2 Korin 3 - Caekäcai Kangthae (Lemi)

Kähing py saite älo aenai te kangthae

¹ Nang ce üng maw-a kai ce lä aethaw ö te käthi vi mei. Hokä y dylä kai ce lä khimi phütä na kätyng, lady hai saite cae lä nang ce tähang aely ngai ö te vi mei. Hokä y dylä nang ce ma tärü saite cae tea kai ce lä aely ngai ö te vi mei.

² Nang ma ce khekhe lä mä-ai üng bälung thung-a tärü saite cae kätyng vi. Khimi qütä ma hini cae tea lä phai kha mäny haw te vi.

³ Khrista khekhe ma hini cae tea tärü kha kai ce hai-a tha te vi. Hini cae lä caetui hai tärü te y. Hing saite Säthaw üng Muilaw Käcai hai tärü te vi. Honi lä kälung phei na qawng-a tärü te y. Khimi ce üng bälung thung-a tärü te vi.

⁴ Kai ce lä Khrista hai-a Säthaw tea ae-y khü te phüng-a, hini lä thui ö te vi.

⁵ Kai ce lä hini kälu tea kai ma ce ma sa haw vi näkha thui ö haw te y. Säthaw ma kai ce tea hini kälu sa hethang sakaw saite py vi dy.

⁶ Säthaw äma khekhe lä kai ce tea älo aenai saite kangthae üng mawsawng lawng hethang sakaw saite py vi dy. Honi älo aenai saite lä tärü saite ubädi hai aetawng te y. Honi lä Muilaw Käcai üng aenai saite lo vi. Tärü saite Ubädi lä mä-ai bung dü saite mang-a tha kha Muilaw Käcai lä mä-ai tea kähing py te vi.

⁷ Säthaw ma Mosi tea kälung phei qawng-a tärü saite Ubädi py te kätü-a, Säthaw üng phung-ang lä aetüng te vi dy. Mosi üng mimai qawng-a Säthaw üng phung-ang lä kangjai-a la ngaila, Isrelae khimi na lä Mosi üng mimai tea kheng haw ö te y vi dy. Mä-ai bung dü saite mang-a tha te Ubädi lä phung-ang käleng hai tyng te vi dy.

⁸ Muilaw Käcai üng kälu lä Ubädi tyng te qawng-a cang y phung-ang aesangky tätang khaw ai.

⁹ Ubädi hai-a Säthaw lä khimi ce tea dengpy te vi. Tungaila Ubädi lä phung-ang hai tyng te vi dy. Älo aenai saite kangthae hai-a Säthaw lä mä-ai bung khimi käcüng-a mäthi te vi. Älo aenai saite kangthae lä ubädi qawng-a tengxyng y phung-ang lengky te vi dy.

¹⁰ Älo aenai saite kangthae üng phung-ang lä tengxyng y leng te phüng-a, älo aenai saite kangrüng üng phung-ang lä aemai vi dy.

¹¹ Tänaetä khai saite älo aenai te kangrüng lä phung-ang awng vi dylä, dungtäsa awng saite älo aenai te kangthae lä phung-ang tengxyng y aesangky vi dy.

¹² Mä-ai lä älo aenai saite kangthae lä awng jawjaw ai näkha aethang khai te phüng-a, thui vawng ö te vi.

¹³ Mosi üng mimai-a phung-ang aemai saite Isrelae khimi na nung y hethang äni lä äma üng mimai tea känih hai täphung te vi dy. Mä-ai lä hini kätyng y.

¹⁴ Säthaw lä Isrelae khimi na üng bälung na tea tangkö hai pa te vi dy. Tukätephüng-a, äni ce lä vaihi khytä, aenai saite älo kangrüng üng ubädi phai te kätü-a, khimi ce üng bälung lä känih haetä hai khu te kätyng awng vi. Khimi lawngtä Khrista tea yng dylä, Khrista ma honi känih tea mäthuija pa te vi.

¹⁵ Vaihi khytä Isrelae khimi na lä Mosi üng ubädi phai te kätü-a, äni ce üng bälung na lä hini känih hai khu saite kätyng vi.

¹⁶ Tungaila khimi lawngtä Areng tea yng te kätü-a, Areng lä hini känih tea mäthuija pa te vi.

¹⁷ Areng lä Muilaw vi. Areng üng Muilaw Käcai awng saite mityng qütä-a, äni lä khimi ce bung bälawi pa te vi.

¹⁸ Tukätephüng-a mimai tea täphung y saite mä-ai angxynlyng na lä Areng üng phung-ang tea nung kha khimi kälang na tea mätü ö te vi. Muilaw awng saite Areng üng phung-ang lä mä-ai bung mäqa ea Areng hai mangtä aetawng khaw hethang sa kha mä-ai üng phung-ang lä lengky rae lengky rae jawjaw te vi.