2 Korin 5 - Caekäcai Kangthae (Lemi)

Mä-ai üng ätabung kangthae na

¹ Mä-ai ma üng hini ätabung lä tänaetä awng hethang taipung kätyng vi. Hini taipung aene te kätü-a, mä-ai lä khimi üng äkö hai sa y käla Säthaw ma mä-ai tähang sa pa saite Känipre dungtäsa ing-a awng haw vi ai näkha mäny ö te vi.

² Mä-ai lä hini taipung-a tänaetä awng te thüng-a, Känipre üng ing-a awng hethang aedawng kha anghawtho y te hai thui ö te vi.

³ Säthaw ma mä-ai tea py saite ätabung dang te kätü-a, mä-ai lä ätabung qa y käla awng ö vi ai.

⁴ Mä-ai lä mä-ai ma üng aene saite taipung kätyng ätabung awng ö te vi. Mä-ai lä mätang bälai aeting te phüng-a, hang ö sung te vi. Hini kätyng hang sung saite lä hini älawngpre hai aesui saite mä-ai üng ätabung tea khaisö hethang ngai ö te phüng-a y vi. Kai ce lä dü haw saite mä-ai üng ätabung tea Säthaw ma py te dü y saite ätabung kangthae hai aeleng hethang ngai ö te phüng-a vi.

⁵ Hini kätyng mäqa hethang Säthaw lä mä-ai tea sa rüng te vi dy. Vaimaw mang-a mä-ai lä hawi saite na dang hethang Säthaw ma Muilaw Käcai bung py te hai-a aedo khü te vi dy.

⁶ Tukätephüng-a mä-ai lä Säthaw tea bälung ae-y khü jawjaw haw ö te vi. Hini älawngpre hai aesui saite ätabung-a mä-ai lä hing te jungtä, Areng üng ing hai hanglaw vi näte mäny ö te vi.

⁷ Kai ce lä nung saite na hai-a hing te y lyng. Kai ce lä yng saite hai-a hing ö te vi.

⁸ Kai ce lä Areng tea bälung ae-y khü ö te vi. Mä-ai lä älawngpre hai aesui saite ätabung üng hai kähanglaw-a awng kha Areng hai mangtä awng hethang ngaiky te vi.

⁹ Tungaila mä-ai lä hini älawngpre üng ätabung-a la awng haw te läsy, y dylä Areng üng ing-a la awng haw te läsy, aely lengky te lä Areng tea kawng hai hethang mä-ai lä ngaiky ö te vi.

¹⁰ Mä-ai angxynlyng lä Khrista ma tärae cei hethang äni üng maw-a aedaw ö hethang kae. Hini älawngpre-a mä-ai lä awng te thüng-a, mä-ai sa saite aeteng khaw te ävang na, y dylä Säthaw lä mä-ai tea dengpy vi ai.

Kai ce lä Säthaw üng angtawtha na vi.

¹¹ Mä-ai lä Areng tea tämö khai kha ri hethang kae te mäny te phüng-a, Angthang Kähawi tea yng hethang khimi ce tea mäci ö te vi. Säthaw lä mä-ai tea mäny king te vi. Nang ce üng bälung thung-a kai üng phüng la mäny ö phi by näkha kai lä aethang khai te vi.

¹² Kai ce lä mä-ai ma üng hawi saite na phüng nang ce tea thui haile hethang aely ngai te y. Kai ce lä nang ce tea kai ma ce üng phüng aethaw hai haw hethang ngai ö te vi. Khimi kälang na lä khimi ce nung haw saite hai aethaw ngaila, äni ce lä Säthaw maw-a cüng saite phüng tea dawng ö te y vi. Nang ce ma kai ce üng phüng aethaw haw dylä, nang ce lä honi khimi ce tea mäthang haw ö ai.

¹³ Kai ce lä kangthö lawng dylä, Säthaw tähang mäthö ö te vi. Hokä y käla, khimi kangthö y dylä, nang ce tähang kae vi.

¹⁴ Khrista lä khimi qütä tähang dü pa te phüng-a, khimi angxynlyng na lä äni hai mangtä dü vi dy näte mä-ai lä mäny ö khü te vi dy. Tukätephüng-a mä-ai tea lä Khrista üng bälung aevaw saite ma pyng te vi.

¹⁵ Khrista lä khimi angxynlyng na tähang dü pa te vi dy. Tukätephüng-a hing saite kangthae dang te khimi angxynlyng na lä äma ce üng tähang hing hethang kae te y vi dy. Äni ce tähang dü pa saite hai Säthaw ma mäning haile tyng saite Areng üng tähang, hing pa hethang lä aeteng khaw ö te vi.

¹⁶ Tukätephüng-a mä-ai lä vaihi üng hai aetawng kha ämi lawngtä tea la älawngpre üng khimi na üng kaedawng kätyng dawng ö te y vi. Jangni-a kai ce lä Khrista üng phüng tea älawngpre khimi na üng kaedawng kätyng aedawng ngaila, vaihi lä hini kätyng dawng ö te y vi dy.

¹⁷ Khrista hai bungtä awng saite khimi qütä lä, khimi kangthae-a lawng vi dy. Älang kangrüng kätyng hing saite na lä aemai king vi dy. Älang kälang kangthae-a hing saite lä tyng te vi dy.

¹⁸ Hini angxynlyng na tea lä Säthaw ma sa te vi dy. Mä-ai lä Khrista hai-a Säthaw üng täre na lawng saite üng hai äni üng kängby jä-ai na-a lawng ö vi dy. Tudylä äni ma mä-ai tea lä khimi kälang na bung la Säthaw üng kängby jä-ai na lawng hai by hethang kälu py te vi dy.

¹⁹ Khrista hai-a hini älawngpre üng khimi angxynlyng na tea äma üng täre na üng hai äma üng rawijae na-a lawng hethang Säthaw ma mäqa te phüng kai ce lä thui ö te vi. Säthaw lä khimi ce üng hunghö na tea dawng te y vi dy. Hini phüng tea mä-ai lä thui hethang kae.

²⁰ Tukätephüng-a mä-ai lä Khrista üng angtawtha na lawng ö vi dy. Säthaw lä kai ce hai-a nang ce tea mäci te vi. Kai ce ma Khrista tähang-a nang ce lä Säthaw üng täre na üng hai äma üng rawijae na-a lawng ö hethang Säthaw ma kai ce hai-a mäci te kätyng aebai te hai mäci ö te vi.

²¹ Khrista lä manila äte hunghö sa vai te y vi. Tungaila Säthaw lä mä-ai üng tähang-a äni tea lä hunghö awng te kätyng mäthi te vi dy. Tukätephüng-a mä-ai lä Khrista hai bungtä awng ö dylä, Säthaw ma mä-ai tea lä khimi käcüng-a mäthi vi ai.