2 Piter 1 - Caekäcai Kangthae (Lemi)

¹ Hini cae lä Isu Khrista üng mawsawng hai angtawtha lawng saite, kai, Simon Peterae, te üng vi. Kai lä Säthaw hai mä-ai üng Aeqangkung Isu Khrista üng cüng saite hai-a kai ce kätyng yng te ävang käting dang saite na tea cae tärü te vi.

² Säthaw lä äma tea hai mä-ai üng Areng Isu Khrista bung nang ce üng mäny saite hai-a tähang kähawi hai awngneng saite lä nang ce tea cungrü-a py sy.

Säthaw üng re saite

³ Mä-ai lä Säthaw üng aely kängai-a hing haw hethang äma üng haidae hai angxynlyng na mä-ai tea py vi dy. Äni üng phung-ang hai hawi saite hai-a mä-ai bung re saite Säthaw tea mäny te hai-a honi angxynlyng na mä-ai lä dang ö te vi dy.

⁴ Äni üng phung-ang hai hawi saite hai-a äma lä mä-ai tea lengphi saite hai ävang käting älo aedo saite na py te vi dy. Tukätephüng-a äni üng älo aedo saite na hai-a nang ce lä hini älawngpre üng ngaiphi tüng y saite hai-a täphra saite üng aelawi kha Säthaw üng käcüng aeme aeqa saite kätyng nang ce üng käcüng-a aeme aeqa saite thung-a la awng haw ö vi ai.

⁵ Tukätephüng-a nang ma ce üng yng saite tea hing saite täbawi hethang aethawsa ö he kae. Nang ce üng hini aeme aeqa saite käcai lä Säthaw bung mäny rae saite tea täbawi hethang aethawsa ö te vi.

⁶ Säthaw bung mäny rae saite tea aeküng saite hai täbawi ö. Aeküng saite tea lä khung saite hai täbawi ö. Khung saite tea lä Säthaw üng aely kängai kätyng hing saite tea täbawi ö.

⁷ Säthaw üng aely kängai-a hing saite tea lä nang ce üng yng saite kangby jä-ai na tea bälung aevaw saite hai-a täbawi ö te vi. Yng saite kangby jä-ai na bung bälung aevaw saite khimi angxynlyng na tea bälung aevaw saite hai täbawi ö.

⁸ Nang ce lä hini aeme aeqa saite käcai-a awng rae awng rae dylä, mä-ai üng Areng Isu Khrista bung mäny saite lä nang ce tähang aetütü-a lawng ö y vi ai. Tukha nang ce lä khimi ce tea kähawi-a säbawng haw ö vi ai.

⁹ Tungaila khimi lawngtä lä hini aeme aeqa saite käcai awng y vi dylä, äni lä ämi kangjö lawngtä kätyng vi. Äni lä jangni-a äma üng hunghö sa saite na Säthaw ma bälawi vi dy näte tea sa tämang te vi dy.

¹⁰ Tukätephüng-a, yng saite kangby jä-ai na ä, nang ce lä Säthaw üng ka saite hai re saite na cakhi hethang aethawsa rae sa rae ö. Nang ce hini kätyng sa dylä, nang ce lä yng saite tea manila khaisö ö y vi ai.

¹¹ Säthaw lä nang ce tea mä-ai üng Aeqangkung Areng Isu Khrista üng dungtäsa pre thung-a kähawi-a lady vi ai.

¹² Tukätephüng-a nang ce lä hini na tea mäny kha lo mitang yng khü ngaila, kai lä nang ce tea tämang y hethang thui haile jawjaw ai.

¹³ Kai ma hini älawngpre-a hing te jungtä, nang ce tea hini na phüng aedawng haile tyng ö hethang lä kai üng kälu vi näte kai lä mäny te vi.

¹⁴ Tukha kai lä qae y tea ma dü ai näte mä-ai üng Areng Isu Khrista ma täphawng te phüng-a mäny te vi dy.

¹⁵ Tudylä kai dü pyng-a, nang ce lä hini na tea tätang aedawng haile ö jawjaw hethang kai lä aethawsa vi ai.

Kai ce lä ämi hai Khrista üng phung-ang tea nung ö khe saite

¹⁶ Mä-ai üng Areng Isu Khrista lä haidae hai äma üng ly haile ai näte nang ce tea kai ce ma thui te kätü-a, khimi ce ma thui saite cäkae na tea thui te y lyng. Tungaila kai ce lä kai ma ce üng ämi hai Khrista üng phung-ang käleng tea nung khe ö te vi dy.

¹⁷ Mä-ai üng Pä-ai Säthaw lä Isu tea tämö khai saite hai phung-ang py te vi. Äte angxynlyng na qawng-a lengky saite Säthaw ma Känipre mang üng ätüng hai-a, “Hini lä Kai ma bälung aevaw saite Kai üng Cäpaw vi. Äni lä kai tea anghawtho hai te vi” näkha thui te kätü-a kai ce lä awng ö te vi dy.

¹⁸ Kai ma ce khekhe lä cai saite me anghung qawng-a, Khrista hai mangtä awng te kätü-a, Käni khösang mang üng tho saite ätüng thai ö te vi dy.

¹⁹ Tukha kai ce lä buisaw na ma thui pyng saite lo tea ae-y ö rae te vi. Nang ce lä buisaw na üng lo na tea tängai hethang aeteng khaw ö te vi. Ätephüng-a mei nädylä, buisaw na ma thui saite lo na lä käving thung-a maibung kätyng aevang te phüng-a vi. Honi kaevang lä khö aevang kha Khrista lä kädang Tengpaw kaevang kätyng nang ce üng bälung thung-a säde te khytä aevang vi ai.

²⁰ Aely lengky te lä, Caekäcai thung-a awng saite buisaw na üng lo lä ämi lawngtä ma la äma üng kaedawng hai thui mäcai haw y lyng näte nang ce lä mäny ö hethang kae.

²¹ Ämi buisaw la äma üng aely kängai kätyng thui te y. Honi jüng-a Muilaw Käcai ma äni ce tea pyng kha Säthaw üng thui hai hethang ngai saite lo na tea äni ce lä thui ö te vi dy.