mätawngky na maw-a re kha nähai ö vi. Äni ce ma “Hini khimi ce lä älawngpre mityng qütä-a aede y phi rung khytä sa ö vi. Äni ce lä vaihi kai ce üng märü-a lä tyng ö te vi dy.

⁷ Jason lä äni ce bung äma üng ing-a aehae hai pa vi. Honi khimi ce lä Sica sanphrang üng Ubädi na tängai ö te y vi. Isu näsaite Sanphrang äkälang lawngtä awng vi” näkha ätüng käleng hai hang pa ö vi dy.

⁸ Honi märü üng mätawngky na hai khimipui na thai ea lä, äni ce lä tengxyng y kädawtho kha aepuilung ö vi dy.

⁹ Mätawngky na ma Jason hai äma üng äpy na tea tangkae na py hai pyng-a lä, äni ce bung bälawi pa vi dy.

Beri märü-a Säthaw üng kälu sa pa

¹⁰ Honi kärung-a ma, Yng saite khimi na lä, Pawlae ni Saila bung Beri märü-a mätaw pa hawi vi dy. Honi märü-a tyng ea änini lä Judae na üng ingkäcai-a ly hawi dy.

¹¹ Beri märü üng khimi na lä, Thesalonika märü üng khimi na qawng-a, bälunghaeky ö vi. Tukha Beri märü üng khimi na lä Pawlae thui saite Angthang Kähawi tea kähawi-a tängai ö te vi. Äni ce lä Pawlae thui saite lo kätyng tüng mei, tüng y mei näte mäny haw hethang Caekäcai tea käni qütä phai ö vi.

¹² Judae khimi na lä yng ö mang vi dy. Ämüng aethang saite Käri nawngmädi, nawngmäcaw na la awng mang-a yng ö vi dy.

¹³ Pawlae lä Beri märü-a, Säthaw üng Angthang Kähawi thui kha awng te phüng, Thesalonika märü üng Judae khimi na ma thai te kätü-a lä, Beri märü-a ly kha khimipui na tea täre sa hethang mäcü pa ö vi dy.

¹⁴ Tukha qengtäma Yng saite khimi na ma Pawlae bung pangle pyng mang-a ly hai ja pa ö vi. Tungaila Saila hai Timothe ni lä Beri märü-a, awng hawi jawjaw vi dy.

¹⁵ Äni ce lä Pawlae bung Athen märü-a nähai pa vi dy. Äni ce Beri märü-a vawi y kälang-a, Pawlae lä Saila ni Timothe bung kärang-a, äma tea ly hethang älo täru pa vi dy.

Athen märü-a Säthaw üng kälu sa pa

¹⁶ Pawlae lä Athen märü-a, Saila hai Timothe ni bung aering kha awng te thüng-a, honi märü-a mimi na awng mang te nung ea lä, äni lä bälung hawi y vi dy.

¹⁷ Äni lä Judae na üng ingkäcai-a ly kha Judae khimi na hai Judae na üng Säthaw tea cäphaw saite mityng-a cäphaw te ceng kälang khimi na hai aedüng ö vi dy. Käni qütä märü üng äsäla-ung-a aekäcö kha awng saite khimi na hai äni lä älo aethui vi dy.

¹⁸ Epikura üng bälung käcüng aedawng saite hai Satu-i üng bälung käcüng aedawng saite Särae na hai la, Pawlae lä aedüng aethui vi dy. Honi thung üng khimi phütä na ma “Hini lopu lä äte na thui hethang ngai te mei” näkha düng pa. Äkälang khimi na ma “Äni lä ceng kälang na üng angra na phüng thui te ngaw müng” näkha näpa. Ätemakä mei nädylä, Pawlae lä Areng Isu phüng hai äni dü te üng aetha te Angthang Kähawi thui te phüng-a vi.

¹⁹ Tupyng-a äni ce lä Pawlae bung Aripaku me anghung mang-a, aekäcö saite kawngci mang-a nähai pa vi dy. Äni ce ma “Nang thui saite matu te kangthae phüng kai ce mäny hethang ngai ö by.

²⁰ Nang ce thui saite phüng phütä na lä, kai ce tähang äkangthae vi. Honi älo üng älawngsai na kai ce lä mäny he ngai vi” näkha näpa ö vi. (

²¹ Athen märü üng khimi angxynlyng na hai, honi märü-a awng saite angvüng na lä, angthang kangthae phüng thui kha tängai te hai-a, kätü na byng hai ö te vi dy.)

²² Tupyng-a Pawlae lä Aripaku kawngci maw-a aedaw kha “Athen märü üng khimi na ä, nang ce lä tengxyng y Käri angra na tea tämö khai saite khimi na vi näte kai lä nung te hai-a mäny te vi.

²³ Kai lä nang ce üng märü-a aeke prei kha angra na tea cäphaw saite mityng na kheng te kätü-a, ‘Mäny y saite angra tähang’ näkha cae tärü saite maicang haetä tea nung te vi. Hikä nang ce mäny y käla, cäphaw saite phüng tea vaihi kai lä thui hethang ngai.

²⁴ Honi na lä älawng hai älawng qawng-a awng saite äte amäjy cawngkhang na tea sa pa saite Säthaw kae vi. Honi Säthaw lä älawng käni pyng saite Areng vi. Äni lä khimi üng kö hai sa saite ingkäcai na thung-a awng y lyng.

²⁵ Säthaw lä khimi hai tawngbawi na angxynlyng tea hing hethang aely ngai saite na py pa te vi. Tukätephüng-a khimi ce ma äni tähang lä äte haetä la sa hethang dang y lyng.

²⁶ Säthaw lä angcü-a khimi lawngtä bung sa kha honi khimi üng hai ceng angxynlyng na bung sa pa vi. Säthaw ma honi khimi na bung älawng mityng qütä-a awng hai pa te vi. Honi khimi ceng qütä na awng hethang mityng hai, kätü käni na tea Säthaw lä khai rüng pa te vi.

²⁷ Khimi ce ma Säthaw bung mäqang hai hethang äni lä hini kätyng angxynlyng na sa pa te vi dy. Säthaw lä khimi ce ma äma bung ha kha aeting hai hethang ngai te vi. Tätang khü-a, Säthaw lä mä-ai angxynlyng hai hanglaw-a awng te y vi.

²⁸ Khimi lawngtä ma thui te lä ‘Mä-ai lä äni hai-a, hing kha aetae ea kälu sa haw te kae vi.’ Nang ce üng cae tärü te särae phütä ma ‘Mä-ai lä Säthaw üng nade na vi’ näkha tärü vi.

²⁹ Tukätephüng-a mä-ai lä Säthaw üng nade na vi näte, Säthaw lä sui, tangkae, kälung hai-a saite mimi hai, aetawng vi näkha aedawng ö hethang kae te y. Khimi ce lä äma ce üng kaw te bälung käcüng hai mimi na sa ngaila, honi na lä hing ö te y vi.

³⁰ Jangni-a khimi ce ma Säthaw bung mäny y ngaila äni lä bälung käsa hai awng te vi. Vaihi lä mityng qütä-a khimi ce aedawng mäkhüng hethang hai, äni tea aekö haile tyng hai hethang äni lä losai py te vi.

³¹ Ätephüng-a mei nädylä, Säthaw ma re saite Areng hai-a, älawngpre üng khimi angxynlyng na tea kätüng-a, tärae cei saite kätü lä khai pa pyng te vi dy. Honi kätyng sa hethang, Isu bung kädü thung üng mätha haile te hai-a, khimi angxynlyng na tea sasi mätü te vi dy” näkha näpa.

³² Pawlae ma kädü üng aetha haile te phüng thui te thai ea lä khimi phütä na ma, mänui hai pa ö vi. Tungaila khimi phütä na ma “Nang thui saite phüng, kai ce thai haile tyng hethang ngai rae vi rawng” näkha näpa ö vi.

³³ Tupyng-a Pawlae lä Aripaku kawngci üng ly ja pa vi dy.

³⁴ Khimi phütä na lä Pawlae leithung hui kha Isu tea yng ö vi dy. Honi na thung-a Daionesi näsaite lä, Aripaku kawngci üng äpy lawngtä by vi. Damari näsaite nawngmädi lawngtä hai khimi kälang phütä na lä qa te by vi.