2 Timote 3 - Caekäcai Kangthae (Lemi)

Kangkhüng Käni na

¹ Kai ma vaihi thui saite lo tea lä hawihai pailai tängai ö khü ba. Kangkhüng Käni na-a lä rae saite kätü na awng ai.

² Khimi ce lä äma ce tea xyng hai äma ce üng tangkae tea bälung aevaw ö ai. Äni ce lä aethaw te hai bälungleng kha khimi ce phüng käsi thui ö ai. Änä-awi äpä-ai üng lo tängai ö y ai. Säbawng saite khimi na tea kawng te lo thui y te hai, Säthaw tea tämö khai ö y ai.

³ Äni ce lä khimi kälang na tea bälung aevaw ö y. Khimi ce üng sa tämang te tea bälawi y saite hai, khimi ce phüng kaeling thui ö ai. Mä-ai ma tea aeküng haw y saite hai kädaw rae saite hai kähawi saite tea ngai y te na awng ö ai.

⁴ Äni ce lä äma ce rawijae na bung äma ce üng täre na tea a ö ai. Aedawng y käla sa rungrang te hai, khimi kälang na qawng-a hawiky näte aedawng ö ai. Säthaw tea bälung aevaw y käla äma ce üng ngaiphi tüng y saite tea bälung aevaw ö ky saite na vi.

⁵ Äni ce lä Säthaw tea cäphaw te kätyng sa ngaila äni üng haidae tea e ö te vi. Honi kätyng awng saite khimi na hai aede ö hang.

⁶ Honi khimi thung üng phütä lä khimi kälang na ma äni ce bung ingthung-a kung hai hethang kaeling sa ö vi. Honi ingthung-a awng saite aethawdi te nawngmädi na tea kaesyng y mätu saite mang-a hui hai hethang bärawi bäleng ö te vi. Honi nawngmädi na lä hunghö sa te phüng-a äma ce lä kähawi y sa te tea aedawng ö tütü te vi dy. Tukha äni ce lä ngaiphi tüng y saite angxynlyng na mang-a hui ö vi dy.

⁷ Nawngmädi honi na lä aetu leilae ngaila älo mitang tea thaikaw haw ö te y vi.

⁸ Jangni-a Janne hai Jambre ni ma Mosi tea elekhei sa hawi vi dy. Honi kätyng sa tämang saite khimi na lä älo mitang tea elekhei sa ö te by vi. Äni ce lä aedawng kaw y kha kätüng-a yng ö y vi dy.

⁹ Äni ce lä khimi ce tea kaeling sa jawjaw haw ö y lyng. Ätephüng-a mei nädylä jangni-a Janne hai Jambre ni lä kaerö saite khimi kae näte Judae khimi na mäny te kätyng khimi qütä ma la änini phüng tea mänysy ö ai mang.

Timothe tea Pawlae ma täru kha aethaw py saite lo na

¹⁰ Tungaila khimi ce tea kai ma mätu saite na nang lä kähawi-a mäny te vi. Nang lä kai üng awng saite na, mawlang tähang kaedawng saite, yng saite, änawngsa saite, bälung aevaw saite hai mätang bälaica pyng saite angxynlyng na mäny te vi dy.

¹¹ Antioh märü, Aikonia märü hai Lutara märü-a, khimi ce ma känaw py kha mätang bälaica-a sa saite cawngkhang na tea nang lä mäny te vi. Tungaila Areng lä honi angxynlyng na thung üng kai bung aeqang te vi dy.

¹² Tätang khaw-a thui si nädylä, Isu Khrista hai bungtä awng te hai-a Säthaw üng bälung kängai-a sa saite khimi qütä lä sakälö khü saite aeting khaw ai.

¹³ Käsi sa te hai kaeling sa te khimi na lä sa tämang ö rae ai mang. Äni ce lä khimi ce tea kaeling sa te kätyng khimi kälang na ma la äni ce tea kaeling sa ö by ai.

¹⁴ Tungaila nang lä kai ma khimi ce tea mätu te kätyng älo mitang tea kähawi-a rui jawjaw hethang kae. Honi na lä lo mitang vi näkha nang lä mäny ba. Ätephüng-a mei nädylä nang tea mätu saite khimi na tea nang lä ae-y haw te vi.

¹⁵ Nang lä nade te kätü üng hai ma Caekäcai ping tea mäny pyng te vi dy. Honi Caekäcai na lä Säthaw üng aeqang saite lä Isu Khrista tea yng te hai-a dang te vi näte nang mäny haw hethang säbawng saite cae vi.

¹⁶ Caekäcai angxynlyng na lä Säthaw ma tärü saite na üng bälung kaedawng thung-a mäkung te vi. Honi lä khimi ce tea mätu hethang, pring hethang, sa tämang saite mätü hethang, cüng saite sa hethang, khimi ce tea mätu pa hethang, säbawng haw ai.

¹⁷ Hini Caekäcai phüng-a Säthaw üng mawsawng lä hawi saite kälu angxynlyng sa haw hethang hai aerü rüng kha awng haw ai.