Angtawtha 12 - Caekäcai Kangthae (Lemi)

Sakälö khü saite tyngrae pa

¹ Honi kätü-a Herodae sanphrang lä kangkawng üng phütä khimi ce bung ne kha sakälö khü hethang aetawng pa vi dy.

² Äni lä Johan üng kangby Jaeko bung aekei sawngseng hai-a bädü pa hai te vi.

³ Hokä sa tea Judae khimi na ngai ö te, Herodae ma nung te kätü-a lä, Peterae bung la ha hai pa vi dy. (Honi kätü lä täkaw aepae saite aesi qa y käla täkaw ca saite pawi kätü vi.)

⁴ Herodae lä Peterae bung ne kha thawng thung-a pä-ung pa vi dy. Reisae kangkawng bälitä tea lä äni bung ty hai pa vi dy. Cäqengja pawi käni pyng-a, Peterae bung Judae khimi na üng maw-a, mätho hai kha älo cei hethang aedawng te vi.

⁵ Tukätephüng-a Peterae bung lä thawng thung-a pä-ung pa vi dy. Tungaila kangkawng üng khimi na ma la Peterae tähang bälung mitang hai-a, Säthaw ma äni tea säbawng pa hethang tähang aetang kha awng ö vi dy.

Peterae lä thawng thung üng aelawi pa

⁶ Peterae bung Herodae ma khimi ce üng maw-a mätho kha älo cei saite käni tyng y te kälang üng kärung thung-a, Peterae lä reisae lawng netä säla-a i kha awng pa vi. Äni bung singqy rui känetä hai, mäkhing kha khai pa vi. Thawng thung üng thokhae kung-a la reisae na ty hai ö pa vi.

⁷ Säthaw üng angtawtha lä Peterae üng äteng-a, qengtäma tyng kha thawng thung-a aevang hai pheng pa vi dy. Säthaw üng angtawtha ma Peterae üng mäna-a täkhaw kha “Aetha dawde lawi” näkha i bälaw pa vi. Tukha Peterae äkö caecei üng singqy rui na lä aela king pa vi dy.

⁸ Säthaw üng angtawtha ma “Nang ma üng khabai aemäkhing kha kho painai aecö lawi” näpa. Peterae lä honi thui te kätyng sa pa vi dy. Tupyng-a Säthaw üng angtawtha ma “Känih aekhu kha kai leithung hui lawi” näkha näpa.

⁹ Peterae lä thawng thung üng tho kha Säthaw üng angtawtha leithung hui pa vi dy. Äni lä Säthaw üng angtawtha ma sa saite tea tätang vi näte mäny pa y vi. Äsämai mang nung kha awng te vi näkha aedawng te kae vi.

¹⁰ Änini lä thawng rui saite reisae na awng te mityng känetä tea cäqengja kha süng hai sa saite märü üng hawngkhae-a tyng hawi vi dy. Honi hawngkhae lä äma ma aepä-awng va pa vi. Tukha änini lä tho kha lolang äteng-a, bäjui hawi vi dy. Tupyng-a Säthaw üng angtawtha lä qengtäma la pa ja vi dy.

¹¹ Tupyng-a Peterae lä aemäny va haile saite kätü-a, “Areng Isu lä Säthaw üng angtawtha bung mätaw kha kai tea Herodae sanphrang kö thung üng hai Judae khimi na ma käsi tyng hai hethang ngai saite angxynlyng na thung üng aelawi hai pa dy näte kai lä vaihi mäny te vi dy” näkha näpa.

¹² Äni lä hini kätyng mäny te kätü-a, Johan Marka üng änä-awi Maeri üng ing-a ly ja vi dy. Honi ing-a lä Yng saite khimi pui na aekäcö ea aetang kha awng ö te vi.

¹³ Peterae lä baesung üng kätho täkhü tea Roda näsaite mawsawng nawngmädi lä kätho teng-a ly pa dy.

¹⁴ Äni lä Peterae üng ätüng mae kha anghawtho phi te hai ma kätho pä-awng y käla ingthung mang-a aehui ea kung haile kha äni ma khimi ce tea “Peterae lä kätho üng ärang-a awng dy” näkha näpa.

¹⁵ Äni ce ma “Nang lä mäthö te vi dy” näpa. Tungaila mawsawng nawngmädi ma äma thui saite lä tätang vi näte phüng thui pa täto kha äni ce ma “Honi lä Peterae bung rui saite Säthaw üng angtawtha ngaw müng” näpa dy.

¹⁶ Tungaila Peterae lä kätho tea täkhü täto kha awng pa be ea lä, äni ce ma kätho pä-awng pa vi dy. Tukha äni ce lä Peterae bung nung kha cangxei ö vi dy.

¹⁷ Peterae ma äni ce sitäri-a awng hethang äkö hai mäkhang kha äma bung Säthaw ma thawng thung üng makä sa kha bälawi pa mei näte phüng na thui pa vi dy. Tupyng-a “Hini phüng na Jaeko hai kangby jä-ai kälang na tea thui pa jo ba ä” näkha täru khüng ea lä mityng kälang mang-a ly ja pa vi dy.

¹⁸ Khö aevang ea lä “Peterae lä ma-a vi dy mei” näkha thawng rui saite reisae na lä aedüng kha bälungbi te hai ri ö phi vi dy.

¹⁹ Herodae sanphrang lä Peterae bung mäqang hai ea aeting pa y vi kha rui saite reisae na tea älo düng lilöpro kha äni ce tea bädü hai pa vi dy. Tupyng-a Herodae sanphrang lä Judae khö üng tho kha Kesari märü-a käni käqae-a awng pa vi dy.

Herodae sanphrang dü pa

²⁰ Herodae lä Taira märü üng khimi na hai Sidon märü üng khimi na tea tengxyng y kädawtho kha honi märü üng khimi na lä, aekäcö ea äni tea ly pa ö dy. Angcü-a Herodae üng ing-a pyng saite mätawngky Blastus üng säbawng saite na dang ö dy. Tupyng-a Herodae sanphrang tea kung kha aede haile hethang älo na thui pa ö dy. Ätephüng-a mei nädylä, äni ce üng pre lä Herodae sanphrang üng pre-a, vyngsai na rang kha ca nei te phüng-a vi.

²¹ Herodae sanphrang ma aedo saite käni-a lä, sanphrang üng aekhu aena saite ävang käting na aekhu aena kha äma üng aety nae-a aety ea khimi ce tea älo na thui pa vi dy.

²² Äni ce ma “Hini ätüng lä khimi üng ätüng y vi. Angra üng ätüng vi” näkha hang ea thui pa ö vi dy.

²³ Sanphrang lä äma tea khimi ce ma bälaw hethang mäkhang te y vi. Säthaw üng phung-ang khimi ce tea bälaw hai pa y te phüng-a, qengtäma Säthaw üng angtawtha ma äni tea kälung ca hai kha dü pa vi dy.

²⁴ Säthaw üng Älo angthang lä aethang hai dü kha Yng saite khimi na lä awng mang rae ea aepu rae pa vi dy.

²⁵ Banaba ni Sawlae lä äma ce sa he awng saite kälu na sa khüng pyng ea Johan Marka bung ka ea Jerusalem märü-a ly kha Antioh märü-a vawi ö vi dy.