2 Korin 2 - Caekäcai Kangthae (Lemi)

¹ Tukätephüng-a kai üng bälung thung-a lä nang ce tea ly haile tyng y hethang aedawng te vi. Tudylä kai lä nang ce tea bälungsi hai y vi ai.

² Kai ma nang ce tea bälungsi hai dylä, ämi ma kai tea anghawtho hai ai mei. Kai ma bälungsi hai saite khimi na lä kai tea anghawtho hai haw y lyng.

³ Tukätephüng-a kai lä nang ce tea honi cae tärü te vi dy. Nang ce tea kai tyng te kätü-a, kai tea bälungsi hai hethang kai lä ngai te y. Nang ce lä kai tea anghawtho hai hethang kae. Kai anghawtho dylä, nang ce angxynlyng la anghawtho ö by ai näte kai lä bälung ae-y khü te vi.

⁴ Jangni üng cae tärü te kätü-a, kai lä bälungbi, bälung mawng kha minaw tui na rui te vi dy. Kai üng mawlang kaedawng lä nang ce tea bälungsi hai hethang y. Tungaila kai lä nang ce tea makätangtä bälung aevaw mei näte tea mäny hai hethang ngai te vi.

Hunghö sa te khimi tea hunghö bälawi saite

⁵ Hunghö sa saite khimi ma khimi ce tea bälungsi hai vi dylä, äni lä kai tea ma qaitä sa te y lyng. Äni lä nang ce angxynlyng tea kai qawng-a cang y bälungsi haiky-a sa te vi dy. Kai lä honi phüng tea awng mang-a thui hethang ngai te y.

⁶ Nang ce thung üng khimi awng mang saite na lä hunghö sa saite lawngtä tea bäjeng rüng pyng te vi dy. Hini bäjeng saite lä äni tähang aeteng khaw te vi.

⁷ Tungaila vaihi lä äni tea hunghö bälawi kha aethaw py hethang kätü vi. Nang ce ma hini kätyng sa ö y dylä, äni lä bälungsi xüng kha aethawsi ea äma üng yng saite tea khaisö vi ai.

⁸ Tukätephüng-a nang ce lä äni tea bälung aevaw tätang vi näte phüng vaihi äni tea mätü hethang kai lä nang ce tea mäci te vi.

⁹ Kai lä cae tärü te kätü-a, nang ce tea käny hethang ngai te vi dy. Kai üng täru saite lo na nang ce lä tängai king mei näte kai lä mäny hethang ngai te vi dy.

¹⁰ Nang ce ma khimi ce üng hunghö na bälawi dylä, kai la äni ce tea bälawi te by vi. Hunghö bälawi hethang awng dylä, Khrista maw-a nang ce üng phüng-a kai lä hunghö bälawi pyng te vi dy.

¹¹ Setan angra ma mä-ai tea bäja haw y hethang kai ce lä hini kätyng sa hethang kae ö te vi. Mä-ai lä Setan angra üng käsi mawlang kaedawng tea mäny te vi.

Troas märü-a Pawlae üng bälung mawng saite na

¹² Kai lä Troa märü-a Khrista üng Angthang Kähawi thui hethang tyng te kätü-a, Areng lä ho-a kälu sa hethang älang sa rüng pa vi dy.

¹³ Tungaila kai üng kängby jä-ai Tita bung aeting y te phüng-a, kai lä tengxyng y bälung mawng phi te vi dy. Tukätephüng-a kai lä honi Troas märü-a awng saite khimi na tea cibai sa te lo thui pyng-a lä Makedonia khö-a ly ja te vi dy.

Khrista hai-a bäja saite

¹⁴ Mä-ai üng Säthaw tea mä-ai bälaw ö si. Säthaw lä mä-ai bung Khrista üng bäja saite pawi-a qa hai jawjaw hethang phüng-a vi. Mä-ai ly saite mityng qütä-a, Säthaw lä Khrista üng Angthang Kähawi thui hai jawjaw te vi. Honi lä ämui kähawi kätyng lawng hai hethang vi.

¹⁵ Mä-ai lä Säthaw tähang Khrista üng löci mui kähawi kätyng vi. Mä-ai lä Säthaw ma aeqang saite khimi na hai dengpy saite khimi na thung-a aehö saite ämui kätyng vi.

¹⁶ Tungaila Säthaw ma dengpy hethang awng saite khimi na tähang, mä-ai lä kädü üng tho saite ämui kärawng kätyng vi. Säthaw ma aeqang saite khimi na tähang, mä-ai lä hing saite üng ämui kähawi na vi. Tätang khaw-a thui hethang nädylä, ämi lawngtä la äma ma hai-a hini kälu tea lä sa haw y lyng.

¹⁷ Khimi awng mang saite na lä ävang dang hai hethang Säthaw üng lo thui ö te vi. Mä-ai lä hini khimi ce kätyng y. Säthaw ma mä-ai bung mätaw te phüng-a, mä-ai lä Säthaw üng maw-a bälung mitang khaw hai Khrista üng Angthang thui ö te vi.