Angtawtha 14 - Caekäcai Kangthae (Lemi)

Aikonia märü-a Säthaw üng kälu sa pa

¹ Pawlae ni Banaba lä Aikonia märü-a äni ce üng reitae kätyng Judae na üng ingkäcai-a kung hawi kha Isu üng phüng haidae hai thui pa vi dy. Tukha Judae khimi na hai Käri khimi na lä awng mang-a yng pa ö vi dy.

² Tungaila yng he ngai y saite Judae khimi phütä na ma ceng kälang khimi na tea yng pa y hethang mäcü pa ö vi. Äceng kälang na lä käyng na tea kädawtho rung khytä thui kha bäleng pa ö vi.

³ Pawlae hai Banaba ni la honi mityng-a käqae-a awng kha Areng üng phüng ri y te hai ma thui vawng hawi pa vi. Areng Isu ma änini tea cangxei saite na hai kamarae na sa haw hethang haidae py pa vi. Änini ma thui saite Säthaw üng tähang kähawi lä tüng vi näte mätü hethang hikä sa hai pa te vi.

⁴ Märü thung-a awng saite khimi na Angthang Kähawi phüng-a aede ö pa y vi. Phütä na lä Judae khimi na te mang-a qa kha phütä na lä angtawtha na te mang-a awng pa ö vi dy.

⁵ Tupyng-a Judae khimi hai ceng kälang khimi na lä äma ce üng mätawngky na hai Pawlae ni Banaba tea sakälö khü hethang kangru-a aedüng ö vi dy. Äni ce lä Pawlae ni Banaba bung kälung hai käthu kha bädü he aedawng ö vi dy.

⁶ Honi phüng Pawlae hai Banaba ni ma thai hawi te kätü-a lä, Likonia khö üng Lutara hai Debe märü na hai äteng-a awng saite mityng mang-a pryng ja hawi vi dy.

⁷ Honi mityng-a änini lä Areng Isu üng Angthang Kähawi thui jawjaw hawi pa vi dy.

Lutara hai Derbe märü-a Säthaw üng kälu sa pa

⁸ Lutara märü-a aepeng te üng hai ängang dü kha aeke haw y saite khimi lawngtä aety pa vi.

⁹ Äni lä Pawlae thui saite Lo Angthang tängai kha awng te vi. Pawlae lä khimi känaw tea kheng khü ea lä, Isu ma naw te hawi sa pa haw vi näte äni yng te tea nung pa vi.

¹⁰ Pawlae ma “Aetha lawi” näkha naw saite khimi tea älo tüng käleng hai thui pa vi. Äni lä aetha praw kha aebälü ea aeke pa vi dy.

¹¹ Khimipui na lä Pawlae sa saite tea nung kha “Angra na lä khimi kä aecyng kha mä-ai tea ly te vi dy” näkha äni ce üng Likonia khimi ce üng älo tüng käleng hai-a thui ö vi dy.

¹² Äni ce lä Banaba tea Zeus angra käleng näkha kähyng pa ö vi dy. Pawlae tea lä angthang py saite angra Heme näkha kähyng pa vi. Ätephüng-a mei nädylä, äni lä älo khimi ce maw-a älo aepe pa te phüng-a vi.

¹³ Zeus angra üng ingkäcai lä märü üng ärang teng-a awng vi. Honi Zeus angra üng mäthykung lä raebawi, na hai äpa aesi saite na märü üng hawngkhae mang-a nähai pa vi. Zeus angra üng mäthykung hai khimipui na lä mangtä angtawtha ni tea hani na hai mäthy hethang ngai pa ö vi.

¹⁴ Hokä sa hethang phüng na angtawtha Banaba hai Pawlae ni mäny te kätü-a lä, bälung aengai y phi te hai äma ni üng kä-o na sä-ei ea khimi ce thung mang-a aehui kha ätüng käleng hai älo aepe pa vi.

¹⁵ Änini ma “Khimi na ä, ätephüng-a nang ce lä hini kä sa ö te vi mei. Kai ni lä nang ce kätyng khimi by kae be. Kai ni lä nang ce tea Angthang Kähawi thui hethang tyng hawi te kae. Nang ce lä hini ävang ting y te na khaisö kha Säthaw kanghing te mang-a aekö tyng hethang kai ni lä thui te vi dy. Honi Säthaw lä käni älawng, pangle hai honi thung üng ätete angxynlyng na tea sa saite Kung vi.

¹⁶ Jangni leithung mang-a, Säthaw lä ceng kälang khimi angxynlyng na tea äma ce kängai saite kätyng cäphaw hethang py pa te vi.

¹⁷ Tungaila Säthaw lä kähawi sa te hai äma awng saite phüng, khimi angxynlyng na tea mätü pa te vi. Säthaw lä käni mang khöne hai kha äma ce üng kätü tyng ea lä, cawbi cawthai na aethai kha müng hai pa te vi. Nang ce tea raca na mäcaw mang kha anghawtho hai te vi” näpa.

¹⁸ Hini na kätyng angtawtha ni thui ea mäteng ma, khimi ce lä änini tea mäthy hethang reitae hai-a mäkhang haw pa te kae vi.

¹⁹ Tupyng-a Judae khimi phütä na lä Antioh hai Aikonia märü na mang üng tyng kha Lutara märü üng khimipui na tea äma ce te mang-a qa hai hethang Pawlae ni üng thui saite lä tüng y näkha bäleng pa ö te vi. Äni ce lä Pawlae tea kälung hai käthu kha märü ärang mang-a re kha khaisö pa vi dy. Pawlae lä dü dy näkha äni ce lä dawng ö te vi dy.

²⁰ Tungaila yng saite na lä Pawlae üng äteng-a venglükü kha aedaw pa ö vi dy. Tukha äni lä aetha kha märü thung-a kung tyng pa vi dy. Känitä pyng-a Pawlae ni Banaba lä tho kha Debe märü-a ly hawi pa vi dy.

Siria pre Antioh märü-a vawi haile pa

²¹ Pawlae hai Banaba ni lä Derbe märü-a Angthang Kähawi thui kha khimipui na lä awng mang-a yng ö mang pa vi dy. Tupyng-a änini lä Lutara, Aikonia hai Antioh märü na mang-a vawi haile tyng hawi dy.

²² Märü qütä änini lä Yng saite khimi na hai aeting ea Säthaw üng Angthang Kähawi thui kha Isu tea yng jawjaw hethang aethaw py pa hawi dy. Tukha änini ma “Mä-ai Isu tea yng saite na lä Säthaw üng pre-a kung y te kälang-a, mätangbälai saite na aeting ö vi ai” näkha Yng saite khimi na tea thui pa dy.

²³ Pawlae hai Banaba ni lä kangkawng qütä-a mätawngky na bung re kha khai pa dy. Tukha böjae kha aetang ea äni ce yng saite Areng ma rui hethang aetang pa.

²⁴ Tupyng-a Pawlae hai Banaba ni lä Pisidia khö üng Pamphulia khö-a tyng hawi vi dy.

²⁵ Änini lä Peka märü-a la Angthang Kähawi thui hawi te vi. Honi pyng-a Atalia märü-a tyng hawi dy.

²⁶ Honi märü-a änini lä tui sangphaw aedang ea Antioh märü mang-a ly hawi vi dy. Jangni-a Antioh märü üng kangkawng tea Pawlae ni Banaba bung honi mityng-a ly kha Säthaw üng tähang kähawi thui hai hethang mätaw te vi dy. Säthaw ma änini tea säbawng hethang aetang pa ö vi dy. Honi kälu sa te lä vaihi Pawlae ni Banaba lä khüng hawi te vi dy.

²⁷ Antioh märü-a änini tyng te kätü-a, änini lä Yng saite khimi na bung aekäcö hai kha äma ni hai-a Säthaw ma sa saite kälu na läsy, ceng kälang khimi na yng hethang Säthaw ma kätü kähawi py te phüng-a läsy, änini ma thui hawi pa haile king te vi dy.

²⁸ Tupyng-a änini lä Yng saite khimi na hai mangtä kätü käqae-a awng hawi vi dy.