1 Timote 2 - Caekäcai Kangthae (Lemi)

Kangkawng thung-a mangtä aetang ö

¹ Tukha khimi angxynlyng na tähang awng mang-a nang ce aetang pa hethang kai lä angcü-a ma mäci te vi. Säthaw tea khimi angxynlyng na tähang aesi aebai pa hethang, äni ce üng kängai na mäkai pa hethang hai äni ce tähang kawng te lo thui pa.

² Sanphrang na hai aecörae mätawngky angxynlyng na tähang, kähawi-a aetang pa ö. Tudylä mä-ai lä awngneng te hai derui deso-a awng haw ö ai. Tukha mä-ai la Säthaw üng kängai hai käcai-a awng haw ö ai.

³ Hini lä hawi kha mä-ai bung aeqang pa saite Säthaw tea kawng hai te vi.

⁴ Säthaw lä khimi angxynlyng na bung aeqang kha älo mitang mäny hethang ngai hai bawi te by vi.

⁵ Ätephüng-a mei nädylä Säthaw lä lawngtä xyng awng kae. Khimi ce hai Säthaw säla-a aede hethang sa haw pa saite Kung lä Khrista Isu lawngtä xyng kae vi.

⁶ Äni lä khimi qütä aelawi hai hethang äma üng hing saite aepy kha dü pa te vi dy. Säthaw ma khai khaw te kätü-a, hini angthang lä khimi qütä tea thai hai te vi dy.

⁷ Honi phüng-a Säthaw lä ceng kälang na tea yng saite hai älo mitang phüng-a angthang thui hethang angtawtha-a kai bung re te vi. Kai thui saite lä lo mitang vi. Kaeling y lyng.

⁸ Kai lä Säthaw tea cäphaw hethang aeting saite mityng qütä üng nawngmäcaw na tea käcai-a awng kha aetang hethang äkö na täryng hai hethang ngai te vi. Äni ce lä kädawtho y käla lawng lawngtä aejaw aemang y hethang kae.

⁹ Nawngmädi na tea la khimi ce üng ämi kaepi-a hai khimi qütä äni ce tea tämö khai he kaeteng-a aekhu aena hai hethang kai lä ngai te vi. Äni ce üng äsang na lä kanglai pro-a aesa ö hang. Äni ce lä sui na, khawisäling kälung na hai ävang ting bärai saite kä-o, nitha na la aemäthy hethang kae ö y.

¹⁰ Säthaw üng kängai-a hing saite nawngmädi na lä khimi kälang na tea säbawng ö sy. Hikä sa te hai äma ce tea äcae kähawi aesa ö te vi dy.

¹¹ Nawngmädi qütä lä Säthaw üng phüng aetu ö sy. Hokä mätu saite särae na tea äni ce lä tämö khai ö sy.

¹² Nawngmädi na ma kangkawng thung-a nawngmäcaw na tea mätu kha äni ce tea pyng hai hethang kai lä ngai te y vi. Nawngmädi na lä sitäri-a awng hethang kae.

¹³ Ätephüng-a mei nädylä Adam bung angcü-a Säthaw lä sa te vi dy. Tupyng-a ni Evi bung sa te kae.

¹⁴ Setan lä Adam tea kaeling thui te y. Nawngmädi tea ni thui te kae. Tukha nawngmädi lä hunghö sa te kung-a aelawng te vi dy.

¹⁵ Nawngmädi na lä caw na aepeng te hai-a aeqang te dang ö vi ai. Äni ce lä Isu Khrista tea yng saite, khimi ce tea bälung aevaw saite, cai saite hai khimi ce ämi kaepi-a Säthaw üng kängai-a hing jawjaw dylä Säthaw ma äni ce bung aeqang pa ö ai.