रोमी 4 - चेपाङ1 लौ उया ङीकोः तोकानः आब्राहाम् त तोओलेः गत स्याव्आ दाय्ह्सा। 2 पेओ काम् जाङ्ह्ती ह ओउःपाय् परमेस्वर्कोः मीक्हाङः जुगाङ् नीङ्तो स्याव्आ त खेःया ओउःइपाय् लयःकोः नेह्रो ओर्ताक्सा खाय्चौ खेःतो। खेःल परमेस्वर्कोः मीक्हाङः आब्राहाम्इ नेह्रो ओर्ताक्सा काम्पाय् दोह्मा जाङ्ह्उलु। 3 “आब्राहाम्इ परमेस्वर्कायः ङ्हाम्आकान् ओउःत झ्यान्ते परमेस्वर्इ लयःकोः मीक्हाङः ओउःकायः नीङ्तोलेः योआथै” त दाय्ह्ती दाय्ह्ओ परमेस्वर्कोः आखरःहाङः लेखती मुनाः। 4 सुलाङः मान्ताइ काम् केलःती जाङ्ह्ओ त खेःया ओउःकोः काम् जाङ्ह्झ्याङ्कोः पैसालेः दोःनाः ओउः पैसापाय् सोह् बयःओलेः खेःल ओउःकोः काम् जाङ्ह्झ्याङ्कायः बयःओ लेःआः। 5 काम् केलःती जाङ्ह्ओ मान्तापाय् ओउःत लेःआः सुसुइ परमेस्वर्कायः जुगाङ् म्रोताक्ओ काम्पाय् “जाङ्ह्सा खाय्ङल” त ल्हुङ्हाङः चीःआक्तीको “लौ परमेस्वर्इ रेव्ओ काम् जाङ्ह्ओ मान्ताकायः पेतो स्याव्ताक्सा खाय्नौ” त ङ्हाम्नौ ओउःकोः ङ्हाम्झ्याङ्कायः परमेस्वर्इ लयःइ मीक्हाङः पेतोलेः योनौ। 6 उय्ह्लेकोः दावुद् राजा ओउःतलेः स्यान्ती तोओ खेःतो। परमेस्वर्कायः म्रोताक्ओ काम् आःताः जाङ्ह्माःत सुसुकायः परमेस्वर्इ पेतो योनाःथास ओउः मान्तापाय् आन चोङाय्तो लेःआः इ। 7 “सुसुकोः रेव्ओ काम्लम्पाय् परमेस्वर्इ म्हीत्ताक्तीमा क्युम्ह्ताक्तीमा वाय्ओ लेःआः ओउः मान्तापाय् गुच्युक् चोङाय्तो स्याव्लेःआ बा। 8 सुसुकोः रेव्ओ काम्लम्पाय् परमेस्वर्इ थेङ्ती गम्उलु ओउः मान्तापाय् गुच्युक् चोङाय्तो स्याव्ओ लेःआः बा” त दाय्ह्ती दावुद् राजापाय् आखरःहाङः दाय्ह्आ। 9 इत चोङाय्तो स्याव्ओ स्याव्ओलम्पाय् यहुदीकोः पुन् तात्ती जवओ मान्ता झुङ्आले खेःइली सबै मान्ताइ एत स्याव्सा खाय्नानी दोह् हायःती दाय्ह्सा ङाइपाय् ङ्हाहाङः दाय्ह्ओलो लेखालेः आखरःहाङःपाय् “आब्राहाम्इ परमेस्वर्कायः ङ्हाम्आकान् ओउःत झ्यान्ते परमेस्वर्इ लयःकोः मीक्हाङः ओउःकायः पेतोलेः योआथै” त दाय्ह्ओ लेखती मुनाः। 10 ओउः कुरापाय् गल स्याव्आ दाय्ह्सा ओउःइ पुन् तात्ती जवओ ङ्हासै स्याव्ओया लोनेसै स्याव्ओया त दाय्ह्सा दोङ्सीलेः ओउःपाय् ङ्हासैलेः स्याव्ओआः। 11 ओउः पुन् तात्ओपाय् “लौ इत जवओ ङ्हासैलेः ङापाय् परमेस्वर्कोः मीक्हाङः पेतो स्याव्आलाङः” त अरुकायः छ्यानःसाकायः जाङ्ह्ओ खेःतो। ओहाङःसैको पुन् तात्ओ जवधाङ्मालो बेलाहाङःपाय् आब्राहाम् परमेस्वर्कोः मीक्हाङः पेतो स्याव्आ त झ्यान्तेलेः आब्राहाम्पाय् सबै परमेस्वर्कोः मीक्हाङः पेतो स्याव्ओ ङ्हाम्ओलम्कोः ताकुः लेःआः। ओउःपाय् पुन् तात्ओ जवमालो मान्तालम्कोः ताकुः लेःआः 12 फेरी आब्राहाम् जवधाङ्मालो बेलाहाङःलो लेखा परमेस्वर्कायः पेतो ङ्हाम्ती वाह्ओ पुन् तात्ती जवओलम्कोः ताकुःमा खेःलेःनाः। 13 आब्राहाम्पाय् ऐन् जाङ्ह्ओकायः खेःल ओउःइ परमेस्वर्कायः ङ्हाम्ती झ्यान्ते ओउःकोः मीक्हाङः पेतो स्याव्ओ। ओउःत खेःओ परमेस्वर्इ “लौ नाङ्मा नाङ्कोः प्लोमःदाने मोमःदानेलम्मा ल्हाव्ह्दैबाङ्कोः धनी स्याव्तेःनै” त तोतीलेः गम्आथै। 14 इ तोती गम्ओ कुरापाय् ऐन् जाङ्ह्ओलम्खेकायः ह तोओलेः त खेःया ङ्हाम्ओ मान्तालम्खेपाय् दोह् दोःचै र दोह्मा नाःल बा। ओहाङःसै परमेस्वर्इ तोती गम्ओ कुरापाय् सुइमा त्याक्सा खाय्नीली आह्रेलेः स्याव्नाः। 15 ओउः ऐन् मुलेःनाः त खेःया ऐन्कोः कुरा चीःती जाङ्ह्मालोलम्कायः परमेस्वर्इ न्युम्ह्ताक्नाःथास। ऐन् आःताः मुमाःत ऐन् जाङ्ह्मालो कुरामा वाङ्ल। 16 ओउःत झ्यान्ते ओउः तोती गम्ओ कुरापाय् परमेस्वर्इ ङ्हाम्ओलम्कायः ल्हुङ् साय्क्तोलेः सोह् बयःनाःथास। ऐन् पेतो जाङ्ह्झ्याङ्कायः बयःओ खेःल ओउः तोती गम्ओ कुरापाय् सबै आब्राहाम्कोः प्लोमःदाने मोमःदाने त तोओलम्कायः स्याव्नाः। ओउः ऐन् चीःती जाङ्ह्ओलम्कायःमा अरु ऐन् चीःमामाःत आब्राहाम्लो लेखा ङ्हाम्ओ मान्तालम्कायःमा स्याव्लेःनाः। ओउःत खेःओ आब्राहाम्पाय् ङी सबैकोः तोकानः लेखालेः मुनाः। 17 “लौ नाःतो जात्कोः तोकानः ङाइ स्याव्ताक्नेःनाङ्” त दाय्ह्ती परमेस्वर्इ दाय्ह्ओ ओउःकोः आखरःहाङः लेखती मुनाः। ओउःइ ङ्हाम्ओ परमेस्वर्कोः मीक्हाङः आब्राहाम्पाय् ङीकोः तोकानःलो लेखा स्याव्नाः। इ परमेस्वर्इपाय् सीओलम्कायः उह्ती च्योक्ताक्मानौ नाःसा नाःमालो थोक्लम्पाय् ओउःकोः तोधार्नालेः जाङ्ह्ताक्मानौ। 18 चोः दोःसा खाय्मालो बेलाहाङःपाय् आब्राहाम्इ “लौ चोः दोःताक्पाःताङः” त दाय्ह्ती परमेस्वर्कायः पेतोलेः ङ्हाम्आकान् ओउःत झ्यान्ते परमेस्वर्कोः ङ्हा तोती गम्ओ कुरापाय् “नाङ्कोः प्लोमःदाने मोमःदानेलम् नाःतो स्याव्नै” त तोओ कुरापाय् ताप्ताक्ती परमेस्वर्इ आब्राहाम्कायः नाःतो चोःलम्मा प्लोमःदाने मोमःदानेलम्मा दोःताक्आथै ओहाङःसैको आब्राहाम्पाय् नाःतो जात्कोः तोकानःलेः स्याव्आ। 19 परमेस्वर्इ तोती गम्ओ बेलाहाङःपाय् आब्राहाम् यात् सै बर्स स्याव्खेःआ ओउःकोः आङ् सीओ बेलालेः पुत्खेःओ खेःतो फेरी ओउःकोः बुधी सराह्मा आङ् झ्योम्ह्ती कोङ्री स्याव्ओलेः खेःतो। ओउःनीस् पय्क्चाः एतलेः स्याव्आकाच आब्राहाम्इ दोह्मा म्हर्माःत परमेस्वर्इ तोती गम्ओ कुराकायः पेतो ङ्हाम्ती 20 “लौ चोः गत दोःचाङः र” त गलमा दाय्ह्ती तोमाःत ओउःइ परमेस्वर्कायः न्हाङ्तोलेः ङ्हाम्ती ताङ्ह्ताक्आकान्। 21 “दोह् दोह्लो परमेस्वर्इ तोती गम्आकान् ओउःलेः ओउःकोः ग्वम्इ जुदालेः जाङ्ह्सा खाय्बाय्नौ” त दाय्ह्ती लयःकोः ल्हुङ्हाङः पेतोलेः तय्ह्आकान्। 22 ओउःत झ्यान्ते “परमेस्वर्इ लयःकोः मीक्हाङः ओउःकायः पेतोलेः योआथै” त दाय्ह्ती दाय्ह्ओआः। 23 एत दाय्ह्ओ कुरापाय् आब्राहाम्कायः ह तोओ खेःल 24 ङीकायःमा स्याव्लेःनाः “परमेस्वर्इपाय् ङीकोः प्रभु येसुकायः सीओसै उह्ती च्योक्ताक्आकान्” त ङीइ परमेस्वर्कायः ङ्हाम्नाःतय्ही त झ्यान्ते ङीमा परमेस्वर्कोः मीक्हाङः पेतोलेः स्याव्नाःतय्ही। 25 येसु ख्रीस्पाय् ङीकोः रेव्ओ काम्लम् मीह्ती वाय्साकायः सात्ताक्ओलेः खेःतो सात्आक्तीको ङीकायः परमेस्वर्कोः मीक्हाङः पेतो स्याव्ताक्साकायः ओउःपाय् उह्ती च्योक्ताक्ओलेः खेःतो। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.