1 Korin 5 - Caekäcai Kangthae (Lemi)

Kangkawng-a sa tämang saite

¹ Nang ce thung-a lawngtä lä täkübäjang sa vi näte khimi ce ma kai tea thui khü te vi. Säthaw bung mäny y saite na mäteng ma hini kätyng täkübäjang sa y lyng. Nang ce thung-a lawngtä lä änä-awitaw hai i vi näte kai lä thai te vi.

² Nang ce lä saerae kha bälungsi hethang awng ngaila, aethaw ö lae te vi. Hini khimi bung lä nang ma ce thung üng mäthoja hethang kae.

^3-4 Kai lä nang ce hai kähanglaw-a awng ngaila, kai üng bälung-a lä nang ce hai mangtä awng te vi. Vaihi nang ce üng aekäcö saite thung-a kai awng te kätyng, Areng Isu ma kai tea py saite aenae hai kai lä hini känyng he hawi te hunghö sa saite khimi tea dengpy hethang phüng dawng rüng pyng te vi dy. Nang ce lä kangkawng kätyng aecö ö hethang kae. Honi kätü-a kai üng bälung-a lä nang ce hai mangtä awng vi ai. Areng Isu üng haidae lä nang ce hai mangtä awng by vi ai.

⁵ Nang ce lä hini khimi bung Setan angra üng äkö thung-a, a hethang kae. Äni üng ätabung tea Setan ma mätangbälai hai te phüng-a, äni lä ae-ui haw te vi. Tupyng-a Areng ly haile te kätü-a lä äni bung aeqang vi ai.

⁶ Nang ce lä nang ma ce üng kangkawng phüng tea aethaw hethang hawi te y. Caekäcai thung-a, “Täkaw aepae saite aesi äjecäcaw lä täkaw awngmang-a aepae hai vi” näte tea nang ce lä aedawng haile ö. Honi kätyng, hunghö sa saite hini khimi lä awng mang saite khimi na tea hunghö sa haw hai te by vi.

⁷ Nang ce lä hunghö hai aesui saite täkaw aepae te aesi kangrüng tea lä käde phae ö la. Hini kätyng sa dylä, nang ce lä täkaw aepae saite aesi qa y te täkaw kangthae kätyng lawng ö vi ai. Nang ce lä Säthaw üng khimi käcai tätang na lawng ö vi ai. Khrista lä mä-ai üng hunghö na tähang äma bung löci aesa te vi dy. Äni lä Judae na üng Cäqengja te pawi-a löci mawi-a bädü saite beram caw kätyng vi.

⁸ Tukätephüng-a, Säthaw üng Cäqengja saite pawi kätü-a, mä-ai lä hunghö hai käsi sa te phüng thui saite täkaw aepae te aesi kangrüng hai sa hethang kae y. Mä-ai lä täkaw aepae saite aesi qa y te hai pawi sa ö si. Kai lä cai saite hai lo mitang phüng thui hethang ngai te vi.

⁹ Kai ma tärü pyng saite cae thung-a, kai lä nang ce tea täkübäjang sa saite khimi na hai mangtä kangby jä-ai aesa y hethang thui te vi dy.

¹⁰ Kai ma Säthaw bung mäny y saite khimi na lä täkübäjang sa saite na, bädö saite na, kaeling kaemae sa saite na hai mimi na tea cäphaw ö saite na vi näkha thui te y lyng. Nang ce lä hini khimi ce tea aehi dylä, hini älawngpre üng tho ö hethang kae.

¹¹ Kai ma thui hethang ngai te lä khimi lawngtä ma, “Kai lä Khristen vi” näkha thui pyng-a, täkübäjang sa kha ae-aw saite, mimi na tea cäphaw saite, khimi ce tea käsi prawng saite, märui saite, kaeling kaemae sa saite na awng dylä, nang ce lä äni hai kangby jä-ai sa hethang kae y. Nang ce lä hini kätyng khimi ce hai bö mäteng mangtä ca ö hang.

¹² Kangkawng üng ärang-a awng saite khimi na tea tärae cei hethang lä kai üng kälu y lyng. Tungaila kangkawng hai aesui saite khimi tea nang ce lä tärae cei hethang kae.

¹³ Kangkawng üng ärang-a awng saite khimi na tea lä Säthaw ma tätang tärae cei vi ai. Caekäcai thung-a honi phüng thui te lä, “Hawi y saite khimi bung lä nang ce thung üng mäthoja la” näkha awng vi.