Angtawtha 15 - Caekäcai Kangthae (Lemi)

Jerusalem märü-a kangkawng üng kawngci

¹ Khimi phütä na lä Judae khö üng hai Antioh märü-a ly kha käyng na tea “Nang ce lä Mosi üng reitae kätyng lengkhüng täke te awng y dylä, aeqang te dang haw y” näkha mätu ö vi.

² Tukätephüng-a Pawlae hai Banaba ni lä honi khimi ce hai älo aedüng kha tengxyng y ae-e ö vi dy. Tupyng-a Pawlae ni Banaba hai Antioh märü üng Yng saite khimi phütä na bung mangtä hikä ae-e saite phüng, aedüng hai hethang Jerusalem märü üng kangkawng na ma mätawngky na hai angtawtha na tea mätaw ö vi dy.

³ Kangkawng üng khimi na lä äni ce bung tha pa ö vi. Äni ce lä Phonecia khö hai Samari khö na tea cäqeng ea ceng kälang khimi na Säthaw tea yng kha khimi kangthae aelawng te phüng na thui pa ö dy. Hini angthang phüng-a, kangby jä-ai angxynlyng na lä anghawtho ö phi pa vi dy.

⁴ Jerusalem märü-a äni ce tyng te kätü-a, kangkawng üng Yng saite khimi na hai mangtä angtawtha na, kangkawng üng mätawngky na ma äni ce bung lady pyng-a, äma ce tea Säthaw ma äni ce hai-a sa saite phüng angxynlyng na thui pa ö king vi dy.

⁵ Tungaila Pharisai na thung üng Yng saite khimi phütä na lä aetha kha, “Ceng kälang Khimi na lä lengkhüng täke hethang kae. Mosi üng Ubädi tea bäjui hethang äni ce tea thui he kae” näkha näpa ö vi.

⁶ Angtawtha na hai kangkawng thung üng mätawngky na lä hini phüng aedawng hethang aekäcö ö vi dy.

⁷ Kätü käqae-a aedüng pyng ea lä, Peterae ma aetha kha “Kangby jä-ai na ä, Säthaw lä jangni üng hai ma ceng kälang khimi na yng haw hethang, Angthang Kähawi thui hai hethang kai bung nang ce thung üng re te vi näte nang ce lä mäny ö te vi dy.

⁸ Khimi ce üng bälung mäny saite Säthaw lä Muilaw Käcai bung mä-ai tea py te kätyng, ceng kälang khimi na tea py pa te hai-a äni ce tea bälung aevaw te phüng mätü pa te vi dy.

⁹ Säthaw lä äni ce bung mä-ai hai täphü kha khai te y. Äni ce lä Isu tea yng te phüng-a, äni ce üng bälung la caiping vi dy.

¹⁰ Ätephüng-a nang ce lä Säthaw tea käny hethang ngai ö te vi mei. Mä-ai kangsi na läsy, mä-ai ma läsy, phaw haw y saite müngkäli tea ätephüng-a, ceng kälang üng Yng saite khimi na tea phaw hai ö te vi mei.

¹¹ Mä-ai lä yng kha Areng Isu üng tähang kähawi hai-a Säthaw lä mä-ai bung aeqang te vi dy. Ceng kälang na tea la honi kätyng aeqang te vi dy.”

¹² Banaba ni Pawlae lä äma ni mang hai-a ceng kälang khimi na säla-a awng tea Säthaw ma sa saite cangxei te na hai kamarae angxynlyng na phüng thui te thüng-a, aekäcö saite khimipui na lä sitäri-a tängai kha awng pa ö vi dy.

¹³ Äni ce thui pyng te kätü-a lä, Jaeko ma “Kangby jä-ai na ä, kai üng älo tängai ö kae-e.

¹⁴ Simon ma Säthaw lä angcü-a ceng kälang khimi na thung üng phütä khimi na bung äma üng khimi-a aelawng hai hethang re te hai-a, äni ce bung re vi näte phüng thui mäcai pyng te vi dy.

¹⁵ Caekäcai thung-a buisaw na üng thui saite älo na lä hini phüng hai aetawng te by vi.

¹⁶ Areng ma honi khüng pyng-a Kai ly haile kha Davidae üng pra saite pre Kai ma sa haile vi ai. Pra saite na kangthae sa bälai kha honi pre bung cakhi hai pa vi ai.

¹⁷ Honi kä sa te hai-a älawngpre-a awng saite khimi angxynlyng na hai Kai üng khimi-a aelawng hai hethang Kai ma kähyng saite ceng kälang na Kai tea ly ö vi ai.

¹⁸ Hini lä Jangni-a Säthaw ma thui rüng saite älo vi” näkha näpa.

¹⁹ Tukha Säthaw te mang-a aekö haile saite ceng kälang khimi na tea mätangbälai saite tyng hai hethang mä-ai sa hethang aevaw y lyng.

²⁰ Mä-ai lä äni ce tea cae tärü hethang aevaw vi. Mimi tea löci sa saite mawi ca hang. Aepawng y käla nawngpui nawngpaw kätyng awng vai y. Känawngjang tära kha ra saite üng ängang la ca hethang kae y. Äthi la nei hethang kae y. Hini phüng lä Judae na känyngky saite na vi.

²¹ Ätephüng-a mei nädylä vaicaw üng hai ma aetawng kha Mosi üng Ubädi cae bung Aehae te Käni qütä Judae na üng ingkäcai na thung-a phai te hai Mosi üng älo phüng märü qütä-a thui ö vi dy.

Yng saite ceng kälang khimi na tea py pa saite cae

²² Tupyng-a angtawtha na hai, kangkawng üng mätawngky na kangkawng üng khimi angxynlyng na lä äma ce thung üng khimi na phütä re kha Pawlae ni Banaba hai mangtä Antioh märü-a mätaw he aedawng ö vi. Äni ce lä Yng saite khimi na ma tämö khai saite Basaba näsaite Judae hai Saila ni bung re pa ö vi dy.

²³ Äni ce hai mangtä cae tha pa ö dy. Honi cae lä “Jerusalem märü-a awng saite angtawtha na hai kangkawng üng mätawngky na ma tärü te vi. “Kai ce lä Khrista hai-a nang ce üng kangby jä-ai na vi. Kai ce lä Antioh märü, Siria pre, Kiliki khö üng ceng kälang käyng na tea cae tärü kha cibai sa dy.

²⁴ Kai ce thung üng khimi phütä na lä kai ce üng älo täru y ta ma nang ce tea ly kha mätangbälai py ea bälungbi saite lo na thui te phüng kai ce lä thai vi dy.

²⁵ Tukätephüng-a kai ce lä älo aedüng kha khimi phütä bung re ea nang ce tea mätaw hethang bälung aedü kha sa ö te vi dy. Honi na lä kai ce ma bälung aevaw saite Banaba, Pawlae hai mangtä ly ö ai mang.

²⁶ Pawlae ni Banaba lä mä-ai üng Areng Isu Khrista üng kälu sa te phüng-a dü khytä mätangbälai te thung-a tyng vi dy.

²⁷ Tukha kai ce lä änini hai mangtä Judae ni Saila bung nang ce tea mätaw te vi dy. Kai ce üng cae thung-a tärü saite phüng na la änini ma thui haile pa hawi ai mang.

²⁸ Ngai saite Ubädi qawng-a nang ce lä müngkäli phaw hai y hethang Muilaw Käcai hai kai ce lä bälung aedü ö vi dy.

²⁹ Mimi tea löci sa saite mawi ca hang. Äthi lä ca hang. Känawngjang tära kha ra saite üng ängang lä ca hethang kae y. Aepawng y käla nawngpui nawngpaw kätyng awng vai y. Hini na tea aehi dylä hawiky te vi dy. Nawsaw hawi ö sy” näkha awng te vi.

³⁰ Mätaw saite äni ce lä Antioh märü-a ly kha Yng saite khimi angxynlyng na bung aekäcö hai kha täru saite cae py pa ö vi dy.

³¹ Honi cae tea phai pa saite kätü-a, käyng na aethaw py saite älo na phüng-a kawng ö phi pa vi dy.

³² Buisaw Judae hai Saila ni lä äni ce tea kätü käsa-a aethaw py pa kha yng te cakhi hai rae vi dy.

³³ Änini lä honi mityng-a kätü käqae-a awng pyng ea lä, Yng saite khimi na ma änini bung tähang kähawi py kha Jerusalem märü-a mätaw haile pa vi dy.

³⁴ Tungaila Saila lä ha-a awng hethang aedawng pa vi.

³⁵ Pawlae hai Banaba ni lä Antioh märü-a awng ea Areng Isu üng Angthang Kähawi khimi awng mang saite na hai mangtä mätu kha thui ö vi dy.

Pawlae ni Banaba aeprei hawi dy

³⁶ Känitä-a lä Pawlae ma Banaba tea “Areng Isu üng Lo Angthang mä-ai thui pyng saite märü qütä awng te yng saite na tea ly haile kha äni ce üng sa saite na kheng hawi si” näkha näpa.

³⁷ Hokä ea Banaba lä Johan Marka bung änini hai mangtä nähai hethang ngai pa te vi.

³⁸ Tungaila Johan Marka, jangni-a, bung äma ni hai mangtä khölawng kätengpü-a hui y käla Pamphulia khö-a äma ni te üng ly ja pa te phüng-a, Pawlae lä äni bung nähai hethang aevaw y lyng näkha aedawng pa vi dy.

³⁹ Änini lä älo tengxyng y-a ae-e kha lolang aeprei hawi te vi dy. Banaba lä Johan Marka bung ka kha Saipära angrai sälawng mang-a tui sangphaw hai ly ja pa vi dy.

⁴⁰ Pawlae lä Saila bung re kha thoja te by vi dy. Yng saite khimi na lä Pawlae ni Saila tea Säthaw üng tähang kähawi dang kha änini hai mangtä awng hethang aetang kha mätaw pa dy.

⁴¹ Pawlae lä honi mityng üng hai Siria pre hai Kiliki khö-a ly kha kangkawng üng khimi na tea yng te cakhi hai hethang aethaw py te lo thui pa vi dy.