2 Korin 12 - Caekäcai Kangthae (Lemi)

Pawlae üng äsämai hai aetüng saite na

¹ Äte la ävang ting te y ngaila, kai lä aethaw haw te vi. Tudylä Areng ma kai ce tea mätü saite äsämai na hai aetüng saite phüng na nang ce tea kai thui ai.

² Leithung üng khösäning hawlai bälitä-a aesangky saite Känipre thung-a Säthaw ma nähaija pa saite Khrista üng äkähui lawngtä bung kai lä mäny vi. Säthaw ma äni üng ätabung tea aesangky saite Känipre-a nähaija te mei y dylä, äsämai mätü te mei näte kai lä mäny y ngaila Säthaw lä mäny te vi.

^3-4 Säthaw ma hini khimi bung paradai thung-a nähaija vi näte kai lä mäny vi. Säthaw ma äni üng ätabung tea Paradai-a nähaija mei y dylä äsämai mätü te mei kai lä mäny y ngaila Säthaw lä mäny te vi näkha kai lä thui haile tynglyng te vi. Äni lä khimi üng täbawng hai älo aepe haw y saite na, thui mäcai haw y saite lo na thai vi dy.

⁵ Kai lä honi khimi phüng tea aethaw haw te vi. Tungaila kai ma üng phüng lä aethaw y lyng. Kai ma üng aethawdi saite phüng xyngtä aethaw vi ai.

⁶ Kai lä aethaw hethang ngai dylä, kangthö kätyng älo aepe y lyng. Ätephüng-a mei nädylä, kai lä lo mitang na aepe te vi. Tungaila kai lä aethaw y lyng. Khimi ce ma kai üng sa saite nung kha thai saite na phüng-a cang y kai tea tämö khai hai hethang kai lä ngai te y vi.

⁷ Tukha Säthaw ma kai tea mätü te cangxei phi saite aetüng te na phüng-a, kai lä bälung lengphi y hethang Säthaw ma kai üng ätabung thung-a nawphi saite bäthaw tea ru hai te vi. Säthaw ma Setan angra üng angtawtha bung kai tea bo hai hethang py pa vi dy.

⁸ Areng ma hini mäthaw tea täkeja hethang qeng thungtä kai lä aetang pyng te vi dy.

⁹ Tungaila Areng lä kai tea, “Kai üng tähang kähawi lä nang tähang aelo te vi. Nang lä aethawdi te kätü-a, kai üng haidae lä cungrü te vi” näkha mäthang vi dy. Tukätephüng-a kai üng aethawdi saite phüng anghawtho te hai kai lä aethaw vi ai. Tudylä Khrista üng haidae lä kai hai mangtä awng vi ai.

¹⁰ Khrista üng tähang-a, aethawdi saite, mänui hai saite, mätang bälai saite, sakälö khü saite hai rae saite na kai aeting dylä, kai lä kawng te vi. Kai lä aethawdi te kätü-a, Khrista üng haidae lä kai tea awng te vi.

Korin märü üng yng saite na tähang Pawlae üng bälungbi saite

¹¹ Kai lä kangthö kätyng sa vi dy. Tungaila nang ce lä kai tea hini kätyng sa hai te vi dy. Nang ce lä kai tea bälaw hethang kae saite khimi na vi. Kai lä Säthaw üng maw-a aely leng y saite khimi lawng ngaila, nang ce ma aesangky-a mäthi saite angtawtha na kätyng aely leng te lawngtä by vi.

¹² Kai lä nang ce hai mangtä awng saite kätü-a, angtawtha lawngtä üng äsäny lä cangxei saite hai kamarae na tea änawngsa te hai sa pyng te vi dy.

¹³ Kai lä nang ce tea kangkawng kälang na üng aely leng y te kätyng dawng te vi mei. Kai ma üng aely ngai saite na phüng-a, nang ce tea kai lä bälungbi hai y lyng. Hini xyngtä phüng-a nang ce lä kangkawng kälang na hai aetawng te y. Hini kätyng nang ce tea kai üng sa tämang saite tea lä bälawi ö ba.

¹⁴ Vaihi kai lä nang ce tea ly hethang qeng thungtä aerü te vi dy. Kai aely ngai saite na hai-a nang ce tea kai lä bälungbi hai y lyng. Kai lä nang ce te üng tangkae na ngai te y. Kai lä nang ce bung ngai te kae. Caw nade na lä änä-awi äpä-ai ni tähang tangkae na mätung ö hethang kae te y vi. Änä-awi äpä-ai ni lä caw nade na tähang tangkae na mätung he kae.

¹⁵ Kai tea awng saite angxynlyng na nang ce tea py hethang tähang-a kai lä anghawtho vi ai. Kai lä nang ce tea säbawng he kai üng hing saite mäteng ma py hethang awng rüng te vi. Kai lä nang ce tea bälung aevaw phi te phüng-a, nang ce lä kai tea äje cäcaw bälung aevaw ö te vi mei.

¹⁶ Kai lä nang ce tähang müngkäli lawng hai te y näte nang ce lä mäny ö te vi. Tungaila khimi phütä ma kai lä nang ce te üng ävang dang hethang kaeling kaemae sa te vi dy näkha aedawng ö te vi.

¹⁷ Makä sa kha kai lä nang ce tea kaeling kaemae sa vi mei. Nang ce tea mätaw saite khimi na thung üng lawngtä hai-a kai lä ävang dang te vi mei.

¹⁸ Kai lä Tita bung nang ce tea ly hethang mäci kha mätaw te vi dy. Kai lä Khristen kängby jä-ai lawngtä bung la äni hai mangtä mätaw te by vi dy. Tita lä nang ce te üng äte amäjy na la te vi mei. Kai ni lä mangtä kälu sa hawi te vi.

¹⁹ Ämi ma la kai ce tea cy haw y hethang älo thui saite na nang ce lä kätü qütä aedawng ö mei. Kai ce lä Khrista hai bungtä kha Säthaw üng maw-a älo thui ö te vi dy. Bälung aevaw saite kängby jä-ai na ä, kai ce sa saite angxynlyng na lä nang ce üng yng saite na ca rae hethang vi.

²⁰ Kai tyng te kätü-a, nang ce üng awng saite na tea kai lä bälung kawng te y näkha kai lä bälung mawng te vi. Nang ce la kai awng saite hai bälung kawng ö y by vi ai näte kai lä bälung mawng te vi. Kai lä nang ce säla-a aejaw aemang saite, pä-e saite, kädawtho saite, ae-aw saite, käsi prawng saite, khimi phüng aeqa saite, bälungleng saite hai xhuxa saite na tea aeting ai näte bälung mawng te vi.

²¹ Nang ce tea tyng haile te kätü-a, nang ce üng maw-a kai üng Säthaw ma kai bung aemäneng hai ai näte kai lä bälung mawng te vi. Tudylä jangni üng hai ma hunghö sa kha ae-ui y käla vaihi khytä hunghö sa saite khimi awng mang te tähang bälung nawphi ai näkha kai lä bälung mawng te vi. Nang ce thung üng khimi awng mang saite na lä pawprae saite, täkübäjang sa saite, hai ngaiphi tüng y saite na awng kha ae-ui ö y te phüng-a kai lä bälungsi vi ai.