2 Korin 13 - Caekäcai Kangthae (Lemi)

Pawlae üng kangkhüng üng sädi py saite na

¹ Hini lä nang ce tea kai ly ai näte ämäthung üng vi ai. Caekäcai thung-a, “Khimi lawngtä lä khimi kälang lawngtä tea cy hethang ngai dylä, honi phüng mäny saite khimi lawng ne lawng thungtä awng dylä, äni ce üng lo tea tängai hethang hawi te vi” näkha näte vi.

² Kai lä äbaeni üng nang ce tea tyng te kätü-a, sädi py rüng pyng te vi dy. Vaihi kai lä kähanglaw mang thui haile be ai. Kai lä jangni-a üng hai sa tämang pyng saite khimi na hai hunghö sa saite khimi kälang angxynlyng na tea bäheng y käla dengpy ai.

³ Nang ce lä kai te mang hai-a Khrista lä älo aepe vi näte mäny hethang kai tea mätü hai he mäkai ö te vi. Khrista lä nang ce üng kangkawng thung-a aethawdi te y vi. Äni lä äma üng haidae nang ce tea mätü ai.

⁴ Khimi ce ma Areng bung thinglang qawng-a täheng te kätü-a, äni lä aethawdi te vi dy. Tungaila vaihi äni lä Säthaw üng haidae hai hing te vi. Kai ce la äni hai bungtä vi te phüng-a, aethawdi ö ngaila, Säthaw üng haidae hai-a Isu hai mangtä hing kha nang ce tähang kälu sa ö ai.

⁵ Nang ce lä yng saite tüng mei, tüng y mei, näte mäny hethang nang ma ce tea aekäny ö. Hini kätyng aekäny te kätü-a, nang ma ce üng bälung thung-a, Isu Khrista awng näte nang ce lä mäny ö te y mei. Nang ce äthung-a Khrista awng näte mäny ö y dylä, nang ce üng yng saite lä tüng te y vi.

⁶ Hini kätyng kai ce lä käny pyng ea Säthaw üng saite angtawtha na vi näte nang ce lä mäny vi ai näte aethang khai ö te vi.

⁷ Nang ce äte haetä la sa tämang y hethang kai ce lä Säthaw tea aetang ö te vi. Kai ce lä Säthaw üng tüng saite angtawtha na vi näte khimi ce üng maw-a mätü hethang y. Tungaila nang ce kätüng sa saite lä aely leng te vi. Kai ce üng phüng khimi ce dawng saite lä aely leng te y.

⁸ Kai ce lä lo mitang tea elekhei sa haw ö te y. Kai ce lä lo mitang tähang xyng kälu sa haw ö te vi.

⁹ Kai ce aethawdi te kätü-a, nang ce aethaw awng dylä, kai ce lä kawng ö vi. Kai ce lä nang ce tea cungrü saite khimi na lawng hethang aetang ö te vi.

¹⁰ Tukätephüng-a kai lä kähanglaw-a awng te thüng-a, hini phüng na cae tärü te vi. Tudylä kai tyng te kätü-a, kai lä Areng ma py saite aenae hai nang ce tea pring y lyng. Hini aenae lä nang ce üng yng saite lä aethaw awng hethang Areng ma kai tea py te vi. Nang ce tea aethawsi hai hethang y lyng.

Kangkhüng üng cibai sa saite lo

¹¹ Kai üng kängby jä-ai na ä, kangkhüng üng cibai sa saite lo lä nang ce lä nawsaw hawi kha anghawtho ö sy. Cungrü hethang aethawsa ö. Kai ma nang ce tea thui pyng saite tea tängai ea bälung haetä awng kha awngneng te hai-a ma awng ö. Hini kätyng nang ce sa dylä, bälung aevaw te hai awngneng te käpy Kung, Areng Säthaw, lä nang ce hai mangtä awng ai.

¹² Nang ce lä nang ma ce tingtawi bälung aevaw te hai lady ö.

¹³ Säthaw üng khimi angxynlyng na ma nang ce tea cibai sa te lo thui ö vi.

¹⁴ Areng Isu Khrista üng tähang kähawi, Säthaw üng bälung aevaw saite hai Muilaw Käcai üng aede saite lä nang ce angxynlyng na hai mangtä awng sy.