1 Timote 1 - Caekäcai Kangthae (Lemi)

¹ Mä-ai aethang khai saite Isu Khrista hai Aeqangkung Säthaw üng särilo hai-a, Isu Khrista üng angtawtha kai, Pawlae, ma hini cae tärü te vi.

² Yng saite phüng-a nang lä kai üng cäpaw tätang kätyng awng te, Timothe ä, nang tea hini cae kai lä tärü te vi. Mä-ai üng Pä-ai Säthaw hai Areng Isu Khrista ma tähang kähawi, bäheng saite hai awngneng saite nang tea py jo sy.

Kätüng y mätu saite särae na tea sädi py pa

³ Makedonia khö-a kai ly he aetawng te kätü-a, nang lä Ephesi märü-a awng hethang mäci te vi. Ätephüng-a mei nädylä nang lä kaesyng y-a mätu saite särae na tea mäkhang hethang särilo thui haw ai.

⁴ Kangsi kangjaw na cäkae kangrüng thung-a tenglei y thui saite na hai ceng kaesui kaebeng na phüng, kätü bärawng kha thui y hethang äni ce tea nang lä särilo hai mäkhang ba. Hini na phüng-a khimi ce lä aejaw aemang ö te vi. Hini na lä äni ce ma yng te hai-a Säthaw üng kälu sa hethang säbawng haw te y.

⁵ Hini särilo üng mawkung lä yng saite na üng lawng lawngtä tea bälung aevaw saite vi. Hini bälung aevaw te na cai saite bälung hai, käsi sa y näkha mäny saite hai kätüng yng saite bälung awng saite khimi na lä dang haw ai.

⁶ Tungaila kätüng y mätu saite särae na lä hini Säthaw üng ngai saite na tea khaisö ö te vi. Hini jüng-a, äni ce lä älo aetütü na phüng thui ö xyng te kae.

⁷ Äni ce lä Mosi üng Ubädi mätu saite särae na-a aelawng hethang ngai ö vi. Tungaila äni ce lä äma ce thui saite phüng na tea mäny ö y. Äni ce lä ae-y nae hawi vi näkha thui te älo tea äma ce mäteng ma mäny ö te vi.

⁸ Säthaw üng Ubädi na kätüng-a mätu dylä, Ubädi lä hawi vi näte mä-ai lä mäny ö dy.

^9-10 Säthaw lä khimi cüng saite na tähang Ubädi lä py te y näte mä-ai la mäny ö te by. Säthaw üng Ubädi tängai y saite khimi na, Säthaw tea elekhei saite khimi na, Säthaw tea tämö khai y saite khimi na, hunghö sa jawjaw saite khimi na, Säthaw kängai-a awng y saite khimi na hai Säthaw tea mäny hethang ngai y saite khimi na tähang lä Ubädi py te vi dy. Hini Ubädi lä äma ce üng nä-awi pä-ai na hai khimi kälang na tea bädü saite na, täkübäjang sa saite na, nawngmädi tingtawi, nawngmäcaw tingtawi mangtä i saite na, khimi ce bung ne kha mawsawng tangnae sa hai he khimi kälang na tea jaw saite na, kaeling lo thui saite na, älo mitang thui hethang äni ce aedo pyng saite kätü-a mäteng ma kaeling sa saite na, Säthaw phüng kätüng mätu te tea elekhei sa saite na tähang Säthaw lä Ubädi py te vi.

¹¹ Hini mätu saite kätüng lä cangxei saite Säthaw üng phung-ang phüng Angthang Kähawi hai mangtä aebäla te vi. Hini lä Säthaw ma kai tea sa hai saite kälu vi dy.

Pawlae ma Isu Khrista tea kawng te lo thui pa

¹² Mä-ai üng Areng Isu Khrista tea kai lä kawng te lo thui dy. Äni lä kai tea aethaw py te vi. Äni üng kälu sa hethang re kha ae-y haw saite khimi lawngtä kätyng-a kai bung aedawng hai pa te phüng-a vi.

¹³ Kai lä jangni-a Isu lä Khrista phüng käsi na thui kha yng saite na tea mätang bälai-a älang chawngkhang hai sa kha säkälö khü ngaila Khrista lä kai tea bäheng te vi. Ätephüng-a mei nädylä kai ma käsi sa saite tea mäny y te lä Khrista tea yng pa y te phüng-a vi.

¹⁴ Mä-ai üng Areng lä kai tea tengxyng y tähang kähawi py te vi dy. Kai la äni tea yng kha khimi kälang na tea bälung aevaw haw hethang sa te by vi dy. Ätephüng-a mei nädylä kai lä Isu Khrista hai bungtä awng te vi dy.

¹⁵ Hini thui saite lo lä ae-y nae hawi kha yng king hethang aeteng khaw te na vi. “Isu Khrista lä hunghö sa saite khimi na bung aeqang hethang älawng qawng-a ly te vi dy.” Honi hunghö sa saite khimi angxynlyng na qawng-a kai lä hunghö saky te vi.

¹⁶ Tungaila Säthaw lä kai hunghö sa saite na thung üng käsiky tea bäheng phi te vi. Ätephüng-a mei nädylä Isu Khrista üng änawng saky saite phüng lä kai te mang hai-a khimi ce tea mätü hethang ngai hai te vi. Tukha äni tea yng saite khimi na lä äma ce tea hini kätyng änawngsa ai näte tea mäny hethang ngai hai te vi. Ätephüng-a mei nädylä Säthaw ma khimi ce tea lä dungtäsa hing saite dang hethang ngai hai te vi.

¹⁷ Dungtäsa pyng saite Sanphrang, dungtäsa hing saite, ämi ma la nung haw y saite, lawngtä xyng awng saite, Säthaw tea dungtäsa tämö khai te hai bälaw jawjaw sy. Amen.

Pawlae ma Timothe tea aethaw py pa

¹⁸ Kai üng cäpaw Timothe ä, buisaw phütä na ma nang sa hethang phüng thui rüng vai saite na kätyng kai lä nang tea hini särilo py te vi. Tukätephüng-a Angthang Kähawi tähang kähawi-a aety hethang buisaw na ma thui saite lo na lä nang tea säbawng hai vi ai.

¹⁹ Nang lä käsi sa y näkha mäny te hai Khrista tea yng khi ba. Khimi phütä lä käsi kähawi mäny saite bälung tea khaisö ö te vi. Tukätephüng-a äni ce lä yng haw ö y vi dy.

²⁰ Äni ce thung-a Humenai hai Alesanda ni la qa hawi te vi. Kai lä änini bung Setan angra üng kö thung-a a te vi dy. Honi hai-a Säthaw phüng änini ma käsi thui haw y hethang aetu hawi sy.